У «ДНР» здзейснены замах на суддзю, які выносіў смяротныя прысуды палонным

У самаабвешчанай «ДНР» заявілі аб замаху на суддзю Аляксандра Нікуліна. Менавіта ён у чэрвені 2022 года вынес смяротныя прысуды тром замежным грамадзянам, якія ваявалі за Украіну, піша unian.net.

Удакладняецца, што пацярпелы атрымаў агнястрэльныя раненні, яму ўдалося выжыць. Нікуліна шпіталізавалі, зараз ён знаходзіцца ў цяжкім стане.

У чэрвені 2022 года гэты суддзя вынес смяротны прысуд тром замежным байцам, якія ваявалі за Украіну. Гаворка ідзе пра брытанцаў Шона Пінера і Эйдэна Асліна, а таксама грамадзяніна Марока Саадуна Брагіма.

Пасля гэтага ўпраўленне арганізацыі Аб'яднаных Нацый (ААН) па правах чалавека і ўся сусветная супольнасць асудзіла гэтыя смяротныя прысуды.

У верасні падчас вялікага абмену палоннымі ўсіх траіх добраахвотнікаў удалося вярнуць дадому.