Вядуць сябе як гаспадары жыцця, спяць у хлявах. Што распавядаюць пра расійскіх вайскоўцаў на Гомельшчыне

Журналісты беларускага радыё, прызнанага ўладамі «экстрэмісцкім», пагутарыла з жыхарамі Гомельскай вобласці пра прысутнасць там расійскіх вайскоўцаў, тэхнікі і нябожчыкаў.

«Расіянін даў мне агітку пра тое, што яны нясуць мір»

Шмат расійскай тэхнікі і вайскоўцаў было 29 сакавіка ў Брагінскім раёне. «Калоны танкаў, БТР і "Уралаў" былі бясконцымі. Я спрабаваў размаўляць з расійскімі вайскоўцамі, але яны былі вельмі злыя. Наколькі я даведаўся, ім забаронена кантактаваць з намі, называць свае нейкія звесткі», — расказаў жыхар Брагінскага раёна.

Расійскі вайсковец даў яму агітацыйную ўлётку. Там напісана: «Паважаныя таварышы, сябры, нам не патрэбная вайна! Мы не збіраемся нападаць і бамбіць гарады. Мы прыйшлі змагацца не з украінскім народам, а з нацыяналістамі, ад рук якіх гінуць мірныя людзі. Аднойчы мы перамаглі фашызм і не маем права здаваць пазіцыі».

«Паводзяць сябе як гаспадары жыцця»

Максім (імя змененае дзеля бяспекі) называе сітуацыю з прысутнасцю расіян у Мазыры жахам.

«Расіяне паводзяць сябе ў Мазыры як гаспадары жыцця. Каля вёскі Бокаў Мазырскага раёна ў іх аэрадром і лагер, там іх вельмі шмат. Адзін мясцовы гуляў там — дык яго спынілі расіяне, пачалі чапляцца: "Што ты тут ходзіш, што ты тут робіш?". Акружылі яго і выклікалі КДБ. Яго везлі на допыт, прыставіўшы да боку пісталет», — распавёў жыхар Мазыра.

Ён кажа, што ў затрыманага не знайшлі нічога, апроч падпіскі на нейкі тэлеграм-канал, таму «абышлося "суткамі"».

«Спяць у хлявах, не мыюцца, таму такі смурод ад іх»

«Натоўпы іх у крамах, ходзяць па барах. Чапляюцца да людзей. Адзін наш прыяцель мае доўгія валасы.

Дык да яго ў бары прычапіўся расійскі вайсковец. Маўляў, ты чаго маеш такія доўгія валасы? У нас бы за такое забілі! Недзе там "у іх" — ці ў Чувашыі, ці ў Забайкаллі.

Яшчэ такая адметнасць: ад іх моцна смярдзіць, па паху можна зразумець, калі заходзіш у краму, што яны там. Бо, думаю, яны не мыюцца.

Камандзіры жывуць у нармальных умовах — у гатэлі "Прыпяць". Салдаты — у лесе ў намётах і нават у хлявах. У вёсцы Прудок яны жывуць у хлявах фермы.

Там спяць на дыванках. Можа таму і такі смурод ад іх», — разважае Максім.

Ён кажа, што ў моргах Мазыра цяпер няма трупаў расіян — «іх адразу грузяць і некуды вывозяць».

«Калі іх выносяць і вывозяць, то людзей не пускаюць у прыёмны пакой. Яшчэ і ачапленне ставяць. Я не ведаю, хто гэта, яны ў цывільным. Лекары нічога не распавядаюць, ім забаранілі. Ім нават сказалі, што калі хто будзе цікавіцца, дакладваць кіраўніцтву», — дадаў мазыранін.

«Прадаюць нарабаванае ва Украіне і паліва»

Ілля (імя змененае) жыве ў Мазыры і штодзень бачыць расійскія самалёты ў небе, вайскоўцаў — на вуліцах роднага горада.

«Кіроўцы іх прадаюць дызельнае паліва — па 15 рублёў за каністру. Яны вязуць "трафеі" з Украіны, нарабаванае, і прапаноўваюць на продаж мясцовым жыхарам. Лядоўні, бытавую тэхніку, аўташыны — ды што толькі пад рукі пападзецца», — кажа Ілля.

«Добрага нічога не скажу. Непрыемна, калі нашы дзяўчаты "з невысокай сацыяльнай адказнасцю" гуляюць з імі. Не ведаю, дзе яны знаёмяцца — ці на вуліцы, ці ў інтэрнэце. Бойкі ўчыняюць, калі п’яныя, у барах», — дадаў мясцовы жыхар.

«У асноўным і шмат бяруць гарэлкі»

Шмат тэхнікі і расійскіх вайскоўцаў у Нароўлі. Тут таксама размешчаны палявы шпіталь. Параненым расіянам тут аказваюць першую дапамогу. Потым іх вязуць у Мазыр ці Гомель. Трупы адпраўляюць у Расію.

«Палявы шпіталь ахоўваюць звонку расійскія салдаты. Пэўна, каб ніхто не фатаграфаваў. Туды лятаюць верталёты ў асноўным. Шмат іх кружляе і над Нароўляй, прычым лятаюць вельмі нізка», — кажа жыхар Нароўлі.

Ён заўважыў, што расіяне «ўдасканалілі» сваю тэхніку.

«Машыны "зашылі" бярвеннем, зверху галінкі ляжаць, наварылі на дзверы і на паліўны бак жалеззе — відаць, каб не прастрэлілі», — падзяліўся назіраннямі жыхар раённага цэнтра.

Кажа, што падбітую расійскую тэхніку рамантуюць у Нароўлі.

«У краме стаў сведкам — расіянін набраў гарэлкі і віна, а картка не працуе. Пайшоў, паставіў усё назад. Але большасць купляе ўсё. У асноўным і шмат бяруць гарэлкі. Таксама "снікерсы", "ролтаны", цыгарэты», — дадаў жыхар Нароўлі.