У Белгарадзе выкінулі на звалку цынкавыя труны. Мэр абурыўся

Расійскі МУС цяпер шукае супрацоўнікаў рытуальнай службы.

truny.jpg


Цынкавыя труны выкарыстоўваюць для адпраўкі загінулых ва Украіне расійцаў. Потым сваякі мяняюць іх на драўляныя, а цынкавыя ўтылізуюць на заводах ці ў крэматорыях. У Белгарадзе рытуальная служба вырашыла не «замарочвацца» і выкінула труны на звалку — разам з іконамі і поліэтыленавымі пакетамі. Мясцовыя жыхары выказалі сваё абурэнне супрацоўнікам расійскага Міністэрства ўнутраных спраў, і цяпер паліцыя шукае супрацоўнікаў рытуальнай службы, якія гэта зрабілі.
Мэр Белгарада Антон Іваноў таксама абурыўся такім непаважлівым стаўленнем да трунаў загінулых «герояў» і выступіў з заявай, у якой недвухсэнсоўна пагражаў «злачынцам»:
«Цяжка апісаць эмоцыі ад гэтага ўчынку. Ці ёсць сэрца ў гэтых людзей? Ці магчыма праяўляць такую страшную нядбайнасць у дачыненні да герояў, якія аддалі жыццё, абараняючы нас з вамі?
Паліцыя робіць усё магчымае, каб знайсці супрацоўнікаў рытуальнай службы, якія выкінулі на сметнік цынкавыя труны.
Абавязкова сустрэнуся з імі, калі іх знойдуць. Суд вырашыць, якое пакаранне яны могуць панесці па законе. Але ў першую чаргу гэтыя людзі больш ніколі не будуць удзельнічаць у цырымоніях развітання з нашымі загінулымі салдатамі».

Паводле звестак украінскага Генштаба, Расія страціла ў вайне ва Украіне каля 70 тысяч салдат. Пры гэтым кіраўніцтва РФ гэтыя лічбы адмаўляе.