У Расіі пачалі судзіць двух беларусаў. Іх вінавацяць у дыверсіі на чыгунцы
У Маскоўскім абласным судзе пачалося слуханне матэрыялаў крымінальнай справы аб дыверсіі, здзейсненай у чыгуначным дэпо Арэхава-Зуева. Паводле даных абвінавачання, ураджэнцы Беларусі Арцём Брэскі і Кірыл Басько па заданні СБУ падпалілі кабіну электравоза ВЛ 10.
Ілюстрацыйны здымак
За гэтую акцыю, паводле
матэрыялаў справы, яны атрымалі ад прадстаўніка ўкраінскай выведкі 65 тыс. расійскіх
рублёў (каля 700 долараў). Цяпер ім пагражае да 20 гадоў пазбаўлення волі, піша «Камерсант».
Працэс па крымінальнай справе ў дачыненні да Арцёма Брэскага і Кірыла Басько даручана весці суддзі Раману Ізмайлаву. У ходзе папярэдніх слуханняў, якія прайшлі ў канцы снежня 2023 года, адвакаты падсудных хадайнічалі аб разглядзе справы калегіяй з трох суддзяў — так, на думку абароны, будзе забяспечана максімальная аб'ектыўнасць. Пракурор не пярэчыў. Цікава, што разгляд матэрыялаў па справе ў судзе пачаўся роўна праз год пасля затрымання беларусаў.
Як гаворыцца ў крымінальнай справе, ураджэнцы Беларусі 19-гадовы Кірыл Басько і 20-гадовы Арцём Брэскі здзейснілі дыверсію 22 снежня 2022 года па ўказанні нейкага Юрыя, з якім маладыя людзі пазнаёміліся ў адным з тэлеграм-каналаў. Незадоўга да гэтага абодва фігуранты звольніліся з працы і мелі патрэбу ў грошах. Менавіта Юрый і прапанаваў ім грошы за пашкоджанне чыгуначных шляхоў або лакаматыва. За гэта заказчык паабяцаў фігурантам 65 тыс. руб., пасля таго як ён атрымае ад іх відэасправаздачу аб правядзенні акцыі.
Глядзіце таксама
Памеркаваўшы, абвінавачаныя, па матэрыялах справы, вырашылі падпаліць электравоз.
Для гэтага яны набылі каністру з бензінам. Позна ўвечары 22 снежня 2022 года, гаворыцца ў справе, хлопцы праніклі на тэрыторыю чыгуначнага дэпо Арэхава-Зуева. Спачатку, паводле дадзеных следства, яны паспрабавалі падпаліць электравоз звонку, абліўшы яго бензінам. Але з гэтай задумы нічога не выйшла. Тады фігуранты, паводле версіі следства, здолелі трапіць у кабіну машыністаў, разлілі бензін унутры і падпалілі яго. Усе падзеі яны знялі на відэа, якое адаслалі заказчыку Юрыю. Той не падмануў і пералічыў на паказаны выканаўцамі рахунак 65 тыс.
На гэтым, паводле дадзеных супрацоўнікаў ФСБ, маладыя людзі вырашылі не спыняцца. Праз некалькі дзён яны набылі ўжо дзве каністры з бензінам і схавалі іх у хостэле, дзе звычайна начавалі. Аднак небяспечную вадкасць выявіла прыбіральшчыца, якая паведаміла пра знаходку гаспадарам установы, а тыя — у паліцыю.
Маладыя людзі былі выяўленыя і затрыманыя аператыўнікамі спецслужбы на станцыі Масква-Курская.
Выданне адзначае, што Кірыл Басько і Арцём Брэскі віну прызналі адразу ж пасля затрымання. Паводле слоў іх адваката, абодва фігуранты актыўна супрацоўнічалі са следствам і распавялі ўсё, што ім было вядома аб заказчыку злачынства. Зрэшты, затрымаць апошняга наўрад ці магчыма, паколькі праваахоўнікі лічаць, што ён дзейнічаў, хутчэй за ўсё, з-за мяжы.