235-ты дзень вайны: $50 тысяч за палон Гіркіна, вяртанне Маска на «правільны бок»

Распачаўся 235-ты дзень з пачатку поўнамаштабнага ўварвання Расіі ва Украіну. Расказваем, што вядома на гэты час.

Фота Генштаба УСУ
Як вядзецца ў ранішнім паведамленні Генштаба УСУ 16 кастрычніка, РФ спрабуе ўтрымаць часова захопленыя тэрыторыі, засяроджвае намаганні на спробах стрымлівання дзеянняў Сіл абароны на асобных кірунках, разам з тым спрабуе весці наступальныя дзеянні на Бахмуцкім і Аўдзееўскім кірунках.
За мінулыя суткі праціўнік нанёс 5 ракетных і 23 авіяцыйных удараў, здзейсніў да 60 абстрэлаў з рэактыўных сістэм залпавага агню.
Ударам праціўніка падвергліся аб'екты і мірныя грамадзяне ў раёнах больш чым 30 населеных пунктаў. У прыватнасці гэта — Нікапаль і Шахцёрскае Днепрапятроўскай вобласці; Глушкоўка на Харкаўшчыне; Арэхаў і Малыя Шчарбакі Запарожскай вобласці; Дзмітраўка — Кіеўскай; Белагорка на Херсоншчыне і Угледар у Данецкай вобласці.
*****У горадзе Рубежнае Луганскай вобласці вайскоўцы, якія прыбылі з Чачні, пачалі высяляць мірных грамадзян з прыватных дамоў для размяшчэння сваіх афіцэраў, паведамляе Генштаб УСУ ў ранішняй зводцы.

*****Украінцы менш чым за паўтара сутак сабралі 150 млн грн на сістэмы, якія будуць перахопліваць беспілотнікі, у тым ліку і іранскія баявыя дроны-камікадзэ, паведаміў сузаснавальнік Monobank Алег Гарахоўскі.
Днём 14 кастрычніка дзяржаўная платформа UNITED24, Мonobank і валанцёр Ігар Лачанкоў пачалі збор на сістэму процідзеяння дронам. Першыя 120 млн грн атрымалася сабраць за 12 гадзін.
*****
Украінскім вайскоўцам паабяцалі 50 тыс. долараў за ўзяцце ў палон тэрарыста Гіркіна. 

Актывіст і блогер Сяргей Стэрненка, валанцёр і лідар гурта «Антыцелы» Тарас Таполя, а таксама пісьменнік і галоўны сяржант 47-га штурмавога палка Валерый Маркус паабяцалі агулам 30 тысяч долараў таму, хто возьме ў палон расійскага тэрарыста Ігара Стралкова (Гіркіна), які знаходзіцца на вайне ва Украіне. Пасля яшчэ па 10 тыс. долараў паабяцалі тэнісіст Сяргей Стахоўскі і кіраўнік Луганскай абласной ваеннай адміністрацыі Сяргей Гайдай.
Гіркіна можна вымяняць на палонных украінцаў ці аддаць Нідэрландам, дзе яму пагражае пажыццёвае зняволенне. 
******Дарадца кіраўніка Офіса Прэзідэнта Украіны Міхаіл Падаляк падзякаваў заснавальніку кампаніі SpaceX ІлонуМаску за тое, што той далучыўся да «правільнага боку», пагадзіўшыся працягваць фінансаванне Starlink ва Украіне. Пра гэта Падаляк напісаў у Twitter у суботу, 15 кастрычніка.
«Ты павінен быў знішчыць сітхаў... Так ты і зрабіў... Дзякуй, што далучыўся да правільнага боку. Украіна гэта цэніць», — напісаў Падаляк.
Нагадаем, у пятніцу паведамлялася, што Маск вырашыў адмовіцца ад фінансавання Starlink ва Украіне.
Аднак у суботу ён напісаў, што перадумаў і гатовы працягваць фінансавую дапамогу Украіне.
******
Міністэрства замежных спраў і пасольства Кітая заклікалі ўсіх сваіх грамадзян, якія зараз знаходзяцца ва Украіне, неадкладна пакінуць яе. Просьбу ведамства матывавалі «сур'ёзнай сітуацыяй бяспекі». Персаналу дыппрадстаўніцтваў паабяцалі дапамагчы з эвакуацыяй.
Пра гэта паведамляе дзяржаўнае выданне КНР Global Times.