У Маскве падчас развітання з Міхаілам Гарбачовым паліцыянты зладзілі «хапун»

У Маскве ў чарзе на цырымонію развітання з першым прэзідэнтам СССР Міхаілам Гарбачовым у Калоннай зале Дома саюзаў паліцыя затрымала пяць чалавек. Пра гэта паведамляе «ОВД-Инфо».

Паліцыянты пачулі, як нехта ў чарзе крытыкаваў сілавікоў, і сталі шукаць чалавека, які гэта казаў. Неназваны прапаршчык папрасіў дакументы ў адной з жанчын, яна дала яму сваё пенсійнае пасведчанне. Калі яна папрасіла вярнуць дакумент, яе затрымалі.

Таксама прапаршчык «убачыў побач пажылую жанчыну са значком "Не вайне" і загадаў свайму калегу затрымаць і яе». Пазней была затрымала яшчэ адна жанчына з такім жа значком.

«Што, вы, смелыя, тут крычалі, а цяпер баіцеся нам слова сказаць? Мы забярэм бабулю, а вы прызнавайцеся, хто гэта крыкнуў», — звярнуўся сілавік да тых, хто стаіць у чарзе.

Адзін мужчына папрасіў паліцэйскіх не затрымліваць пажылую жанчыну. У адказ на гэта прапаршчык даручыў і гэтага чалавека адвезці ў паліцэйскі аддзел.

Усіх затрыманых ужо адпусцілі. На жанчын з антываеннымі значкамі склалі адміністрацыйныя пратаколы аб «дыскрэдытацыі расійскага войска».

Таксама ў чарзе затрымалі жанчыну Паліну Панову з-за значка «Не вайне». Яе адвезлі ў пастарунак.

3 верасня ў Калоннай зале Дома саюзаў прайшла цырымонія развітання з першым прэзідэнтам СССР Міхаілам Гарбачовым, памерлым 30 жніўня. Развітацца з ім прыйшлі нобелеўскі лаўрэат і галоўны рэдактар «Новай газеты» Дзмітрый Муратаў, намеснік старшыні Савета бяспекі РФ Дзмітрый Мядзведзеў, прэм'ер-міністр Венгрыі Віктар Орбан, пасол ЗША ў Расіі Джон Саліван, тэлевядучыя Дзмітрый Кісялёў і Уладзімір Познер.

Гарбачова пахавалі на Новадзявочых могілках у Маскве ў радавым пахаванні побач з жонкай Раісай.