ISW: У ліпені Расія ўжо выпусціла па Украіне больш балістычных ракет, чым вырабляе за месяц
Украіна ў адказ на расійскія ўдары балістыкай рыхтуе «новую стратэгію прымусу РФ да міру», кажа Уладзімір Зяленскі. Пры гэтым РФ «залезла ў скарбонку», бо кідае на Украіну больш ракет, чым стварае. А ў ЗША Дональд Трамп гатовы падпісаць «пякельныя санкцыі» Ліндсі Грэма не толькі да РФ, алеі да яе саюзніка — Ірана. Ідуць 1608-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 235 баявых сутыкненняў, паведамляе Генштаб УСУ ў ранішняй зводцы 20 ліпеня.
На Пакроўскім кірунку абаронцы Украіны спынілі 30 штурмаў расіян у раёнах Тарэцкага, Шахава, Удачнага, Філіі, Грышына і ў бок Кучарава Яру, Новага Данбасу, Мірнага, Біліцкага і іншых.
На Славянскім кірунку расійцы штурмавалі 27 разоў у раёнах Закітнага, Крывой Лукі, Рэзнікоўкі і ў бок Піскуноўкі і Рай-Аляксандраўкі.
На Ліманскім кірунку армія РФ 26 атакавала ў раёнах Новаміхайлаўкі, Дробышава, Навасёлаўкі, Грэкаўкі і ў бок Шыйкаўкі, Ставак, Лімана і Азёрнага.
На Канстанцінаўскім кірунку расійскія войскі здзейснілі 24 атакі ў раёнах Канстанцінаўкі, Іллінаўкі, Іванаполля, Сцяпанаўкі і ў бок Паўлаўкі.
На Гуляйпольскім кірунку расіяне здзейснілі 21 атаку ў раёне Чыгуначнага і ў бок Дабраполля, Цвятковага, Уздвіжаўкі, Горкага.
На Паўднёва-Слабажанскім кірунку расійцы 14 разоў атакавалі каля Гоптаўкі, Лімана, Старыцы і Прыліпак.
* * *
У ноч на 20 ліпеня Расія атакавала Украіну двума кіраванымі авіяцыйнымі ракетамі Х-59/69 і 94 ударнымі БпЛА тыпу Shahed (у тым ліку рэактыўнымі), «Гербера», «Італмас», баражуючымі баепрыпасамі «Бандэроль» і дронамі-імітатарамі тыпу «Пародыя». Супрацьпаветранай абаронай збіта/задушана 81 БпЛА, адна ракета не дасягнула сваёй мэты.
Расіяне нанеслі ракетны ўдар па грамадзянскім судне пад сцягам Гвінеі-Бісау ў Чорным моры ля берагоў Адэсы. 6 маракоў з судна загінулі, яшчэ 4 лічацца зніклымі без вестак. На караблі GOLDEN LEO пад сцягам Гвінеі-Бісау знаходзіліся 17 грамадзян Сірыі і Індыі, а таксама грамадзянін Украіны — лоцман, ён загінуў.
Раніцай 20 ліпеня расійскія войскі нанеслі ракетны ўдар па Адэсе, у выніку чаго быў пашкоджаны аб’ект інфраструктуры.
Раніцай 20 ліпеня расійскія беспілотнікі атакавалі Мікалаеўскую і Палтаўскую вобласці: у Мікалаеве пашкоджаны два будынкі АЗС, шматпавярховы дом. У Палтаўскай вобласці — прамысловае прадпрыемства. Па папярэдніх даных, без пацярпелых.
* * *
* * *
З пачатку ліпеня Расія выпусціла па Украіне больш балістычных ракет, чым, па наяўных даных, вырабляе за месяц, паведамляе амерыканскі Інстытут вывучэння вайны (ISW). Эксперты мяркуюць, што Масква выкарыстоўвае назапашаную зброю.
Аналітыкі пішуць, што толькі ў ліпені Расія выкарыстала да дзвюх трацін планаванай гадавой вытворчасці ракет «Цыркон». Акрамя таго, у гэтым месяцы РФ запусціла больш балістычных ракет, чым складае яе заяўлены месячны аб’ём вытворчасці.
Згодна са справаздачамі ўкраінскіх Ваенна-паветраных сіл, з пачатку ліпеня Расія прымяніла супраць Украіны 107 балістычных ракет і 20 ракет «Цыркон». Па даных Галоўнага ўпраўлення разведкі Украіны, Расія штомесяц вырабляе каля 60 балістычных ракет «Іскандэр-М» і яшчэ 40 ракет для комплексаў С-400.
«Падобна, Расія звяртаецца да сваіх запасаў, каб і ў далейшым павялічваць колькасць балістычных ракет, якія яна запускае па Украіне, паколькі гэтыя ракеты маюць больш высокі ўзровень паспяховасці, чым беспілотнікі і крылатыя ракеты», — адзначаюць у ISW.
У той жа час, па даных аналітыкаў, расійскія войскі скарацілі колькасць дронаў у начных атаках: з пачатку ліпеня яны прымянілі 2955 беспілотнікаў супраць 5749 у чэрвені.
* * *
Украіна рыхтуе новую стратэгію прымусу РФ да міру, заявіў прэзідэнт Украіны Уладзімір Зяленскі ў звароце да ўкраінцаў у нядзелю, 19 ліпеня. Ён анансаваў ключавыя перамовы па далейшай стратэгіі прымусу Расіі да міру на панядзелак, 20 ліпеня.
Зяленскі адзначыў, што расіяне робяць галоўную стаўку на балістычныя ракеты, і менавіта ракетны тэрор дазваляе Крамлю падтрымліваць ілюзію сваёй сілы.
«Менавіта на балістыку Расія робіць стаўку, і дзякуючы балістыцы Пуцін да гэтага часу працягвае верыць у сваю вайну», — адзначыў кіраўнік Украіны.
Прэзідэнт Украіны заклікаў дыпламатаў і ўрадавых чыноўнікаў максімальна паскорыць перадачу ўжо ўзгодненых пакетаў дапамогі ад ЗША і еўрапейскіх партнёраў, бо ракеты для СПА неабходныя штодня.
* * *
Прэзідэнт ЗША Дональд Трамп настойвае, каб рэспубліканцы пашырылі законапраект аб санкцыях супраць Расіі, уключыўшы туды абмежаванні супраць Ірана, напісаў ён у соцсетцы Truth Social.
Па словах Трампа, нябожчык сенатар і суаўтар законапраекта Ліндсі Грэм збіраўся ўключыць туды Тэгеран. Ён таксама адзначыў, што дадаванне Ірана да дзеючага антырасійскага санкцыйнага пакета з’яўляецца крытычна важным крокам, які павінен быў адбыцца ўжо даўно.
«Рэспубліканцы павінны дадаць Іран да законапраекта аб санкцыях супраць Расіі. Менавіта гэта хацеў зрабіць Ліндсі, і гэта павінна было здарыцца», — напісаў кіраўнік Белага дома.
Трамп раней заяўляў, што законапраект аб санкцыях супраць РФ, распрацаваны сенатарамі Ліндсі Грэмам і Рычардам Блюменталем, будзе прыняты і ён яго падпіша ў гонар Грэма. Але, па словах прэзідэнта ЗША, да гэтага законапраекта трэба дадаць санкцыі супраць Ірана і Хезбалы.
* * *
Украіна паступова мяняе сітуацыю ў Чорным і Азоўскім морах, пытаючыся зрабіць утрыманне акупаванага Крыма ўсё больш складаным для Расіі, піша выданне The iPaper, адзначаючы, што Кіеў наносіць удары па расійскіх судах і парушае ключавыя лагістычныя маршруты Крамля.
Па даных журналістаў, украінскія беспілотнікі атакуюць расійскія танкеры і іншыя суды, якія выкарыстоўваюцца для перавозкі нафты і нафтапрадуктаў. З-за гэтага Масква была вымушана абмежаваць рух судоў каналам Дон — Азоў, які злучае ўнутраныя водныя шляхі Расіі з Азоўскім і Чорным морамі, а таксама спыніць выкарыстанне Керчанскага праліва, які аддзяляе акупаваны Крым ад Расіі.
«Гэтыя ўдары аказаліся надзвычай паспяховымі. За апошнія некалькі тыдняў Украіна нанесла ўдары па больш чым 100 судах у марскім калідоры, які праходзіць глыбока за расійскімі лініямі абароны», — заявіў навуковы супрацоўнік Савета па геастратэгіі ў Лондане Уільям Фрыр.
Па яго словах, паток перавозак у Азоўскім моры скараціўся больш чым удвая ў параўнанні з папярэднімі паказчыкамі. А расійскія страхавыя кампаніі пачалі адмаўляцца страхаваць судны ў рэгіёне ад ваенных рызык, што можа яшчэ больш ускладніць працу расійскага флоту.
Аналітыкі лічаць, што гэтыя атакі з’яўляюцца часткай больш шырокай кампаніі па стварэнні праблем для расійскай ваеннай інфраструктуры ў Крыме. Гаворка ідзе не толькі пра марскія маршруты, але і пра ўдары па чыгуначных і аўтамабільных шляхах, партах, нафтаперапрацоўчых прадпрыемствах і іншых аб’ектах, якія забяспечваюць армію РФ.
«Украіна спрабуе зрабіць абарону Крымскага паўвострава немагчымай», — адзначыў кіраўнік даследаванняў у сферы абароны і бяспекі RAND Europe Джэйкаб Паракілас.