На доме, дзе жыў Рыгор Барадулін, з’явілася мемарыяльная дошка

Напярэдадні святаў, 24 снежня, на доме па вуліцы Мележа,4, дзе з 1980 да 2014 года жыў і працаваў народны паэт Беларусі Рыгор Барадулін, з’явілася мемарыяльная дошка. На цырымоніі адкрыцця прысутнічалі дзясяткі людзей.

Сярод тых, хто ў гэты халодны дзень прыйшоў на адкрыццё памятнага знаку дзядзкі Рыгора, былі ягоныя сябры і паплечнікі паэты Удадзімір Някляееў і Міхась Скобла, мастакі Рыгор Сітніца і Аляксей Марачкін, журналіст Сяргей Шапран. Былі тут і кіраўнік Партыі БНФ Рыгор Костусеў, дачка пісьменніка Алеся Адамовіча Наталля, праваабаронца Андрэй Палуда, грамадская актывістка Наста Дашкевіч ды іншыя вядомыя асобы. 

Як распавёў ініцыятар і натхняльнік праекта паэт і арганізатар курсаў “Мова нанова”, сябар дзядзькі Рыгора Глеб Лабадзенка, мемарыяльная дошка ўзнікла дзякуючы высілкам звычайных грамадзянаў. “На яе збіралі грошы людзі, 145 чалавек ахвяравалі сродкі на гэтую дошку. І гэта вельмі важны момант, бо мы заўсёды кажам: чаму нам не робяць, чаму нам не вешаюць, чаму нам не адкрываюць, чаму не шануюць. А мы навошта, а мы дзеля чаго? Таму людзі, якія любяць Рыгора Барадуліна, сабраліся і зрабілі гэтую дошку”, — сказаў Глеб і прапанаваў адразу паказаць твор людзям, запрасіўшы для гэтага старшыню Беларускага саюза мастакоў Рыгора Сітніцу.

Аўтарам мемарыяльнай дошкі з’яўляецца скульптар Ігар Засімовіч, які стварыў і надмагільны помнік народнага паэта ў Вушачах. Дарэчы, помнік на магіле дзядзькі Рыгора быў адкрыты роўна два гады таму, 24 снежня 2015 года. Прысутныя віталі дошку воплескамі, а ў гэты час з магнітафона гучала песня ў выкананні самога Рыгора Іванавіча Барадуліна, што рабіла мерапрыемства яшчэ больш шчымлівы

Глеб Лабадзенка пасля адзначыў, што гэта не проста мемарыяльная дошка, але сапраўдны помнік вялікаму паэту сучаснае Беларусі. “І гэта помнік не толькі Рыгору Барадуліну, гэта помнік нашай годнасці, таму што вялікая тая нацыя, якая шануе сваіх герояў, і вялікая тая нацыя, якая адззячвае сваім героям пасля іх смерці”, — падкрэсліў выступоўца.

Жонка Рыгора Іванавіча Валянціна Міхайлаўна шчыра падзякавала ўсім тым, хто прыйшоў на адкрыццё мемарыяльнай дошкі, тым, хто рупіўся пра рэалізацыю праекта, тым, хто ахвяраваў грошы. Дарэчы, некаторыя жыхары дома былі вельмі здзіўленыя, што былі суседзямі вялікага беларускага паэта і нават не ведалі пра гэтае суседства. Адна жанчына больш сталага веку, угледзеўшыся ў дошку, згадала, што шмат разоў бачыла гэтага сціплага чалавека, які ці то хадзіў у краму, ці то проста прагульваўся, але нават не падазравала, што гэта сам Барадулін, імя якога ей было вельмі добра вядома.

Добрымі словамі народнага паэта ўзгадвалі Уладзімір Няклаеў і Рыгор Сітніца, Міхась Скобла і Аляксей Марачкін, Ігар Засімовіч. А сын Міхася Скоблы Вячка прачытаў верш Рыгора Барадуліна, прысвечаны ягонаму лепшаму сябру Васілю Быкаву.

Да слова, Глеб Лабадзенка паведаміў, што менавіта 24 снежня пачынаецца збор сродкаў на мемарыяльную дошку ў гонар Быкава. Ініцыятары чарговага праекта спадзяюцца, што і гэтым разам атрымаецца ажыццявіць задуманае, цяпер ужо ў дачыненні да народнага пісьменніка Беларусі.

А тым часам да мемарыяльнай дошкі Рыгора Барадуліна леглі першыя жывыя кветкі як сімвал таго, што памяць пра выбітнага беларуса жывая і будзе жыць доўга.