588-мы дзень вайны. Ва Украіне загінулі беларускія добраахвотнікі з батальёна «Тэрор»

Вайна не абыходзіцца без стратаў: ва Украіне загінулі некалькі байцоў беларускага батальёна «Тэрор». У той жа час стала вядома, што расіяне самі «сяброўскім агнём» збілі ўласны суперсучасны самалёт-знішчальнік. Контрнаступ Украіны працягваецца.

Генеральны штаб УСУ ў ранішняй зводцы 4 кастрычніка паведаміў, што сілы абароны прасоўваюцца каля Кляшчэеўкі і Андрэеўкі Данецкай вобласці, а таксама ў раёне Рабоціна Запарожскай вобласці.

Узброеныя сілы працягваюць абараняцца на ўсходзе і поўдні Украіны, а таксама наступаюць на Мелітопальскім і Бахмуцкім напрамках, вызваляюць часова акупаваныя тэрыторыі, замацоўваюцца на дасягнутых рубяжах. За мінулыя суткі на фронце адбылося 43 баявыя сутыкненні.

Інстытут вывучэння вайны (ISW) са спасылкай на расійскіх «ваенкораў» пацвярджае, што ўкраінскія сілы паступова прасоўваюцца ў раёне Кляшчэеўкі і Андрэеўкі (10 км на поўдзень ад Бахмута), каб прарваць абарону РФ ля чыгункі. Ваенны блогер РФ заявіў 3 кастрычніка, што ўкраінскія сілы інтэнсіўна абстрэльваюць расійскія пазіцыі на перадавой ля Кляшчэеўкі, пакуль расійскія войскі не адступяць, дазваляючы ўкраінскім сілам прасунуцца.

Іншы «ваенкор» 3 кастрычніка пісаў, што ўкраінскія войскі атакавалі пазіцыі РФ на лініі Капані-Рабоціна-Вербавае і што там працягваюцца цяжкія баі. Расійскія і ўкраінскія сілы ўступілі ў баявыя дзеянні праз лінію фронту паблізу Рабоціна (10 км на поўдзень ад Арэхава).

* * *

Паводле звестак аналітыкаў ISW, расійскія войскі адчуваюць дэфіцыт кадравых вайскоўцаў для папаўнення баявых страт, таму спрабуюць прыцягнуць замежных добраахвотнікаў для службы ў ПДВ.

Адна з расійскіх крыніц 3 кастрычніка заявіла, што ў паветрана-дэсантных брыгадах РФ служаць добраахвотнікі з Непала. Акрамя таго, у ISW раней паведамлялі, што кубінскія добраахвотнікі таксама праходзяць службу ў 106-й дывізіі ПДВ расійскай арміі. Гэта значыць, расійскія вайскоўцы працягваюць вербаваць замежных добраахвотнікаў для службы ў адносна элітных, але, верагодна, дэградаваных пасля інтэнсіўных баёў падраздзяленнях паветрана-дэсантных войскаў.

* * *

Таксама спецыялісты ISW заўважылі, што міністр абароны Расіі Сяргей Шайгу падчас селектарнай нарады з вайсковым кіраўніцтвам адзначыў дзіўную групу расійскіх узброеных фармаванняў, што дзейнічаюць у заходнім кірунку Запарожскай вобласці.

Шайгу прыпісвае паспяховыя расійскія абарончыя аперацыі вакол Рабоціна і Вербава падраздзяленням 70-га гвардзейскага мотастралковага палка (58-я агульнавайсковая армія, Паўднёвая ваенная акруга), 56-й паветрана-дэсантнай брыгады, 56-й паветранай арміі (Паўднёвая ваенная акруга), 810-й брыгады марской пяхоты (Чарнаморскага флоту) і іншых. Аднак Шайгу не назваў тыя падраздзяленні, якім звычайна прыпісваюць утрыманне лініі Рабоціна-Вербава, у прыватнасці падраздзяленні 7-й дывізіі паветрана-дэсантных войскаў.

Паводле ацэнак ISW, гэта сведчыць, што баявыя магчымасці актыўных элементаў 7-й дывізіі ПДВ значна пагоршыліся, і што яны больш не могуць праводзіць контратакі ўздоўж украінскага прарыву на Арэхаўскім кірунку.

* * *

Расійскія войскі 3 кастрычніка абстралялі населеныя пункты Данецкай вобласці з танкаў і авіяцыі. У выніку варожых нападаў пацярпелі чатыры чалавекі.

У Крывым Рогу раніцай 4 кастрычніка прагрымелі выбухі. «Крывы Рог. Выбух. Нічога не здымаем і не выкладваем у Інтэрнэт. Будзьце асцярожныя, яшчэ хуткасныя ракеты ў нашым кірунку», — напісаў кіраўнік ваеннай адміністрацыі Крывога Рога Аляксандр Вілкул.

На працягу мінулага дня расійцы здзейснілі 15 абстрэлаў памежжа Сумскай вобласці, зафіксавана 79 выбухаў.

У расійскіх Бранску і Белгарадзе былі чутныя выбухі сёння ноччу, 4 кастрычніка. Улады заявілі аб працы СПА. Па словах відавочцаў, у абодвух гарадах выбухі звязаныя з атакай дронаў, іх тып і колькасць невядомыя. Расійцы заявілі, што беспілотнік нібыта атакаваў вайсковую частку ў Карачаве Бранскай вобласці ўначы 4 кастрычніка.

У Мінабароны Расіі заявілі, што ўвечары 3 кастрычніка знішчылі ля ўзбярэжжа Крымскага паўвострава ўкраінскую супрацькарабельную ракету «Няптун», у той жа час так званы «губернатар» Севастопаля Міхаіл Разважаеў напісаў пра збіццё беспілотніка.

* * *

* * *

Мінабароны Брытаніі ў Twitter паведамляе, што расійская СПА збіла ўласны знішчальнік Су-35 у раёне акупаванага Такмака Запарожскай вобласці. Гэта адзін з самых сучасных самалётаў Расіі.

«28 верасня 2023 года расійскія сілы супрацьпаветранай абароны, імаверна, збілі адзін з уласных шматмэтавых баявых самалётаў Су-35С FLANKER M над Такмаком, прыкладна за 20 км ззаду бягучай лініі фронту», — гаворыцца ў паведамленні.

Як адзначае выведка, Расія з пачатку поўнамаштабнага ўварвання ва Украіну страціла блізу 90 самалётаў з нерухомым крылом. Інцыдэнт пад Такмаком быў пятай стратай Су-35, які лічыцца самым сучасным расійскім знішчальнікам.

У выведцы дадалі, што Такмак добра ўмацаваны акупантамі, там знаходзіцца расійскі штаб. «Гэтыя штабы, як правіла, абараняюцца адмысловымі сістэмамі СПА малой і сярэдняй далёкасці. Амаль напэўна яны знаходзяцца ў вельмі высокім стане гатоўнасці, паколькі Украіна працягвае наносіць эфектыўныя глыбокія ўдары па такіх месцах», — падкрэслілі разведчыкі.

* * *

Умовы надвор'я не будуць перашкаджаць украінскім вайскоўцам працягваць наступальныя дзеянні яшчэ каля паўтары-двух месяцаў, лічыць каардынатар Савета нацыянальнай бяспекі Белага дома Джон Кірбі. Па словах амерыканскага чыноўніка, надвор'е не стане перашкаджаць наступу ваенных УСУ яшчэ на працягу 6-8 тыдняў.

* * *

NATO разглядае магчымасць агрэсіі РФ супраць краіны-чальца, распавёў кіраўнік вайсковага камітэта NATO адмірал Роб Баўэр на Варшаўскім форуме бяспекі. У ходзе саміту ў Літве прадстаўнікі краін NATO абмеркавалі план у выпадку нападу Расіі, і ў сувязі з гэтым альянс павялічыў колькасць сіл хуткага рэагавання да 300 тысяч вайскоўцаў, здольных да разгортвання на працягу першага месяца.

«NATO мяркуе, што найбольшую пагрозу для яго ўяўляюць Расія і тэрарыстычныя групоўкі. Лідары Альянсу ўзгаднілі адпаведныя рэгіянальныя планы па стрымліванні пагроз», — паведаміў Роб Баўэр.

Паводле яго слоў, было вырашана павялічыць баявыя групы на ўсходнім флангу да васьмі, чатыры з іх узмацнілі да брыгаднага ўзроўню.