Раман Бандарэнка памёр у рэанімацыі БХМД
Збіты і затрыманы ўчора на плошчы Перамен у Мінску Раман Бандарэнка памёр у рэанімацыі БХМД.
Пра тое, што Раман Бандарэнка памёр у рэанімацыі БХМД, паведаміў тэлеграм-канал Белсата.
Раман Бандарэнка, якога ўчора збілі на плошчы Перамен у Мінску і затрымалі, трапіў у шпіталь у вельмі цяжкім стане. Шанцы выжыць ацэньваліся як 1 да 1000.
Мясцовая жыхарка Юлія распавяла Нашай Ніве, пра тое, што Рамана білі або ў бусе, або ў РУУС. Юлія у той вечар стаяла побач з Раманам і бачыла ўсё на свае вочы:
«Учора каля 10-й вечара ў наш двор прыехалі людзі ў цывільным з маскамі на тварах. 2-3 жанчыны і сем мужчын. Пачалі зразаць стужкі.
Я выйшла на вуліцу і бачыла падзеі на свае вочы, — расказвае Юлія. — У мяне ўзнікла спрэчка з адной з жанчын: што вы тут робіце? Адказ быў: мы неабыякавыя грамадзяне, жывём у сваёй краіне!
У гэты час я ўбачыла Рому. Падышла да яго, павіталася. Мы стаялі з ім і слухалі, як нейкі хлопец вядзе палеміку з адным з ціхароў.
Рома спакойны, не гарачы. Ён жа мастак. Ніколі не правакаваў на бойкі, паводзіў сябе разважліва. І ўчора таксама.
Рома слухаў-слухаў дыялог хлопца з ціхаром, пасля зразумеў, што гэта бессэнсоўная размова. І сказаў хлопцу: «Усё, няма пра што тут размаўляць, заканчвайце».
Тут ціхар да яго павярнуўся і сказаў: «Ты што тут, борзы?» І пайшоў на Рому.
Рома пачаў адыходзіць. І яны апынуліся амаль у мурала. Ціхар штурхануў Рому.
Рома адхіляўся, але не адбіваўся! Але ціхар схапіў яго, пачаў круціць. І атрымалася так, што ён моцна штурхнуў Рому на дзіцячую металічную лесвічку і насеў на яго. І тут у гэтага ціхара выпаў тэлефон.
Я крыкнула: Рома, здымі маску з яго!»
Пасля гэтых слоў ціхар падхапіў тэлефон і рэзка ўцёк, кажа Юлія.
«Але ў тую ж секунду з розных кутоў падбеглі двое ў шэрым і чорным — не ў форме, у цывільным і ў масках. Яны падбеглі і пачалі Рому «прэсаваць»: яны яго не білі, але населі, прыціснулі да зямлі.
Увесь гэты час па перыметры двара стаялі таніраваныя бусы. З іх ніхто не выходзіў.
І гэтыя, якія выбеглі, узялі Рому, панеслі за рукі і ногі, махнулі бусу, каб той пад'ехаў. Рому закінулі ўнутр машыны. Каб бус тросся — я не бачыла. Закінулі, і бус адразу з'ехаў.
Усё гэта я пераказала сёння следчым. Лічу, што сітуацыю трэба максімальна апублічваць.
Я думаю, Рамана білі або ў бусе, або ў РУУС. На пляцоўцы гэта была валтузня, а не бойка. І Раман аб тую лесвічку ўдарыўся не галавой! Ва ўсякім выпадку я так ўбачыла. І крыві пасля на дзіцячай пляцоўцы не было».
Сваякі паведамілі пра смерць Рамана каля васьмі гадзін вечара
Цяпер у двары на Плошчы Перамен пачалі збірацца людзі. Запальваюць свечкі ў памяць пра загінулага Рамана Бандарэнку
