З Украіны перасталі выпускаць ваеннаабавязаных украінцаў з ВНЖ у іншых краінах і падвойным грамадзянствам
«Існуе надзвычай высокая рызыка таго, што не дазволяць выехаць з краіны, нават пры наяўнасці амерыканскага пашпарта».
Перадавыя пазіцыі УСУ. Madeleine Kelly / ZUMA Press Wire / Scanpix / LETA
Дзяржаўная памежная служба Украіны перастала выпускаць з краіны ўкраінцаў з відам на жыхарства (ВНЖ) у іншых краінах, паведаміў 4 чэрвеня афіцыйны прадстаўнік Дзяржпагранслужбы Андрэй Дземчанка.
«Раней мы сапраўды выпускалі з тэрыторыі Украіны асоб, якія мелі ВНЖ за межамі Украіны. Цяпер гэтую катэгорыю грамадзян мы цяпер не прапускаем», — заявіў Дземчанка ў эфіры тэлемарафона (цытата паводле «Страна.ua»).
Амбасада ЗША ў Кіеве ў той жа дзень апублікавала на сваім сайце паведамленне для грамадзян ЗША, якія таксама маюць украінскае грамадзянства. Па дадзеных дыпмісіі, улады Украіны з 1 чэрвеня адмянілі дазвол выязджаць за межы краіны людзям з падвойным грамадзянствам, якія жывуць за мяжой, заўважыла «Медуза».
Глядзіце таксама
У амбасадзе адзначылі, што мужчыны ва ўзросце ад 18 да 60 гадоў, у якіх ёсць грамадзянства Украіны і ЗША, у тым ліку тых, хто жыве ў Злучаных Штатах, больш не змогуць пакінуць Украіну
Амбасада «настойліва рэкамендавала» амерыканцам з украінскім грамадзянствам, якія ўваходзяць у гэтую катэгорыю, не ездзіць ва Украіну. «Існуе надзвычай высокая рызыка таго, што вам не дазволяць выехаць з краіны, нават пры наяўнасці амерыканскага пашпарта» — дадалі ў дыпмісіі.
Глядзіце таксама
У сярэдзіне красавіка прэзідэнт Украіны Уладзімір Зяленскі падпісаў закон аб мабілізацыі. Дакумент набыў моц 18 траўня.
Згодна з законам, усе мужчыны ва ўзросце ад 18 да 60 гадоў павінны ўдакладніць свае даныя ў ТЦК (тэрытарыяльны цэнтр камплектавання, аналаг ваенкамата), а таксама павінны насіць з сабой ваенна-ўліковыя дакументы і прад'яўляць іх па патрабаванні работнікаў ТЦК або паліцыі. Закон узмацніў адказнасць для ўхілістаў.
Днямі народны дэпутат Мар'яна Бязуглая заклікала ўкраінцаў за мяжой, якія не жадаюць станавіцца на вайсковы ўлік, «здаваць пашпарты» — гэта значыць адмаўляцца ад грамадзянства.
Тым часам украінцы пачалі падаваць скаргі ў Еўрапейскі суд па правах чалавека з-за адмоваў у выездзе за мяжу, піша Страна.ua.