640-вы дзень поўнамаштабнай вайны Расіі супраць Украіны: буйная атака на Кіеў

Расійцы атакавалі Кіеў дронамі-камікадзэ. Ёсць ахвяры і разбурэнні. Цяжкія баі працягваюцца пад Аўдзееўкай. Войскі РФ пакуль не могуць выкарыстоўваць крылатыя ракеты.

***

Паветраныя сілы УСУ паведамілі пра атакі расійскіх беспілотнікаў у ноч на суботу, якія былі зафіксаваныя ў розных рэгіёнах Украіны.

Група дронаў-камікадзэ, паводле першых паведамленняў, фіксавалася на мяжы Херсонскай, Мікалаеўскай, Днепрапятроўскай абласцей.

Паветраная трывога была абвешчаная і ў Кіраваградскай вобласці, піша «Украінская праўда». Пасля паўночы Паветраныя сілы заявілі, што некалькі груп беспілотнікаў рухаюцца ў напрамку горада Крапіўніцкага (гэта абласны цэнтр).

Пасля гадзіны ночы было паведамлена пра пагрозу ўдарных дронаў у Сумскай вобласці. Затым Паветраныя сілы папярэдзілі пра пагрозу дронаў у Харкаўскай вобласці.

Пасля 1:30 ва УСУ паведамілі, што дроны з Кіраваградскай вобласці накіраваліся ў Чаркаскую вобласць. Акрамя таго, пагроза ўдару беспілотнікаў распаўсюдзіліся на Палтаўскую вобласць.

***

У ранішняй зводцы Паветраныя сілы УСУ заявілі, што Расія атакавала Украіну рэкорднай колькасцю дронаў.

Сцвярджаецца, што для масіраванага налёту на Украіну было выкарыстана каля 75 ударных БПЛА тыпу «Shahed-131/136», 71 дрон быў знішчаны супрацьпаветранай абаронай. 

Паветраныя сілы не ўдакладнілі, колькі беспілотнікаў атрымалася збіць над Кіевам, улады якога таксама заявілі пра рэкордны з пачатку вайны налёт дронаў. Гарадская адміністрацыя мяркуе, што над сталіцай збілі каля 50 беспілотнікаў. Паветраная трывога працягвалася больш за шэсць гадзін, заявіў мэр украінскай сталіцы Віталь Клічко.

Абломкі дронаў упалі ў Саломенскім, Пячэрскім, Галасееўскім, Дняпроўскім і Падольскім раёнах Кіева.

Вядома пра пецярых пацярпелых (у іх ліку 11-гадовы падлетак) і нязначную шкоду ў шматкватэрных дамах.

У Саломенскім раёне ў выніку падзення абломкаў беспілотніка адбылося ўзгаранне ў памяшканні дзіцячага садка, у суседніх дамах пашкоджаныя вокны, напісаў у тэлеграме Клічко. У жылой пяціпавярхоўцы праз разбурэнне на другім паверсе аказаліся заблакаванымі дзве жанчыны, іх эвакуіравалі.

У Дняпроўскім раёне Кіева невялікі абломак БПЛА ўпаў на лесвічную пляцоўку верхняга паверха шматпавярховага жылога дома, узгарання і пацярпелых не было.

У Галасееўскім раёне адзін абломак зваліўся на чатырохпавярховы жылы дом, ніхто не пацярпеў.

***

Спецыялісты амерыканскага «Інстытута вывучэння вайны» (ISW) адзначаюць, што новыя штурмы Аўдзееўкі расійцы пачалі са «слабымі механізаванымі сіламі» і іх атакі «не прывядуць да хуткага прасоўвання».

Украінскія афіцыйныя асобы паведамілі, што расійскія войскі пачалі новую наступальную аперацыю ў кірунку Аўдзееўкі. Украінскі Генеральны штаб паведаміў, што УСУ адбілі не менш за 50 расійскіх нападаў на Аўдзееўскім кірунку 23 і 24 лістапада.

Эксперты адзначаюць: буйны наземны штурм пяхоты, імаверна, будзе ўяўляць значную пагрозу для ўкраінскіх войск, якія абараняюцца на Аўдзееўскім кірунку, але не прывядзе да хуткага прасоўвання расійцаў у гэтым рэгіёне.

Асноўныя высновы ISW за 24 лістапада:

• Украінскія афіцыйныя асобы паведамілі, што расійскія войскі пачалі новую наступальную аперацыю ў кірунку Аўдзееўкі.
• Расійскія высокапастаўленыя чыноўнікі могуць быць ўцягнутыя ў больш шырокую схему прымусовага ўсынаўлення дэпартаваных украінскіх дзяцей.
• Заходнія хаўруснікі Украіны заявілі пра сваю прыхільнасць далейшаму развіццю ўкраінскай сістэмы супрацьпаветранай абароны падчас 17-й віртуальнай сустрэчы ў фармаце «Рамштайн».
• Прэзідэнт Расіі Уладзімір Пуцін прыняў удзел у сесіі Савета АДКБ у Мінску.
• Кітайскія кампаніі супрацоўнічаюць з расійскімі бізнесменамі ў планаванні будаўніцтва падводнага тунэлю, які злучыў бы Расію з акупаваным Крымам.
• Еўрапейскія дзяржавы рэагуюць на працяглую арганізацыю Расіяй штучна створанага крызісу з мігрантамі на паўночна-заходніх межах.
• Расійскія праваахоўныя органы затрымалі каля 700 мігрантаў на складзе ў Маскоўскай вобласці і выдалі некалькі позваў у войска, верагодна, у рамках намаганняў, накіраваных на прымус мігрантаў да вайсковай службы.
• Крэмль, верагодна, аднаўляе спробы кантраляваць усе сістэмы відэаназірання ў Расіі, што можа быць часткай пастаянных намаганняў па інтэнсіфікацыі інструментаў лічбавага аўтарытарызму для ўзмацнення ўнутраных рэпрэсій.
• Расійскія войскі правялі наземныя атакі ўздоўж лініі Сватава — Крэменная, пад Бахмутам, паблізу Аўдзееўкі, на захад і паўднёвы захад ад Данецка, на мяжы Данецкай і Запарожскай абласцей, а таксама на захадзе Запарожскай вобласці, крыху прасунуўшыся наперад у некаторых раёнах.
• Расійская авіяцыйная прамысловасць, імаверна, адчувае значныя абмежаванні праз міжнародныя санкцыі і патрабаванні расійскай абаронна-прамысловай базы.
• Расійскія акупацыйныя ўлады працягваюць прыкладаць намаганні для індактрынацыі ўкраінскіх дзяцей у акупаванай Украіне ў расійскую нацыянальную і культурную ідэнтычнасць.

***

У выведвальнай супольнасці Міністэрства абароны Вялікабрытаніі сцвярджаюць, што лагістычныя праблемы Чарнаморскага флоту (ЧФ) РФ у Наварасійску ўплываюць на яго здольнасць біць па Украіне крылатымі ракетамі.

Паводле аналітыкаў, традыцыйна ЧФ РФ перазараджае крылатыя ракеты ў Севастопалі ў акупаваным Крыме, але паколькі Крым усё часцей аказваецца пад пагрозай украінскіх удараў, Расія, хутчэй за ўсё, будзе разглядаць Наварасійск як найлепшае альтэрнатыўнае месца для перабазавання.

Зрэшты, адзначаюць выведчыкі, перасоўванне і перазарадка ракет запатрабуюць новых працэсаў дастаўкі, захоўвання, кіравання і загрузкі.

У міністэрстве нагадалі, што яшчэ 13 лістапада 2023 года ўкраінскія вайскоўцы заявілі, што РФ прыпыніла ўдары марскімі крылатымі ракетамі праз лагістычныя праблемы ў Наварасійску.

«Расія, імаверна, будзе спрабаваць паскорыць пераадоленне гэтых праблем, каб марскія крылатыя ракеты маглі быць уключаныя ў зімовую кампанію для нанясення ўдараў па Украіне», — канстатуе брытанская выведка.

***

За мінулыя суткі на шасці напрамках расійцы праводзілі атакі і штурмавыя дзеянні, на фронце ў цэлым адбылося 74 баявыя сутыкненні, паведамляе Генштаб УСУ.

Агулам было нанесена 7 ракетных і 29 авіяцыйных удараў, здзейснена 36 абстрэлаў з рэактыўных сістэм залпавага агню па пазіцыях украінскіх войскаў і населеных пунктах.

За мінулыя суткі авіяцыя Сіл абароны нанесла 9 удараў па раёнах засяроджвання асабістага саставу, узбраення і ваеннай тэхнікі праціўніка.

Падраздзяленні ракетных войскаў разбілі 2 пункты кіравання, 4 раёны засяроджвання асабістага саставу, узбраення і ваеннай тэхнікі, 2 артылерыйскія сродкі і лагістычны цэнтр праціўніка.

***

Украінскія абаронцы знішчылі за апошнія суткі прынамсі 18 артсістэм, 29 адзінак аўтамабільнай тэхнікі і 6 расійскіх танкаў.

Агульныя баявыя страты расійцаў з 24.02.22 па 25.11.23 арыенціровачна склалі:

• асабістага саставу — каля 323 760 (+860) чалавек;
• танкаў — 5 502 (+6) адз.;
• баявых браніраваных машын — 10 263 (+7) адз.;
• артылерыйскіх сістэм — 7 851 (+18) адз.;
• РСЗА — 905 (+1) адз.;
• сродкаў СПА — 596 (+1) адз.;
• самалётаў — 323 (+0) адз.;
• верталётаў — 324 (+0) адз.;
• БПЛА аператыўна-тактычнага ўзроўню — 5808 (+8);
• крылатых ракет — 1565 (+1);
• караблёў / катэраў — 22 (+0) адз.;
• падводных лодак — 1 (+0) адз.;
• аўтамабільнай тэхнікі і аўтацыстэрн — 10 259 (+29) адз.;
• спецыяльнай тэхнікі — 1 112 (+4).