Беларускім шляхам. Легіён «Свабода Расіі», які ваюе за Украіну, прызнаны ў РФ тэрарыстычнай арганізацыяй
Вярхоўны суд РФ 16 сакавіка абвясціў «тэрарыстычным» легіён «Свабода Расіі» — падраздзяленне УСУ, якое складаецца, як сцвярджаецца, з расійскіх добраахвотнікаў. У Беларусі беларускія добраахвотнікі, што ваююць ва Украіне, названы «экстрэмісцкім фарміраваннем».
Вярхоўны Суд РФ абвясціў «тэрарыстычнай арганізацыяй» падраздзяленне Узброеных сіл Украіны, вядомае як легіён «Свабода Расіі».
Расійскі суд задаволіў пазоў Генеральнай пракуратуры РФ і забараніў дзейнасць легіёна на тэрыторыі РФ, паведамляе «Інтэрфакс».
Нагадаем, легіён «Свабода Расіі» — падраздзяленне Узброеных сіл Украіны, у якім, як сцвярджаецца, ваююць добраахвотнікі з Расіі. Колькі чалавек у яго ўваходзяць, невядома. Пра яго стварэнне абвясцілі ў сакавіку 2022 года, неўзабаве пасля поўнамаштабнага ўварвання Расіі ва Украіну.
У матэрыялах справы, якія прыводзяць «Інтэрфакс» і ТАСС, сказана, што легіён «Свабода Расіі» «сфарміравалі па загадзе прэзідэнта Украіны Уладзіміра Зяленскага з ліку грамадзян РФ з мэтай яго далейшага выкарыстання для звяржэння дзейнай улады і падрыву асноў канстытуцыйнага ладу, учыненне тэрактаў на тэрыторыі Расіі».
Па даных РАПСІ, у дачыненні да ўдзельнікаў і прыхільнікаў легіёна распачата не менш за 20 крымінальных спраў, у тым ліку па артыкулах аб дзяржаўнай здрадзе, тэрарызме і дыверсіі.
Пасля рашэння Вярхоўнага Суда ўсім удзельнікам легіёна пагражае крымінальная адказнасць па артыкуле аб арганізацыі тэрарыстычнай супольнасці.
У студзені «Св*бода» выпусціла інтэрв'ю двух байцоў легіёна «Свабода Расіі». Са слоў аднаго з іх, мэта людзей у легіёне палягае ў тым, каб «адстаяць Украіну і потым вярнуцца ў Расію са зброяй у руках».
Сярод байцоў легіёна «Свабода Расіі» — былы віцэ-прэзідэнт «Газпрамбанка» Ігар Валабуеў, які з’ехаў з Расіі ва Украіну неўзабаве пасля расійскага ўварвання. Паводле версіі праваахоўных органаў РФ, легіён кансультаваў расійскі палітык Ілля Панамароў, які з'ехаў з Расіі ва Украіну праз крымінальны пераслед за «фэйкі».
У Беларусі беларускі Полк Каліноўскага — беларускае вайсковае фарміраванне ў складзе Нацыянальнай гвардыі Украіны — прызнаны «экстрэмісцкім фарміраваннем». Іван Кубракоў, міністр унутраных спраў Беларусі, у лістападзе мінулага года заявіў, што ўстаноўлены асобы амаль 160 беларусаў, якія ваююць ва Украіне.
Батальён імя Кастуся Каліноўскага быў створаны 9 сакавіка 2022 года. 26 сакавіка ён увайшоў у склад Узброеных сіл Украіны. 21 траўня было абвешчана пра яго трансфармацыю ў полк у складзе двух батальёнаў — «Волат» і «Тэрор». Пазней быў сфарміраваны трэці — «Літвін». Пасля «Тэрор» стаў асобным падраздзяленнем УСУ па-за складам палка Каліноўскага.
Паводле meduza.io, www.interfax.ru