495-ты дзень вайны: 37 квадратных кіламетраў вызваленай тэрыторыі

Самае галоўнае, што адбылося на вайне да гэтай гадзіны — у нашай традыцыйнай падборцы.

Ранішняя зводка Генштаба УСУ. Галоўнае:

За мінулыя суткі расійскія войскі нанеслі ракетны і авіяцыйны ўдары па тэрыторыі Украіны, яны ужыўлі 12 крылатых і зенітных кіраваных ракет. Тры крылатыя ракеты збітыя сіламі СПА;

Расійскае войска таксама здзейсніла каля 60 абстрэлаў з рэактыўных сістэм залпавага агню;

На ліманскім, бахмуцкім, аўдзееўскім і мар'інскім напрамках працягваюцца цяжкія баі, за суткі там адбылося 39 баявых сутыкненняў;

Расейскія войскі здзяйснялі наступальныя дзеянні ў раёне гарадоў Аўдзееўка і Мар'інка, украінскія сілы адбілі атакі;

Авіяцыя УСУ нанесла 12 удараў па раёнах засяроджвання асабовага складу УС РФ. Падраздзяленні ракетных войскаў і артылерыі паразілі пункт кіравання, раён засяроджвання асабовага складу, 27 артылерыйскіх сродкаў і два сродкі СПА расійскіх сіл.

Паветраныя сілы УСУ ў ноч на 3 ліпеня зафіксавалі пускі 17 дронаў-камікадзэ «Шахед», 13 з якіх удалося збіць. Астатнія, як сцвярджаецца, не дасягнулі сваёй мэты. СПА працавала ў паўднёвых, усходніх і цэнтральных абласцях.

ФСБ паведаміла аб прадухіленні замаху на кіраўніка анексаванага Крыма Сяргея Аксёнава

Спецслужба адчыталася аб затрыманні расіяніна, завербаванага ўкраінскімі спецслужбамі. Ён, паводле версіі ФСБ, рыхтаваў замах на Аксёнава, перадае «Інтэрфакс».

Затрыманы - 1988 года нараджэння. Як сцвярджае ФСБ, ён прайшоў на тэрыторыі Украіны "курс навучання разведвальна-падрыўной дзейнасці, у тым ліку — навучанне мінна-выбухной справе".

«У чэрвені 2023 года агент замежнай спецслужбы прыбыў на тэрыторыю Рэспублікі Крым і прыступіў да падрыхтоўкі здзяйснення тэракту, які планаваў ажыццявіць шляхам падрыву легкавога аўтамабіля кіраўніка рэспублікі. Аднак давесці злачынны намер да канца падрыўнік не паспеў, бо пры канфіскацыі са схованкі выбуховага прыстасавання ён быў затрыманы», — гаворыцца ў паведамленні ФСБ.

Мінабароны Украіны паведаміла, што за тыдзень УСУ вызвалілі 37 квадратных кіламетраў тэрыторый

Такія звесткі прывяла намеснік міністра абароны Украіны Ганна Маляр.

Паводле яе слоў, дзевяць квадратных кіламетраў вызвалены на ўсходзе, дзе УСУ працягваюць наступаць на бахмуцкім напрамку, а расійскія войскі — на ліманскім, аўдзееўскім і мар'інскім напрамках.

Акрамя таго, за мінулы тыдзень УСУ вызвалілі 28,4 квадратных кіламетра тэрыторыі на паўднёвым напрамку.

«На поўдні Сілы абароны Украіны працягваюць вядзенне наступальнай аперацыі на мелітопальскім і бердзянскім кірунках, а менавіта: вялі наступальныя дзеянні на кірунках Новадараўка, Прытульнае; Новаданілаўка, Рабаціна; Навасёлкі, Старамайорскае, мелі поспех», — гаворыцца ў пасце Маляр.