Жыхароў украінскага Купянска катавалі супрацоўнікі ФСБ Расіі — СБУ

Служба бяспекі Украіны распаўсюдзіла гісторыю жыхара Купянска, якога катавалі падчас расійскай акупацыі горада.

«Мяне на першым допыце хвілін 40 білі токам, стралялі ў мяне ці то з пнеўматыкі, ці то з газавага, не ведаю – я ў мяшку быў... Білі бітамі або жалезнымі трубамі», — распавёў мужчына.

Некаторым людзям паяльнікамі выпальвалі на целе крыжы.

Паводле звестак СБУ, так абыходзіліся з кожным, хто трапляў на допыт да ФСБ.

Супрацоўнікі ФСБ выбівалі з мясцовых жыхароў імёны і адрасы ўдзельнікаў АТА, байцоў тэрытарыяльнай абароны, асоб, якія мелі праўкраінскую пазіцыю, распавялі ў СБУ.

Затрыманым пагражалі пакараннем смерцю на мінным полі і расправай над сем'ямі, якія засталіся ў акупаваным горадзе.

Умовы ўтрымання ўкраінцаў таксама былі жахлівымі: у невялікай, разлічанай на двух чалавек камеры трымалі васьмёра вязняў.

Паводле ВВС