Расія зрабіла яшчэ адзін крок да ўвядзення ў краіне ваеннага становішча
На пяты год вайны ў Маскоўскай вобласці ўсё ж такі вырашыліся апублікаваць карту бамбасховішчаў. Раней улады рэгіёна казалі, што даныя пра гэтыя аб’екты давядуць да насельніцтва толькі «ў перыяд мабілізацыі ці ў ваенны час». А Трамп усё думае над перадачай Украіне ліцэнзій для вытворчасці Patriot. Ідуць 1619-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 269 баявых сутыкненняў, паведамляе Генштаб УСУ ў ранішняй зводцы 31 ліпеня.
На Канстанцінаўскім кірунку расійцы здзейснілі 45 атак у раёнах Канстанцінаўкі, Іллінаўкі, Тарэцкага, Русінага Яру, Сафіеўкі і ў бок Сцяпанаўкі, Доўгай Балкі, Вольнага.
На Пакроўскім кірунку абаронцы Украіны спынілі 35 штурмаў расіян ў раёнах Новааляксандраўкі, Котліна, Удачнага, Новамікалаеўкі, Маладзецкага і ў бок Біліцкага, Шаўчэнкі, Мірнага, Мураўкі, Новапаўлаўкі і іншых.
На Славянскім кірунку расійцы штурмавалі 22 разы ў раёнах Закітнага, Крывой Лукі, Рэзнікоўкі і ў бок Піскуноўкі, Рай-Аляксандраўкі і Мікалаеўкі.
На Ліманскім кірунку армія РФ 17 разоў спрабавала прасунуцца ў бок Дзібровы, Ставак, Лімана, Дробышава, Азёрнага і інўых.
На Гуляйпольскім кірунку войскі РФ здзейснілі 13 атак у бок Уздвіжаўкі, Косіўцава, Горкага, Цвятковага і Чароўнага.
На Купянскім кірунку адбылося дзевяць боесутыкненняў.
* * *
У ноч на 31 ліпеня Расія атакавала Украіну 255 ударным БпЛА тыпу Shahed (у тым ліку рэактыўнымі), «Гербера», «Італмас» і дронамі-імітатарамі тыпу «Пародыя». Супрацьпаветранай абаронай збіта/задушана 195 БпЛА на поўначы, поўдні і ўсходзе краіны.
У Кралавецкай грамадзе Сумскай вобласці расійскі дрон рэактыўнага тыпу нанёс удар па грамадзянскай інфраструктуры: шэсць чалавек атрымалі раненні.
У пятніцу раніцай расіяне атакавалі БПЛА паштовы тэрмінал у прыгарадзе Харкава.
У расійскім Валгаградзе беспілотнікі нанеслі ўдар па размеркавальным цэнтры Wildberries у Валгаградзе і НПЗ «Лукойл-Валгаграднафтаперапрацоўка».
Па даных The Guardian, падчас адной з расійскіх атак на Кіеў на мінулым тыдні балістычная ракета трапіла ў амерыканскае прадпрыемства па вытворчасці дронаў кампаніі Terminal Autonomy. Ніхто не пацярпеў. У публікацыі адзначаецца, што «гэта, мяркуючы па ўсім, першы выпадак, калі Масква ў ходзе вайны нацэлілася на амерыканскую кампанію».
* * *
* * *
Прэзідэнт ЗША Дональд Трамп заявіў, што яшчэ не вырашыў, ці дазволіць ён Украіне вырабляць ракеты-перахопнікі Patriot, чым паставіў пад сумненне, ці пагодзіцца Вашынгтон на адзін з галоўных прыярытэтаў Кіева, піша Financial Times.
Трамп заявіў, што «не ўпэўнены», ці дасць Вашынгтон Украіне ліцэнзію на вытворчасць ракет Patriot, дадаўшы, што «мы разглядаем гэта пытанне».
«Гэта надзвычай магутная зброя, і… мы павінны быць некалькі асцярожнымі наконт таго, каму мы даем ліцэнзію», — адзначыў ён.
Гэтыя каментары Трампа прагучалі ўсяго праз два дні пасля яго сустрэчы з прэзідэнтам Украіны Уладзімірам Зяленскім у Белым доме. Зяленскі назваў сустрэчу «ўдалай» і адзначыў, што лідары дзвюх краін абмеркавалі «вытворчасць перахопнікаў Patriot і некалькі іншых ідэй».
У пачатку ліпеня на саміце НАТА ў Турцыі прэзідэнт ЗША казаў, што Вашынгтон дасць Кіеву ліцэнзію на вытворчасць ракет Patriot.
«Сістэма супрацьпаветранай абароны Patriot мае вырашальнае значэнне для здольнасці Украіны перахопліваць расійскія балістычныя ракеты, накіраваныя на Кіеў і іншыя гарады. Пераканаць Трампа разгледзець магчымасць дазволу Кіеву на вытворчасць гэтых ракет — значнае дасягненне для Зяленскага», — піша FT.
* * *
Падчас удару па вёсцы Радужнае каля Крывога Рога, дзе загінула цэлая сям'я, расійскія войскі маглі ўпершыню амаль за год прымяніць паўночнакарэйскую балістычную ракету, паведамляе Reuters са спасылкай на дзве дасведчаныя крыніцы.
Адна з крыніц паведаміў, што ўкраінскія радары падчас атакі на Крыварожжа зафіксавалі два ракетныя сляды, характэрныя для паўночнакарэйскіх балістычных ракет малой далёкасці КН-23 або КН-24.
Канчатковы выснову пар тып ракеты павінны зрабіць пасля завяршэння экспертызы аскепкаў, знойдзеных на месцы ўдару. У той жа час крыніца Reuters заявіла, што ўжо цяпер упэўнена ў паўночнакарэйскім паходжанні зброі.
Суразмоўцы агенцтва казалі, што аднаўленне выкарыстання ракет КН-23 або КН-24 пасля працяглага перапынку можа сведчыць аб атрыманні Масквой новага запасу такога ўзбраення. Гэта азначае падрыхтоўку Расіі да ўзмацнення ракетных удараў па Украіне.
Ракеты КН-23 і КН-24 Расія пачала прымяняць супраць Украіны ў канцы 2023 года. Яны маюць вялікую далёкасць палёту і больш магутную баявую частку, чым расійскія ракеты «Іскандэр», аднак саступаюць па дакладнасці.
Крыніца Reuters адзначыла, што да гэтага апошні пацверджаны выпадак прымянення Расіяй паўночнакарэйскай ракеты быў зафіксаваны 8 жніўня 2025 года.
* * *
На пяты год вайны ўлады Маскоўскай вобласці пачалі публікаваць афіцыйныя карты хованак і бамбасховішчаў, піша The Moscow Times.
30 ліпеня на сайце Люберэцкай акругі з'явілася інтэрактыўная карта з сотнямі аб'ектаў — у Люберцах, Дзяржынскім, Кастрычніцкім і іншых населеных пунктах. Гаворка ідзе пра паглыбленыя памяшканні для абароны людзей у надзвычайных сітуацыях — падвалы шматкватэрных дамоў, падземныя паркінгі, паштовыя аддзяленні і іншыя збудаванні. Падобную карту апублікавала і адміністрацыя акругі Падольск, а раней такія даныя з'явіліся і на сайце Адзінцоўскай акругі.
Публікацыя карт супала з заявай уладальніка ўкраінскай кампаніі Fire Point Дзяніса Штылермана пра тое, што ўдары балістычнымі ракетамі па Маскве могуць пачацца ўжо ўвосень пасля заканчэння выпрабаванняў новай ракеты.
Маскоўская вобласць неаднаразова трапляла пад удары ўкраінскіх дронаў і ракет. Жыхары рэгіёна масава скардзіліся на поўную адсутнасць папярэджанняў і паветранай трывогі — пра набліжэнне дронаў расіяне даведваліся толькі сваімі вачыма.
Чыноўнікі адмаўляліся надаваць жыхарам інфармацыю аб сховішчах: тады ўлады заяўлялі, што даныя пра сховішчы давядуць да насельніцтва толькі «ў перыяд мабілізацыі і ў ваенны час».
* * *
Перамоўшчыкі прэзідэнта ЗША Дональда Трампа Стыў Уіткаф і Джарэд Кушнер прыбудуць у Кіеў у другой палове жніўня, паведамляе старэйшы карэспандэнт «Радыё Свабода» Алекс Раўфоглу ў Х.
Яны ўпершыню наведаюць Украіну і будуць удзельнічаць у мерапрыемствах, прысвечаных 35-й гадавіне незалежнасці Украіны. Пра гэта журналісту паведамілі дзве крыніцы, знаёмыя з планамі пасланцаў Трампа.