«Мяснік Марыупаля» стаў намеснікам Шайгу ў Мінабароны РФ

Намеснікам міністра абароны РФ па тыле прызначылі генерала Мізінцава. Ва Украіне і на Захадзе яго называюць «мясніком Марыупаля».

Начальнік Нацыянальнага цэнтра кіравання абаронай РФ генерал-палкоўнік Міхаіл Мізінцаў прызначаны намеснікам міністра абароны, адказным за матэрыяльна-тэхнічнае забеспячэнне Узброеных Сіл.

Раней гэтую пасаду займаў генерал арміі Дзмітрый Булгакаў, яго перавялі на іншую працу, гаворыцца ў прэс-рэлізе МО РФ.

Міхаіл Мізінцаў разам з кіраўніком прэс-службы Мінабароны Ігарам Канашэнкавым рэгулярна выступаў з заявамі для прэсы падчас вайны ва Украіне.

Расія яшчэ да пачатку вайны запланавала знішчэнне Марыупаля і генацыд жыхароў?

Паводле шматлікіх крыніц, менавіта Мізінцаў вясной кіраваў аблогай Марыупаля, у выніку чаго за ім замацавалася мянушка «мяснік Марыупаля». У той час украінскі горад падвяргаўся моцным бамбаванням, у выніку чаго фактычна быў разбураны. Таксама расійцы скідвалі бомбы на марыупальскі драмтэатр і радзільню.