281-шы дзень вайны ва Украіне. Што здарылася за ноч?
Абстрэлы ўкраінскіх гарадоў расійскім войскам працягваюцца. Розныя краіны свету абвяшчаюць пра новую дапамогу Украіне.
Фота з тэлеграм-канала Уладзіміра Зяленскага
Расіяне суткі абстрэльвалі Харкаўскую вобласць, не абышлося без руйнаванняў. Пра гэта ў сваім Telegram паведаміў кіраўнік Харкаўскай вобласці Алег Сінягубаў.
«Зноў пад абстрэламі Купянскі раён: акупанты на працягу сутак наносілі артылерыйскія і ракетныя ўдары. У Курылаўскай абшчыне ў выніку абстрэлаў гарэлі гаспадарчыя пабудовы, разбураны дахі двух дамоў, траплянне на тэрыторыю адукацыйнай установы», — напісаў Сінягубаў.
Паводле яго слоў, у Казачай Лопані ў Харкаўскім раёне абстрэлы расіян разбурылі 4 кватэры шматкватэрнага дома. Аднак ахвяр і пацярпелых у выніку варожых нападаў няма.
У Данецкай вобласці за мінулыя суткі ў выніку расійскіх абстрэлаў паранены трое мірных жыхароў — у Бахмуце. Пра гэта паведаміў кіраўнік АВА Павел Кірыленка.
У Херсоне праз моцныя начныя абстрэлы горада расіянамі знікла напружанне ў электрасетках, паведаміў кіраўнік АВА Яраслаў Янушэвіч.
«У Херсоне знікла напружанне ў электрасетках. Гэта адбылося з-за магутных абстрэлаў горада расійскімі захопнікамі. «Херсонаблэнерга» ўжо працуе над ліквідацыяй праблемы», — напісаў Янушэвіч.
Адзначым, паводле звестак мясцовых Telegram-каналаў, гэтай ноччу расійскія войскі ўдарылі па горадзе з артылерыі. З-за абстрэлаў загарэўся шматпавярховы дом.
За мінулыя суткі падраздзяленні Сіл абароны Украіны адбілі атакі расіян у раёнах наступных населеных пунктаў: Навасёлаўскае, Стэльмахоўка і Белагораўка Луганскай вобласці і Белагораўка, Якаўлеўка, Бахмут, Курдзюмаўка, Краснагораўка, Каменка, Вадзяное, Першамайскае і Мар'інка Данецкай вобласці, паведаміў украінскі Генштаб у ранішняй зводцы.
На Сватаўскім і Ліманскім напрамках расійскія войскі робяць інжынернае абсталяванне лініі абароны, працягваюць перакідванне асабовага складу, боепрыпасаў і гаруча-змазачных матэрыялаў для камплектавання і забеспячэння новых падраздзяленняў і тых, якія панеслі страты.
У Алешках Херсонскай вобласці змяншаецца колькасць расійскіх салдат і вайсковай тэхнікі. З асобных населеных пунктаў Херсонскай вобласці войскі РФ выведзены і раскіданы ў лесапалосах уздоўж участка аўтадарогі Алешкі — Голая Прыстань. Асноўная частка войскаў там — мабілізаваныя.
* * *
Гендырэктар «YASNO» Сяргей Каваленка паведаміў, што час, які кіяўляне праводзяць без святла, скарачаецца, аднак экстранныя адключэнні працягваюцца, стабілізацыйныя графікі не дзейнічаюць, «але мы на іх арыентуемся і да іх набліжаемся». Ён таксама адзначыў, што скарачаецца колькасць дамоў, падлучаных да тых жа ліній, што і аб'екты крытычнай інфраструктуры.
* * *
Амерыканцы будуць навучаць у Германіі па 2500 украінскіх вайскоўцаў на месяц, паведамляе CNN са спасылкай на чыноўнікаў Белага дома. У прыватнасці, згодна з новай праграмай, ЗША пачнуць навучаць значна большыя групы ўкраінскіх салдат складанай тактыцы вядзення бою, у тым ліку каардынацыі пяхотных манеўраў з артылерыйскай падтрымкай.
* * *
Міністарка абароны Германіі Крысцін Ламбрэхт паабяцала прадставіць нямецкаму ўраду прапанову аб разгортванні сістэм СПА «Patriot» на тэрыторыі Украіны. Пра гэта паведаміў міністр абароны Польшчы Марыюш Блашчак.
* * *
Пентагон і амерыканская кампанія «Raytheon Technologies» падпісалі кантракт на суму 1,2 мільярда долараў на закупку сістэм СПА «NASAMS» для Украіны, паведаміла Мінабароны ЗША. Гаворка ідзе пра пастаўку яшчэ шасці батарэй «NASAMS» у дадатак да дзвюх, што былі пастаўлены ў лістападзе. Іх перададуць Кіеву на працягу наступных месяцаў, як толькі сістэмы СПА будуць пабудаваны.
* * *
Іспанская кампанія — вытворца зброі «Instalaza» таксама, верагодна, атрымала пакет з выбуховай прыладай, як гэта было ў пасольстве Украіны ў Іспаніі, паведамляе «El Periódico». Днём 30 лістапада паліцыя рэгіёна Арагон і Грамадзянская гвардыя атрымалі ад «Instalaza» паведамленне аб падазроным пакеце. Спецыялісты ўзарвалі пакет кантраляваным спосабам, аперацыя завяршылася без ахвяр і пацярпелых.
«Instalaza» — кампанія з Сарагосы, якая з 1943 года займаецца праектаваннем і вытворчасцю ваеннага пяхотнага рыштунку. Гэта адна з іспанскіх кампаній, чыю зброю ўрад накіроўвае Украіне.
* * *
Канада выпусціла аблігацый на 500 мільёнаў долараў для падтрымкі Украіны — іх выкупілі за дзень, паведаміў Мінфін краіны. Сродкі, атрыманыя ад продажу пяцігадовых аблігацый пад назвай «Суверэнітэт Украіны», будуць пералічаныя на спецыяльны рахунак МВФ, на які паступае большасць канадскай фінансавай дапамогі Украіне.
* * *
Прэм'ер-міністарка Фінляндыі Санна Марын заявіла пра неабходнасць павялічыць дапамогу Украіне, каб забяспечыць ёй перамогу ў вайне супраць Расіі. «Нам патрэбна жорсткая сіла, калі справа тычыцца Украіны», — сказала Марын журналістам падчас першага ў гісторыі візіту фінскай прэм'ер-міністаркі ў Новую Зеландыю і Аўстралію.
Яна падкрэсліла, што Украіна мае патрэбу ў ваеннай, фінансавай і гуманітарнай падтрымцы. А таксама саюзнікі павінны пераканацца, што ўсе ўцекачы з Украіны будуць прыняты ў Еўропе.
Па словах прэм'еркі, для Фінляндыі вайна мае вельмі канкрэтнае значэнне з-за 1300-кіламетровай мяжы з Расіяй. Марын адзначыла, што яе краіна ўжо перадала Украіне дзесяць партый зброі. «Мы павінны быць упэўненыя, што яны перамогуць», — заявіла прэм'ерка Фінляндыі.
* * *
Уладзімір Зяленскі ў сваім выступленні на NYT DealBook Summit выказаў надзею, што вайна скончыцца ў найбліжэйшыя месяцы: «Вайна скончыцца тады, калі мы пераможам ці калі гэтага захоча Расійская Федэрацыя. Можа так здарыцца, што Расія захоча толькі тады, калі будзе адчуваць, што яна слабая, яна ў ізаляцыі і няма ў яе партнёраў па гэтым пытанні. Будзем верыць, што гэта здарыцца ў бліжэйшыя месяцы».
Зяленскі таксама анансаваў «новыя рашэнні, каб не дапусціць якой-небудзь магчымасці Расіі маніпуляваць унутраным жыццём Украіны». Паводле яго слоў, па стане на вечар 30 лістапада каля 6 мільёнаў абанентаў у большасці абласцей і Кіеве адключаны ад электрычнасці. Сітуацыя застаецца вельмі складанай менавіта ў сталіцы, а таксама ў Кіеўскай, Вінніцкай, Львоўскай, Адэскай, Хмяльніцкай і Чаркаскай абласцях.