Эстонія дазволіла ануляваць пашпарты натуралізаваных грамадзян, што ваююць на баку Расіі
Улады Эстоніі будуць пазбаўляць грамадзянства натуралізаваных грамадзян, што ваююць за Расію ва Украіне.
Адпаведныя папраўкі ў закон прыняў парламент Эстоніі, піша АФН.
За прыняцце закона прагаласавалі 52 члены парламента, супраць прагаласавалі 17.
Пазбаўленне пашпарта будзе адбывацца ў выпадку «ўваходжання чалавека ў дзяржаўную ці ваенную службу замежнай дзяржавы або ваеннай арганізацыі, калі такая служба звязана з пагрозай грамадскаму парадку ці нацыянальнай бяспецы Эстоніі».
Згодна з законам, урад таксама можа ануляваць атрыманае шляхам натуралізацыі эстонскае грамадзянства, калі грамадзянін быў асуджаны за злачынствы супраць чалавечнасці або агрэсіі.
Пры гэтым паводле закона ўрад мае права не пазбаўляць эстонскага грамадзянства, калі служба чалавека ў замежнай дзяржаве не пагражае бяспецы Эстоніі.
У той жа час дзяржава не рэкамендуе эстонскім грамадзянам ваяваць за любую замежную дзяржаву, паколькі не можа гарантаваць абарону эстонскіх грамадзян у зоне ваенных канфліктаў.