«Гэта не наша вайна». Што паказала новае апытанне Chatham House

Аналітычны цэнтр Chatham House прадставіў новае даследаванне «Погляды беларусаў на ваенны канфлікт Расіі і Украіны». Апытанне праводзілася з 5 па 14 сакавіка 2022 года з дапамогай Інтэрнэт-інтэрв'ю (CAWI). У апытанні прынялі ўдзел 896 рэспандэнтаў, піша «Салідарнасць».

Некаторыя вынікі даследавання.

— У цэлым, можна канстатаваць падзел нашага грамадства па тым, які з бакоў яны падтрымліваюць у вайне ва Украіне, каго бачаць у выніку пераможцам ці, напрыклад, Беларусь з'яўляецца паўнапраўным удзельнікам канфлікту або не, — піша телеграм-канал «Каласы пад сярпом тваім». — Тут даволі выразна прасочваецца залежнасць ад крыніцы атрыманай інфармацыі пра канфлікт.

Але, нягледзячы на гэта, у грамадстве назіраецца абсалютны кансэнсус у пытанні паўнавартаснага ўдзелу Беларусі ў ваенных дзеяннях. Толькі 3% лічаць, што Беларусі варта было б уступіць у іх на баку Расіі. І здаецца, зусім не з-за таго, што дзяржаўны гімн пачынаецца са слоў пра мірных людзей.

Не вельмі папулярней і ідэя аб размяшчэнні на тэрыторыі Беларусі расійскай ядзернай зброі — тут прыхільнікам рэжыму не атрымліваецца выступіць адзіным фронтам у падтрымку гэтай ідэі. У два разы больш праціўнікаў размяшчэння ў нас расійскай вайсковай базы, чым яе прыхільнікаў.

Можна быць, калі заўгодна, прарасійскім, любіць Лукашэнку і / або Пуціна, але ваяваць незразумела за што — гэта міма. Можна выступаць за цеснае эканамічнае, культурнае і любое іншае супрацоўніцтва з РФ, але, як той казаў, сяброўства сяброўствам, а тытунец паасобку. Беларусам, нягледзячы на іх палітычныя погляды, чужа імперскае мысленне і вялікадзяржаўны шавінізм, для іх гэта чужая вайна.

Акрамя таго, прасочваецца разуменне нават аўдыторыяй дзяржаўных СМІ ўзаемасувязі паміж вайной і ростам коштаў, дэвальвацыяй рубля і дэфіцытам тавараў у бліжэйшыя месяцы. Гэта ў Расіі ў модзе футболкі з прынтамі пра «Іскандэры», якім смешна ад санкцый. Беларусы такога гумару не разумеюць.

Ці тое яшчэ будзе, калі гэтыя самыя санкцыі пачнуць наўпрост крытычна ўплываць на ўзровень жыцця простых грамадзян. Чакаць гэтага моманту засталося зусім нядоўга. І папулярнасці рэжыму Лукашэнкі гэта ніяк не дадасць.