909-ы дзень вайны: Расіяне нанеслі ўдар па дзіцячай кавярні

У ноч на 20 жніўня Расія нанесла ўдары па Украіне з ракет і беспілотнікаў-камікадзэ розных тыпаў. УСУ ўжо кантралююць 93 населеныя пункты ў Курскай вобласці, прасунуліся ў глыбіню з 28 да 35 кіламетраў, усталявалі кантроль над 1263 кв. км тэрыторыі, паведаміў галоўнакамандуючы Сырскі.

Уначы Кіеў атакавалі «шахіды» і ракеты — усе збітыя

Расійскія войскі ўначы і раніцай у аўторак атакавалі Кіеў беспілотнікамі і крылатымі ракетамі.

РФ нанесла ўдары па Украіне двума балістычнымі ракетамі з Варонежскай вобласці, крылатай ракетай з Бранскай вобласці, кіраванымі авіяцыйнымі ракетамі з паветранай прасторы Курскай і Запарожскай абласцей, а таксама ўдарнымі БПЛА з шэрагу рэгіёнаў РФ. 

Кіраўнік гарадской вайсковай адміністрацыі Сяргей Папко паведаміў, што ўсе паветраныя цэлі збітыя, пацярпелых няма.

«Уначы акупанты атакавалі сталіцу ўдарнымі БПЛА (дроны былі знішчаныя СПА). А сёння раніцай паветраную трывогу абвясцілі праз пагрозу ўжывання крылатых ракет», — напісаў ён у тэлеграм.

Паводле яго, гэта была 41-я паветраная трывога для Кіева і пятая ракетная атака з пачатку жніўня.

«Паводле папярэдняй інфармацыі, вораг атакаваў сталіцу Украіны з паўночнага кірунку, імаверна, крылатымі ракетамі тыпу «Іскандэр-К». Гэта была ўжо пятая ракетная атака па Кіеве ў гэтым месяцы. Сіламі і сродкамі СПА ракеты былі знішчаныя яшчэ на подступах да горада», — дадаў ён.

Ад чаго будуць залежаць далейшыя дзеянні Узброеных сіл Украіны ў Курскай вобласці? Галоўнакамандуючы УСУ распавёў

Украінскія абаронцы працягваюць аперацыю ў Курскай вобласці.

Далейшыя дзеянні будуць залежаць ад аператыўнай абстаноўкі, піша РБК-Украіна са спасылкай на заяву галоўнакамандуючага Узброенымі сіламі Украіны Аляксандра Сырскага ў эфіры агульнаўкраінскага тэлемарафону.

Генерал нагадаў, што Украіна пачала аперацыю ў Курскай вобласці з мэтай стварэння зоны бяспекі і спынення расійскіх абстрэлаў Сумскай вобласці.

«Падчас наступу на тэрыторыі Курскай вобласці Узброеныя сілы Украіны прасунуліся ў глыбіню абароны праціўніка ад 28 да 35 кіламетраў, захапілі 1263 квадратныя кіламетры тэрыторыі і ўзялі пад кантроль 93 населеныя пункты», — падкрэсліў Сірскі.

Паводле яго слоў, расіяне спрабуюць перашкодзіць далейшаму прасоўванню ўкраінскіх абаронцаў і вядуць манеўраную абарону. Пры гэтым у Курскую вобласць перакідваюць салдат з іншых кірункаў.

«Далейшыя дзеянні нашых войскаў на гэтым кірунку будуць залежаць ад развіцця аператыўнай абстаноўкі», — сказаў генерал.

Уладзімір Пастухоў: Курск — стрэмка ў назе Расіі, якая можа справакаваць сепсіс

У Чырвоны Крыж паступіла больш за 1500 заявак на пошук людзей у Курскай вобласці

За тыдзень 11-19 жніўня ў Расійскі Чырвоны Крыж (РЧК) паступіла больш за 1500 заявак на вышук людзей у Курскай вобласці, куды раней увайшлі падраздзяленні УСУ, знойдзеныя каля 100 чалавек. Пра гэта са спасылкай на прэс-службу Расійскага Чырвонага Крыжа піша ВВС.

Пошукавая служба «Ліза Алерт» з пачатку жніўня атрымала 779 заявак на пошук зніклых у Курскай вобласці, 111 з іх закрытыя са статусам «Знойдзены. Жывы». 

Частка заявак можа быць дубляванымі, г.зн. па адным чалавеку, якога шукаюць, можа быць пададзена больш за адно паведамлення аб знікненні.

Нагадаем, 15 жніўня «ВКонтакте» на патрабаванне Генпракуратуры РФ заблакавала групу «Суджа — Пошук людзей», дзе публікаваліся абвесткі пра пошук зніклых жыхароў раёна. Раней аператыўны штаб Курскай вобласці рэкамендаваў мясцовым жыхарам не апублікаваць даныя аб зніклых сваяках у адкрытых крыніцах. Гэта было патлумачана тым, што УСУ нібыта збіраюць гэтыя звесткі «для шантажу і распаўсюджвання дэзінфармацыі».

Вярхоўная Рада Украіны забараніла РПЦ. Што будзе з Маскоўскім Патрыярхатам?

Нафтабазу ў Пралетарску не могуць патушыць трэція суткі, працуюць 500 пажарных

Нафтасховішча ў Пралетарску Растоўскай вобласці, якое загарэлася раніцай 18 жніўня пасля атакі беспілотнікаў, гарыць ужо трэція суткі, паведамляе мясцовы партал «Навіны Растова».

Адкрытага гарэння на відэа, знятым мясцовымі жыхарамі раніцай аўторка, не відаць, аднак у неба падымаюцца клубы чорнага дыму, неба над Пакроўскім «выглядае жудасна», паведамляе выданне. 

Плошча пажару, піша ТАСС са спасылкай на мясцовыя ўлады, складае 10 тысяч квадратных метраў. Для тушэння пажару рыхтуюць авіяцыю, у ліквідацыі агню задзейнічана больш за 500 чалавек. У папярэднія дні агонь спрабавалі тушыць тры пажарныя цягнікі і 80 спецмашын. Паводле інфармацыі на вечар панядзелка, пры тушэнні пацярпеў 41 пажарны, пяцёра з іх у рэанімацыі. Семярых ратавальнікаў эвакуююць у Пецярбург, даведаліся «Навіны Растова».

Раней кіраўнік Пралетарскага раёна Валерый Горніч заяўляў, што небяспекі для жылых кварталаў няма, бо дым ад пажару ідзе ў бок, процілеглы жылой забудове, а якасць паветра ў самым Пралетарску адпавядае нарматывам. Мяркуючы па спадарожнікавых здымках, шлейф дыму расцягнуўся амаль на 25 кіламетраў.

Эвакуацыя Пралетарску не плануецца, паведамілі напярэдадні вечарам мясцовыя ўлады.

Пажар на базе захоўвання паліва на паўднёвым усходзе Растоўскай вобласці ўзнік раніцай у нядзелю пасля атакі беспілотнікаў. У панядзелак была спроба новай атакі нафтасховішчы дронамі, але, нібыта, спрацавала сістэма СПА. Прынамсі, пра гэта са спасылкай на крыніцу ў сілавых органах пісалі «Навіны Растова».

Гары Каспараў: Пуцін пагражае дэмакратычнаму парадку на ўсім кантыненце

Навіны вайны

• Амерыканскі інстытут вывучэння вайны (ISW) паведамляе са спасылкай на геалакацыйныя кадры, што расійскія войскі прасунуліся на паўднёвы захад ад Навасёлаўскага (паўднёвы ўсход ад Купянска) і паўднёвы захад ад Андрэеўкі (на захад ад Сватава). Таксама, паводле аналітыкаў, расіяне захапілі Заветнае на паўднёвы ўсход ад Пакроўска і яшчэ адзін населены пункт крыху паўночней — Новажэланнае. Акрамя таго, войскі РФ прасунуліся ў паўночна-заходняй частцы Паўлаўкі (паўднёва-захад ад Вуглядара).
• Украінскі OSINT-праект Deep State паведамляе, што войска РФ акупавала Межава Пакроўскага раёна Данецкай вобласці, Сумнае і Жураўку, а таксама прасунулася каля Гродаўкі і Заветнага. Ідуць цяжкія баі за Нью-Ёрк.
• Расіяне нанеслі ўдар па дзіцячай кавярні ў Малакатэрынаўцы Запарожскай вобласці: параненыя трое дзяцей, адзін з іх у цяжкім стане, паведаміў кіраўнік АВА Іван Фёдараў.
  
• Вярхоўная Рада Украіны падтрымала законапраект аб прадастаўленні грамадзянства Украіны абаронцам з іншых краін і іх сем'ям. Згодна з дакументам, на заканадаўчым узроўні замацоўваецца магчымасць для замежнікаў і асоб без грамадзянства, якія абараняюць Украіну ад расійскай агрэсіі, атрымаць від на часовае пражыванне, дазвол на іміграцыю або атрымаць грамадзянства Украіны. Такое ж права атрымаюць і іх сем'і.

• Украінскі Генштаб агучыў прыкладныя страты РФ па стане на раніцу 20 жніўня:

асабовага складу — каля 601 800 (+1330) чалавек, танкаў — 8518 (+5), баявых браніраваных машын — 16 521 (+26), артылерыйскіх сістэм — 17 156 (+52), РСЗА — 1166 (+1), сродкаў СПА — 926 (+1), БПЛА аператыўна-тактычнага ўзроўню —13 864 (+55), крылатых ракет — 2438 (+1), аўтамабільнай тэхнікі і аўтацыстэрнаў  — 23 142 (+95), спецыяльнай тэхнікі — 2885 (+22).

• Уладзімір Зяленскі ў вячэрнім відэазвароце анансаваў узмацненне СПА: “Адпаведнае пытанне абмеркавалі сёння з партнёрамі”. 

Акрамя таго, прэзідэнт Украіны распавёў, што заслухаў даклад Сырскага: «Фронт. Абарона на Пакроўскім і Тарэцкім напрамках. Складаная сітуацыя, але хлопцы робяць усё, каб знішчаць акупанта. Таксама галоўнакамандуючы далажыў і аб абнаўленнях на Курскім кірунку. Мы дасягаем пастаўленых мэтаў. І прыярытэт, па-ранейшаму, — гэта папаўненне абменнага фонду для Украіны».

• Украіна тэрмінова запрасіла ў NАТО цяжкую будаўнічую, інжынерную і медыцынскую тэхніку, паведаміў еўраатлантычны каардынацыйны цэнтр. У прыватнасці, Украіна просіць перадаць 17 гусенічных і дзесяць колавых цяжкіх экскаватараў, 30 цягачоў з траламі для перавозкі грузаў вагой да 100 тон, 25 браніраваных санітарных машын, а таксама 27 пажарных машын.

Паводле BBC News, korrespondent.net, www.rbc.ua,  www.pravda.com.ua