Уцёкі ад аўтамата — традыцыйная забава мужчынскага насельніцтва РФ. Ці дапаможа мабілізацыя Расіі?

Калі для Расіі ўсё складзецца ідэальна, а Захад застанецца пасіўным, то тады Украіне будзе цяжка. Чаму такі сцэнар малаверагодны?

Тэлеграм-канал  "Лялькавод і авечка" вырашыў прааналізаваць магчымыя наступствы расійскай мабілізацыі.

— Пачнем са смелага дапушчэння, што ў расіян усё атрымаецца і за нейкі не самы доўгі тэрмін яны змогуць сабраць у войска 300 000 чалавек, навучыць іх, узброіць і адправіць на фронт. Паводле мерак цяперашняй вайны — гэта сур'ёзнае ўзмацненне. Яно дапаможа расійскаму войску як мінімум стабілізаваць фронт, як максімум — зноў пайсці ў поўнамаштабны наступ. Аднак мы нездарма казалі, што гэта ідэальны сцэнар. Ён рэалізуецца толькі пры выкананні наступных умоў.

Першае: Крамлю трэба будзе сабраць неабходную колькасць матываваных салдат, навучыць іх і узброіць. Як мы бачылі па правалу добраахвотнага прызыву, якія жадаюць ваяваць у Расіі вельмі мала. Нават велізарныя (па мерках Расіі) грошы за ўдзел у вайне прыцягнулі толькі некалькі дзясяткаў тысяч. Да гэтага трэба дадаць, што ўцёкі ад аўтамата — гэта традыцыйная забава мужчынскага насельніцтва РФ. Вопыт у гэтай нялёгкай справе ёсць практычна ва ўсіх.

Таму выклікае некаторыя сумневы, што колькасныя паказчыкі атрымаецца выканаць. А калі і атрымаецца, то маральны дух сабраных мабілізацыяй будзе даволі нізкі. Што ж тычыцца навучання і ўзбраення, тут таксама ўзнікаюць пэўныя пытанні. Навучаць салдат могуць кадравыя афіцэры — але практычна ўсе яны ваююць на зямлі Украіны ці ўжо ляжаць у ёй. І хто будзе навучаць такую вялікую масу навабранцаў, застаецца загадкай.

Што да ўзбраення, то, пачынаючы з лета, мы назіраем, што на фронт адпраўляюць шмат старой савецкай тэхніцы, значная частка якой няспраўная. Сапраўды, падчас харкаўскага разгрому ўкраінцы захапілі істотную колькасць цяжкага ўзбраення, што было кінутае якраз па прычыне непрыдатнасці.


Другі момант палягае ў тым, што ўсю гэтую велізарную армаду людзей трэба неяк забяспечваць і неяк ёй кіраваць. У лютым Расія нападала прафесійным кадрамі і часткамі, і нават тады выявіліся праблемы з лагістыкай. Цікава, калі кіраваць і забяспечваць групоўку ў 170 000 — 200 000 прафесіяналаў было праблемна, што ж будзе, калі прызавуць яшчэ 300 000 цывільных людзей, якія не маюць ваеннага вопыту?

Трэцяе, каб сапраўды вярнуць сабе перавагу на фронце, трэба, каб Захад не нарошчваў ваенную падтрымку Украіны. У Кіева цяпер больш пяхоты, гэта Расія кампенсуе перавагай у авіяцыі, артылерыі і бронетэхніцы. Мабілізацыя дае Расіі парытэт у пяхоце, і калі суадносіны цяжкіх узбраенняў застануцца такімі ж, то ў Расіі з'явіцца сур'ёзная перавага. Але гэта пры ўмове пасіўнасці Захаду. Нават адной дзясятай долі арсенала краін NATO хопіць для захавання перавагі ў гэтай вайне для ўкраінскага боку.

Ці будзе такая дапамога аказаная ў бліжэйшы час? Мы б не чакалі імгненных анонсаў ад саюзнікаў Украіны, ім трэба час на планаванне лагістыкі і наменклатуры маштабнай дапамогі. Але выказванні амерыканскіх, брытанскіх, еўрапейскіх уладаў даюць разуменне, што яны гатовыя падтрымліваць Украіну да перамогі, чаго б гэта ні каштавала. Як мы зразумелі за апошнія паўгода, краіны NATO вельмі настойлівыя ў дасягненні дэклараваных мэтаў.

Выснова: калі для Расіі ўсё складзецца ідэальна, у РФ змогуць і людзей знайсці, і матываваць іх, і ўзброіць хоць нейкай адрамантаванай савецкай зброяй, навучыць і вырашыць ды не паўтараць  лагістычныя правалы, а Захад застанецца пасіўным, то тады Украіне будзе цяжка. Як і ў самым пачатку вайны, у РФ будзе перавага.

 

Але мы сумняваемся ў тым, што ўсё складзецца ідэальна, хутчэй за ўсё, праблемы будуць па ўсіх трох пунктах, што можа даць і сінергетычны эфект. Напрыклад, усе ведаюць, што ў Расіі велізарныя праблемы з забеспячэннем, асабліва відавочнымі яны сталі пасля таго, як Украіна атрымала дальнабойную ракетную артылерыю. УСУ пачалі біць па складах, знішчаючы лагістычныя ланцужкі, што прывяло да скарачэння інтэнсіўнасці артылерыйскіх удараў з боку Расіі прыкладна ў тры разы.

Аднак нішто не перашкаджае Захаду павялічыць колькасць "хаймарсов" ва Украіне мінімум разоў у пяць. Нагадаем, цяпер там 25 такіх машын, а ў адной толькі Румыніі іх больш за сотню. Гэта значыць, што ўкраінцы змогуць выносіць расійскія склады і лагістычныя ланцужкі нашмат больш эфектыўна. У выніку можа атрымацца карціна, калі патрэбы расійскай арміі ўзрастуць больш, чым у два разы (таму што будзе ў два разы больш салдат), пры гэтым украінцы змогуць знішчаць забеспячэнне гэтай арміі ў разы хутчэй.

А гэта вельмі няпростая сітуацыя, калі ты тыднямі сядзіш у акопах пад пастаяннымі абстрэламі без забеспячэння і боепрыпасаў. Для таго, каб захаваць баяздольнасць у такіх умовах, трэба валодаць сталёвай воляй абаронцаў Азоўсталі. І тут мы вяртаемся да першага пункта, дзе разважалі пра тое, што маральны баявы дух сілком мабілізаваных людзей наўрад ці будзе высокі.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: