У Місі тры лапкі, але ёй не патрэбна шкадаванне, ёй патрэбна любоў!

Грамадства 31.07.2020

Місі была звычайнай чорнай коткай, якіх шмат на вуліцы. Цяжка, нават немагчыма адказаць на пытанне — каго і як яна так пакрыўдзіла.

Валанцёры знайшлі Місі ў вельмі цяжкім стане. Вялікая частка яе скуры была моцна пашкоджана. Ветэрынары пазней паведамілі, што гэта моцны хімічны апёк і сама яна яго атрымаць практычна не магла.

Доўгі час лячэння, ампутацыя лапкі, няўдалая спроба ўладкавання ў сям'ю — усё гэта таксама пра Місі.

Місі ўсяго каля двух гадоў, стэрылізавана, трушчыць сухі корм і прэсервы, у латок ходзіць без прамашкі. Па характары не смяльчак, і гэта можна зразумець, але час, ласка і смачняшкі — і вы трапілі на бясконцы мур-мур!

У Місі тры лапкі, і гэта наогул яе ніяк не напружвае, не бянтэжыць і не турбуе — ёй, сапраўды, не патрэбна шкадаванне, ёй патрэбен чалавек, які нават у самым страшным сне не ўявіць, што гэтым вачам можна здрадзіць!