Выдавецтва «Янушкевіч» прэзентавала беларускі пераклад другой кнігі трылогіі «Валадар пярсцёнкаў» — «Дзве вежы»

Прэзентацыя прайшла ў кніжным клубе «Кнігаўка» ў Варшаве. Над кнігай працаваў паэт і перакладчык Ігар Кулікоў. Раман надрукаваны ў выдавецтве «Янушкевіч», і ўжо паступіў у продаж.

Ігар Кулікоў, які перастварыў на беларускую мову і першую частку трылогіі — «Брацтва пярсцёнка», з’яўляецца знаўцам санскрыту, стараісландскай і стараанглійскай моваў. У даробку перакладчыка — «Чытво» Чарлза Букоўскі, Першае кола Рыгведы, урыўкі з Магабгараты, «Ліст Ніґлатворы» Джона Р. Р. Толкіна, выбранае з Роберта Фроста. За пераклад «Стараангельскай паэзіі» Ігар быў адзначаны Прэміяй імя Карласа Шэрмана (узнагарода ўручаецца за найлепшы паэтычны пераклад). Аўтар шасці зборнікаў паэзіі — «Паварот на мора» (2011), «Свамова» (2013), «Сівер-гара» (2015), «Валадар загадак» (2017), «Храм ракі» (2019), «Вецер нішто і рэха цьмы» (2021). Праца над трылогіяй Дж. Р. Р. Толкіна, можна сказаць, падсумавала і злучыла паэтычны і перакладчыцкі досвед творцы.

На сустрэчы спадар Ігар распавёў, чаму ўсё ж немажлівы пераклад «Валадара пярсцёнкаў», які задаволіў бы ўсіх, якія творы ўплецены ў тканку кнігі, і як гэта ўплывала на пераклад, колькі моў насамрэч ужываецца ў рамане, і чаму Толкін фактычна называе яго «перакладам на англійскую».

«Беларускі чытач цэніць якасную літаратуру». Топ-5 кніг — лідараў продажаў у «Кнігаўцы»

На імпрэзе кніжнага клуба выдавец Андрэй Янушкевіч афіцыйна аб’явіў аб старце продажу кнігі і нагадаў, што цяпер прадукцыю яго выдавецтва можна знайсці як на сайце кампаніі, так і на платформах Allegro і Amazon.

Таксама кнігу можна набыць у кнігарні «Кнігаўка» ў Варшаве, па вуліцы Клапатоўскага 4 (Kłopotowskiego 4). Працуе яна ўсе дні акрамя панядзелка. З аўторка па чацвер — з 11 да 18, пятніца-субота з 11 да 19, нядзеля — лайтовы дзень з 12 па 18.

Паводле reform.news