Ва Украіне прадухіляюць экалагічную катастрофу: як цяпер выглядае былое Кахоўскае вадасховішча?
Дно былога Кахоўскага вадасховішча засеялі канюшынай і люцэрнай. Гэтым займаліся супрацоўнікі Нацыянальнага прыроднага парку «Каменская Сеч». Гэта павінна дапамагчы пазбегнуць пылавых бур, якія разносяць смяротна небяспечныя інфекцыі.
Дно Кахоўскага вадасховішча ў канцы чэрвеня. Фота «Мост»
На думку батаніка Алены Кірычок, з якой пагаварыў «Кедр», пасеў насення, асабліва бабовых, цалкам апраўданы.
«Пры засяванні дна вырашаецца некалькі праблем. Першая — гэта замацаванне грунту: абарона яго ад змываў у больш нізкія ўчасткі і ад стварэння прамоін у выглядзе аўрагавай сеткі, а таксама прадухіленне пылавых бур. Улічваючы, што ў дадзенай мясцовасці вецер можа дасягаць вялікай хуткасці, пылавыя буры — рэальная пагроза. Гэтая пагроза складаецца не толькі ў тым, што матэрыял будзе пераносіцца з адной мясцовасці ў іншую, але і ў тым, што ў склад глею могуць уваходзіць шкодныя рэчывы і элементы, а таксама мікраарганізмы, абложаныя і назапашаныя ў донных адкладах амаль за 70 гадоў існавання вадасховішча», — патлумачыла экспертка.
«Другая праблема — гэта палёгка праходжання першых этапаў сукцэсіі, аднаўлення расліннасці на аголеным дне. Нават калі ўлічыць, што канюшына і люцэрна не з’яўляюцца натыўнымі, роднымі відамі ў дадзенай мясцовасці, яны не з'яўляюцца агрэсіўнымі пустазеллямі і небяспечнымі раслінамі з пункту гледжання аховы здароўя чалавека. Люцэрна і канюшына — выдатныя сідэраты (зялёныя ўгнаенні — заўв.), якія паляпшаюць структуру і ўрадлівасць глебы, якія замацоўваюць грунт, а таксама гэта нядрэнныя канкурэнты для інтрадуцэнтаў (новы для дадзенага рэгіёну від, наўмысна ці выпадкова ўведзены чалавекам — заўв.). Потым, пасля натуральнага або штучнага засялення натыўных відаў, люцэрна і канюшына будуць выцесненыя», — кажа біялагіня.
Дно Кахоўскага вадасховішча цяпер. Фота Мінпрыроды Украіны.
Кірычок адзначыла, што мяркуючы па фатаграфіях, засеяна невялікая тэрыторыя, а астатнія ўчасткі пакуль зарастаюць тым, што прынёс вецер.
У чэрвені херсонскае выданне «Мост» апублікавала фатаграфіі высахлага Кахоўскага вадасховішча, на дне якога бачныя абломкі ракет.
Аб разбурэнні плаціны Кахоўскай ГЭС стала вядома ў ноч на 6 чэрвеня. З-за некантраляванага скіду вады з вадасховішча ў Херсонскай вобласці затопленымі апынуліся каля 320 квадратных кіламетраў тэрыторыі, затапіла больш за 50 населеных пунктаў па абодвух берагах Дняпра. Эвакуяваныя больш за 9000 чалавек, больш за сто мясцовых жыхароў загінулі.
Вадасховішча ў выніку катастрофы цалкам змялела, без вады засталіся арашальныя каналы, якія забяспечвалі вадой амаль 6 тысяч квадратных кіламетраў палёў, паведамляла «Бі-бі-сі».
Самога Кахоўскага вадасховішча больш няма. На месцы вадасховішча ўтварылася пустыня — ідэальнае месца для бактэрыяльных паразітаў. Найбольшыя рызыкі для людзей былі звязаныя з верагоднасцю заражэння халерай, брушным тыфам і сальманелай, лічаць эксперты.