614-ты дзень вайны. УСУ перасоўваюцца праз Дняпро, Расія мяняе камандаванне

Вайна ва Украіне застыла ў пазіцыйнай фазе. Але Сілы абароны Украіны працягваюць пакрысе вызваляць сваю зямлю. Расійскія войскі па-ранейшаму наносяць удары па цывільнай інфраструктуры, і з-за пэўных поспехаў Украіны мяняюць камандаванне.

Генеральны штаб УСУ ў ранішняй зводцы 30 кастрычніка паведаміў, што УСУ паспяхова трымаюць абарону на ўсходзе і поўдні, а таксама працягваюць штурмавыя дзеянні на поўдзень ад Бахмута і наступ на Мелітопальскім кірунку. За мінулыя суткі на фронце адбылося каля 60 баявых сутыкненняў.

На Бахмуцкім кірунку расійскія войскі беспаспяхова спрабавалі аднавіць страчанае становішча ў Андрэеўкі. У той жа час Сілы абароны працягваюць штурмавыя дзеянні на поўдзень ад Бахмута, наносяць ворагу страты ў жывой сіле і тэхніцы, замацоўваюцца на дасягнутых рубяжах.

У зоне адказнасці АСГВ Таўрыя на Аўдзееўскім кірунку вораг не пакідае спробаў акружыць Аўдзееўку, аднак УСУ ўстойліва трымаюць абарону. Беспаспяховымі былі наступальныя дзеянні праціўніка ў раёнах населеных пунктаў Новакалінава, Аўдзееўка, Доследная, Першамайскае Данецкай вобласці, тут адбітыя дзесяць нападаў.

На Мар'інскім кірунку акупанты здзейснілі беспаспяховыя штурмавыя дзеянні ў раёнах Мар'інкі і Наваміхайлаўкі Данецкай вобласці, украінская армія адбіла 20 нападаў.

На Запарожскім кірунку праціўнік пяць разоў спрабаваў аднавіць страчанае становішча ў раёне Рабоціна Запарожскай вобласці, поспеху не меў.

* * *

Інстытут вывучэння вайны (ISW) адзначае, што УСУ працягваюць вядзенне наступальных і абарончых дзеянняў на некалькіх напрамках. Геалакацыйныя кадры, апублікаваныя 29 кастрычніка, паказваюць, што ўкраінскія войскі прасоўваліся на ўсход ад чыгуначнай лініі на поўдзень ад Андрэеўкі (10 км на паўднёвы захад ад Бахмута).

Расійскі «ваенкор» заявіў, што войскі РФ рыхтуюцца атакаваць Аўдзееўскі коксахімічны завод непасрэдна на поўнач ад горада. Падобна на тое, рускія войскі засяродзілі значную частку сваёй баявой сілы вакол Аўдзееўкі. Прадстаўнік Таўрычаскай групоўкі войскаў УСУ палкоўнік Аляксандр Штупун 29 кастрычніка заявіў, што Расія цяпер мае 40 тысяч асабовага складу на Аўдзееўскім кірунку і перакульвае туды дадатковыя сілы.

ISW рэгулярна ацэньвае, што расійскія вайсковыя падраздзяленні, імаверна, увогуле неўкамплектаваныя і могуць быць батальёнамі, брыгадамі або палкамі толькі пад назвай з меншай колькасцю асабовага складу, чым мяркуецца ў іх эшалонах.

У расійскім батальёне «Усход» скардзіліся, што ўкраінскія сілы ўначы з 28 на 29 кастрычніка інтэнсіўна абстралялі пазіцыі акупантаў у раёне мяжы Данецка-Запарожскай абласцей.

Расійскі «ваенкар» сцвярджаў, што ўкраінскім войскам удалося ўсталяваць устойлівы кантроль над некаторымі нявызначанымі расійскімі пазіцыямі на Запарожскім кірунку і пашырыць наступальныя дзеянні бліжэй да Несцяранцы, Капані і Новафедараўцы на мінулым тыдні. Ён дадаў, што ўкраінскія сілы таксама спрабавалі прасунуцца ў напрамку Новапракопаўкі і Вербавага.

Расійскі ваенны блогер сцвярджаў, што расійскія войскі нібыта перахапілі ўкраінскі дэсант у раёне Дачы (10 км на паўднёвы захад ад Херсона). Іншы расійскі «ваенкар» сцвярджаў, што ўкраінскія сілы фарсіруюць Днепр групамі ад 50 да 70 чалавек па трох напрамках.

* * *

* * *

Таксама ISW піша, што Пуцін, верагодна, замяніў генерал-палкоўніка Алега Макарэвіча, які кіраваў групоўкай «Днепр» на камандуючага ПДВ генерал-палкоўніка Міхаіла Цяплінскага.

Мінабароны Расіі на момант публікацыі не абвясціла і не пацвердзіла інфармацыю аб звальненні Макарэвіча і наўрад ці зробіць гэта, улічваючы тэндэнцыю рэгулярна хаваць рэзанансныя змены ваеннага камандавання. Адзін расійскі блогер заявіў, што Пуцін адправіў Макарэвіча ў адстаўку падчас свайго нядаўняга візіту ў штаб Паўднёвай вайсковай акругі ў Растове-на-Доне 19 кастрычніка.

Крамлёўскі вайсковы блогер сцвярджаў, што чуткі аб звальненні Макарэвіча з'явіліся на мінулым тыдні і што ягоная адстаўка «даўно наспела» праз ягонае кіраванне вайсковай сітуацыяй на Херсонскім кірунку.

Паведамленне аб звальненні Макарэвіча паказвае на тое, што Крэмль або расійскае вайсковае камандаванне могуць быць дастаткова заклапочаныя і скептычна настроеныя адносна ягонай здольнасці адбіць нядаўнюю больш маштабную, чым звычайна, наземную аперацыю Украіны на ўсходнім (левым) беразе Херсонскай вобласці.

Адзін вайсковы блогер заявіў, што ўкраінскія «плацдармы» на ўсходнім беразе Херсонскай вобласці ствараюць небяспечны прэцэдэнт, і што расійскія войскі пад камандаваннем Макарэвіча не змаглі адэкватна супрацьстаяць украінскім пагрозам і адказваць на іх.

* * *

У ноч на 30 кастрычніка расійскія войскі атакавалі Украіну 12 ударнымі БПЛА тыпу «Shahed» і двума кіраванымі авіяцыйнымі ракетамі Х-59 — усе яны знішчаныя.

Уначы 30 кастрычніка расійскія войскі абстралялі Херсон. Армія РФ атакавала Цэнтральны раён горада каля паўночы з часова акупаванага левага берага. Былі пашкоджаныя, у прыватнасці шматпавярхоўкі. Адна з кватэр у выніку траплення загарэлася, там загінула жанчына 85 гадоў, іншая пацярпелая з апёкамі і атручваннем прадуктамі гарэння дастаўлена ў бальніцу. Яшчэ двое жыхароў атрымалі раненні сярэдняй цяжкасці.

Раніцай 30 кастрычніка ў акупаваным Севастопалі пачуліся гучныя залпы. Акрамя гэтага заяўлялася, што рэйд праз бухту перакрыты. Пазней з'явілася і інфармацыя аб перакрыцці Крымскага моста. Прарасійскія ўлады ў Севастопалі заявілі, што дым у бухце — гэта нібыта «табельная маскіроўка», якую выкарыстоўваюць вайскоўцы.

* * *

Кіраўнік МЗС Украіны Дзмітрый Кулеба, каментуючы цяперашні форум на Мальце, адзначыў, што цяпер украінскую формулу свету падтрымліваюць 66 дзяржаў, у тым ліку і краіны «глабальнага Поўдня».

«Звярніце ўвагу: за паўгода з інфополя зніклі шматлікія “мірныя” ініцыятывы, якія прапаноўвалі Украіне то адмовіцца ад тэрыторый, то нешта абмяняць, то яшчэ нейкія непрымальныя рэчы», — адзначыў Кулеба.

Ён дадаў, што цяпер у цэнтры ўсіх дыскусій «справядлівая і сумленная ўкраінская формула», якая цалкам адпавядае прынцыпам Статута ААН і ключавых рэзалюцый Генасамблеі.