458-мы дзень поўнамаштабнай вайны Расіі супраць Украіны: УСУ гатовы да контрнаступу

«Вагнераўцы» паступова сыходзяць з Бахмута, а УСУ працягваюць наступаць. Навіны апошніх сутак з украінскага фронту.

***

Узброеныя сілы Украіны гатовыя да контрнаступлення, дэталі якога камандаванне УСУ прапрацоўвае ўжо некалькі месяцаў, заявіў у інтэрв'ю «ВВС News» сакратар Рады нацыянальнай бяспекі і абароны Аляксей Данілаў. Дакладных тэрмінаў ён не назваў, паказаўшы толькі, што наступ можа пачацца «заўтра, паслязаўтра або праз тыдзень», калі камандзіры палічаць, што «на дадзеным этапе вайны» змогуць дамагчыся найлепшага выніку. «Было б дзіўна, калі б я назваў даты пачатку тых ці іншых падзей. Гэтага нельга рабіць... Перад нашай краінай стаіць вельмі адказная задача. І мы разумеем, што ў нас няма права на памылку», — растлумачыў Данілаў.

Падчас інтэрв'ю сакратар РНБА таксама пацвердзіў, што некаторыя сілы ПВК «Вагнер» адступаюць з Бахмута і «перагрупоўваюцца яшчэ ў трох месцах», хоць гэта не азначае, што «вагнераўцы» перастануць ваяваць з Украінай.

Акрамя таго, Аляксей Данілаў адказаў на пытанне пра размяшчэнне расійскай ядзернай зброі ў Беларусі, заявіўшы, што «абсалютна спакойны» з гэтай нагоды, бо для ўкраінскага кіраўніцтва гэта «не нейкая навіна».

Тым часам галоўнакамандуючы УСУ Валерый Залужны апублікаваў у Telegram-канале відэаролік «Прыйшоў час вяртаць сваё», які даволі хутка распаўсюдзілі многія СМІ і сацыяльныя сеткі. На відэа ўкраінскія вайскоўцы рыхтуюцца да бітвы, прамаўляючы баявую малітву. У канцы роліка ўтрымліваецца заклік да суграмадзян ўступаць ва УСУ. Агенцтва «УНІАН» расцаніла гэтую публікацыю як намёк на пачатак контрнаступлення.

***

Паспяховыя абмежаваныя контратакі СБУ на флангах Бахмута і працяг лакальных аперацый у гэтым раёне могуць ускладніць расійскую аперацыю па замене «вагнераўцаў» у Бахмуце, мяркуюць у «Інстытуце вывучэння вайны» (ISW). Вайсковыя аналітыкі гавораць у сваёй штодзённай справаздачы, што не назіралі пацвярджэнняў таго, што рэгулярныя расійскія войскі займаюць пазіцыі «вагнераўцаў» у самым Бахмуце або што найміты пакідаюць горад, пра што заяўляў заснавальнік ПВК «Вагнер» Яўген Прыгожын.

«Зніжэнне тэмпаў расійскіх наступальных аперацый у раёне Бахмута і паведамленні пра аперацыю па аказанні дапамогі на месцы, якая працягваецца, верагодна, яшчэ больш даюць украінскім сілам у гэтым раёне ініцыятыву пачаць новую фазу аперацый вакол горада, калі яны таго пажадаюць», — адзначаецца ў справаздачы ISW.

***

Кіраўнік Службы бяспекі Украіны (СБУ) Васіль Малюк пацвердзіў, што ўзначаленая ім спецслужба здзяйсняла «пэўныя мерапрыемствы» для падрыву Крымскага моста восенню 2022 года. «У адпаведнасці з нормамі нашага дзеючага і міжнароднага заканадаўства, са звычаямі і традыцыямі вядзення вайны, з улікам таго, што гэта быў лагістычны шлях, які мы былі абавязаныя перарэзаць ворагу, пэўныя мерапрыемствы ажыццяўляліся», — адказаў ён у інтэрв'ю журналісту Дзмітрыю Камарову на пытанне пра дачыненне СБУ да выбуху.

Малюк таксама расказаў, што атаку марскіх дронаў на караблі Чарнаморскага флоту РФ у Севастопальскай бухце ў кастрычніку 2022 года СБУ ажыццяўляла бок аб бок з ваенна-марскімі сіламі і «неабыякавымі грамадзянскімі» асобамі.

***

Выбухі ў акупаваным Марыупалі пацвердзіў прызначаны Расіяй «мэр» Алег Маргун. Ён заявіў, што ракетны ўдар быў нанесены УСУ. Паводле яго сцвярджэнняў, ахвяр і разбурэнняў няма. Паводле версіі крыніцы РІА «Навіны», удар быў нанесены ў раёне завода «Азоўсталь», па якім нібыта былі выпушчаныя дзве ракеты «Storm Shadow».

Марыупальскі гарадскі савет заявіў пра пападанне па тэрыторыі «Азоўсталі», апублікаваўшы кадры, на якіх відаць, як над тэрыторыяй камбіната падымаецца слуп дыму.

***

У Пскоўскай вобласці ў выніку атакі дронаў пашкоджаны адміністрацыйны будынак нафтаправода. Выбух адбыўся раніцай у Невельскім раёне Пскоўскай вобласці паблізу вёскі Ліцвінава, заявіў губернатар рэгіёна Міхаіл Вядзернікаў.

Паводле яго звестак, была ўчыненая атака двух беспілотнікаў. У выніку пашкоджаны адміністрацыйны будынак нафтаправода, ніхто не пацярпеў, напісаў губернатар у сваім тэлеграм-канале.

Паводле звестак тэлеграм-канала «Baza», блізу пятай гадзіны раніцы беспілотнікі ўпалі на тэрыторыі нафтаперапамповачнай станцыі «Транснафты» і ўзарваліся. У выніку гэтага былі пашкоджаныя фасады трох адміністрацыйных будынкаў.

***

У Дняпры на месцы пападання ракеты ў медыцынскую ўстанову разабралі 90% завалаў, паведаміў у сваім тэлеграм-канале кіраўнік Днепрапятроўскай АВА Сяргей Лысак. Паводле яго, пошукавыя работы працягваюцца.

«Дагэтуль невядомы лёс траіх чалавек, якія маглі быць у будынку ў момант "прылёту". Ратавальнікі выявілі там фрагменты цел. Працуюць эксперты-крыміналісты», — піша губернатар.

Напярэдадні ўлады паведамлялі, што ў выніку ракетнага ўдару загінулі прынамсі два чалавекі. Паводле апошніх звестак, 32 чалавекі пацярпелі, пяцёра з іх знаходзяцца ў цяжкім стане.

Пазней Дзяржаўная служба па надзвычайных сітуацыях паведаміла, што разбор завалаў завершаны на 100%, і апублікавала фотаздымкі.

***

Як паведамляе аператыўнае камандаванне «Поўдзень», цяпер расійцы працягваюць паветраную выведку, але падраздзяленні Сіл абароны трапна збіваюць беспілотных шпіёнаў. Такі «Арлан-10» знішчаны ў раёне Давыдаўскага броду на Херсоншчыне.

Акрамя таго, знішчаныя пяць браніраваных аўтамабіляў і комплекс відэаназірання «Мурам-М», які ладна дапамагаў захопнікам сачыць за ўкраінскімі байцамі і грамадзянскімі.

«Страты праціўніка склалі 35 рашыстаў», — паведамілі ў камандаванні.

Таксама адзначаецца, што ўначы вораг спрабаваў атакаваць Мікалаеўшчыну двума дронамі-камікадзэ тыпу «Shahed-131/136», але абодва былі знішчаныя СПА.

Паводле звестак камандавання, цяпер у Чорным і Азоўскім морах расійскіх ракетаносьбітаў на дзяжурстве няма — яны заведзеныя ў пункты базавання.

***

За мінулыя суткі Расія нанесла па тэрыторыі Украіны 20 ракетных удараў, вынікае з ранішняй зводкі Генштаба УСУ. Як гаворыцца ў дакуменце, для нападаў на цэлі ў Кіеўскай і Днепрапятроўскай абласцях былі выкарыстаныя крылатыя ракеты класа «паветра-зямля» Х-101/х-555, якія, аднак, былі збітыя Сіламі абароны Украіны.

«Па Дняпры праціўнік нанёс ракетны ўдар двойчы. Спачатку выкарыстаў 7 ракет С-300 / С-400. Другі раз ударыў па медыцынскай установе, выкарыстаўшы "Іскандэр". Таксама дзве расійскія кіраваныя ракеты патрапілі па горадзе Аўдзееўка», — паведамляецца ў зводцы.

Акрамя таго, расійскі бок нанёс 68 авіяўдараў — у прыватнасці, пры дапамозе іранскіх дронаў тыпу «Shahed», па гарадах Мярэфа і Ізюм Харкаўскай вобласці. Таксама Расія ўжыла кіраваныя авіябомбы для ўдараў па горадзе Аўдзееўка і пасёлку Нью-Ёрк, піша Генштаб УСУ.

Разам з тым, за суткі УС РФ зрабілі 89 абстрэлаў пазіцый УСУ і населеных пунктаў Украіны з ракетных сістэм залпавага агню, гаворыцца далей у зводцы. Паводле даных Генштаба УСУ, у выніку гэтых нападаў ёсць загінулыя і параненыя сярод грамадзянскага насельніцтва, «пашкоджанне атрымалі медустанова ў горадзе Днепр, адукацыйныя ўстановы ў Ізюме і Нью-Ёрку, жылыя шматкватэрныя і прыватныя дамы».

Асноўныя намаганні Расіі сканцэнтраваныя цяпер на Купянскім, Ліманскім, Бахмуцкім, Аўдзееўскім і Мар'інскім кірунках, гавораць у Генштабе УСУ. На гэтых участках фронту, паводле звестак украінскага боку, за суткі адбылося 25 баявых сутыкненняў.

Авіяцыя сіл абароны Украіны за мінулыя суткі нанесла 11 удараў па раёнах засяроджвання асабістага саставу і вайсковай тэхнікі праціўніка, адзначаецца ў зводцы. Паводле звестак Генштаба УСУ, пры гэтым было знішчана 5 расійскіх выведвальных дронаў. Акрамя таго, падраздзяленні ракетных войскаў і артылерыі УСУ разбілі 3 пункты кіравання, 3 раёны засяроджвання ўзбраення і вайсковай тэхнікі, 2 склады боепрыпасаў, 2 артылерыйскія падраздзяленні на агнявых пазіцыях, 1 сродак супрацьпаветранай абароны і «яшчэ 2 важныя цэлі праціўніка».