863-ці дзень поўнамаштабнай вайны Расіі супраць Украіны: 8 загінулых у выніку абстрэлу Дняпра і атака дронаў на парахавы завод у РФ

Расія працягвае абстрэльваць украінскія тэрыторыі і забіваць мірных жыхароў. Але цяпер краіна-агрэсар атрымлівае ўдары і па сваёй тэрыторыі — і там таксама ёсць ахвяры.

***

Спецыялісты амерыканскага «Інстытута вывучэння вайны» (ISW) паказваюць на тое, што кіраўнік Расіі Уладзімір Пуцін адхіляе любыя перагаворныя магчымасці па спыненні агню і ўжо непрыкрыта патрабуе фактычнай капітуляцыі Украіны.

Пуцін наўпрост адхіліў удзел РФ у любых значных перамовах па пагадненні аб спыненні агню, замест гэтага патрабуючы «незваротнай дэмілітарызацыі» Украіны як перадумовы для спынення агню.

Аналітыкі адзначаюць, што, такім чынам, Пуцін патрабуе ад Украіны фактычнай капітуляцыі.

Пуцін пракаментаваў перспектывы спынення агню ва Украіне шляхам перамоваў на саміце Шанхайскай арганізацыі супрацоўніцтва (ШАС) у Астане (Казахстан) 4 ліпеня і адхіліў любы перамоўны працэс.

Кіраўнік Крамля неаднаразова прадстаўляў Захад як свайго верагоднага партнёра ў перамовах па спыненні агню, каб заахвоціць Захад да саступак у пытанні ўкраінскага суверэнітэту, але Пуцін, у прыватнасці, адхіліў усе бакі-пасярэднікі ў заключэнні пагаднення паміж Украінай і Расіяй.

Ён таксама адхіліў Вярхоўную Раду як магчымую кантактную асобу для перамоваў, нягледзячы на тое, што раней сцвярджаў, што яна з'яўляецца адзіным легітымным украінскім органам, з якім Расія можа весці перамовы.

Эксперты падводзяць высновы: «Цяпер Пуцін назваў усе ўкраінскія органы ўлады нелегітымнымі або непрыдатнымі для перамоваў і адхіліў ідэю ўдзелу трэціх бакоў у перамовах, фактычна адкінуўшы любы рэальны працэс паўнавартасных перамоваў па пагадненні аб спыненні агню.

Замест гэтага ён адзначыў сваё патрабаванне да Украіны аб спыненні агню».

Акрамя таго, Пуцін выставіў асноўным патрабаваннем «дэмілітарызацыю» Украіны як галоўную перадумову спынення агню.

ISW працягвае ацэньваць, што Расія скарыстаецца перадышкай для аднаўлення і пашырэння сваіх сіл і далейшай мабілізацыі сваёй абаронна-прамысловай базы для будучай агрэсіі, накіраванай на знішчэнне ўкраінскай дзяржавы.

На думку аналітыкаў, адмова Пуціна ад любога пагаднення аб спыненні агню без капітуляцыі Украіны яшчэ больш ілюструе, што ён упэўнены, што Расія можа дасягнуць перамогі, працягваючы паўзучае прасоўванне ва Украіне. Гэта значыць, ён робіць стаўку на вайну на знясіленне без падтрымкі Украіны Захадам.

***

Расійскія войскі прасоўваюцца наперад з вялізнымі стратамі ў людзях і тэхніцы, наносячы пры гэтым значна меншыя страты ўкраінскім войскам, піша «Forbes». За кожны горад ці нават раён, які захопліваюць расійцы, яны страчваюць дзясяткі тысяч сваіх салдат.

Так, за час штурму аднаго толькі мікрараёна Канал у горадзе Часаў Яр страты акупантаў склалі 99 тысяч чалавек. Не ўсе з іх былі забітыя, але значная частка іх загінула.

Вышэйзгаданы мікрараён знаходзіцца на ўсходнім беразе канала Северскі Данец — Данбас. Ад самога горада, размешчанага на пагорках, Канал аддзяляе водная перашкода.

Афіцыйны прадстаўнік аператыўнай групоўкі войскаў «Хорціца» Назар Валошын пацвердзіў адступленне УСУ:

«Мікрараён Канал, у які вораг зайшоў, утрымліваць было немэтазгодна. Паколькі гэта пагражала жыццю і здароўю вайскоўцаў. Пазіцыі нашых абаронцаў былі разбураныя. Было прынята рашэнне адысці на больш абароненыя, больш падрыхтаваныя пазіцыі».

***

Кіраўнік Днепрапятроўскай вобласці Сяргей Лысакпаведаміў, што загінула 72-гадовая жанчына, параненая ў выніку расійскага ўдару па Дняпры 3 ліпеня.

«У бальніцы памерла яшчэ адна жанчына, параненая ў Дняпры напярэдадні. Ёй было 72 гады. Ужо 8 ахвяр той расійскай атакі. Мае спачуванні ўсім, хто страціў родных».

Кіраўнік АВА таксама паведаміў, што расійцы ўначы і раніцай атакавалі Нікапаль дронамі-камікадзэ, у выніку чаго пашкоджана інфраструктура. Пад удар папалі прыватны дом і мікрааўтобус.

***

За мінулыя суткі на фронце зафіксавалі 155 баявых сутыкненняў, больш за ўсё на Пакроўскім кірунку — 38 штурмавых дзеянняў, паведамляе Генштаб УСУ.

«Паводле ўдакладненай інфармацыі, за мінулыя суткі праціўнік нанёс па пазіцыях украінскіх падраздзяленняў і населеных пунктах адзін ракетны ўдар з ужываннем адной ракеты, 59 авіяцыйных удараў (задзейнічаў 111 КАБаў), здзейсніў больш за 4000 абстрэлаў, 115 з іх — з рэактыўных сістэм залпавага агню.

Авіяцыя і ракетныя войскі і артылерыя сіл абароны Украіны нанеслі 13 авіяўдараў па жывой сіле праціўніка, разбілі дзве гарматы, адзін склад боепрыпасаў, 3 раёны засяроджвання асабістага саставу і ВВТ праціўніка».

Таксама за мінулыя суткі ўкраінскія войскі «адмінусавалі» ў РФ 1 110 салдат, 10 танкаў і 11 ББМ. Агульныя баявыя страты расійцаў з 24.02.22 па 05.07.24 арыенціровачна склалі:

• асабістага саставу — каля 548 580 (+1 110) чалавек;
• танкаў — 8 142 (+10) адз.;
• баявых браніраваных машын — 15 611 (+11) адз.;
• артылерыйскіх сістэм — 14 831 (+54) адз.;
• РСЗА — 1 115 (+0) адз.;
• сродкаў СПА — 878 (+0) адз.;
• самалётаў — 360 (+0) адз.;
• верталётаў — 326 (+0) адз.;
• БПЛА аператыўна-тактычнага ўзроўню — 11 751 (+57) адз.;
• крылатых ракет — 2 342 (+0) адз.;
• караблёў / катэраў — 28 (+0) адз.;
• падводных лодак — 1 (+0) адз.;
• аўтамабільнай тэхнікі і аўтацыстэрнаў — 19 977 (+54) адз.;
• спецыяльнай тэхнікі — 2 473 (+5) адз.

***

У Макараўскай грамадзе Шчучанскага раёна Кіеўскай вобласці абломкі збітых расійскіх беспілотнікаў пашкодзілі 6 прыватных дамоў і машыну, абышлося без пацярпелых, напісаў кіраўнік грамады Вадзім Токар у Telegram.

«Сёння ноччу Макараўская грамада была атакаваная варожымі БПЛА. Паводле вынікаў начной атакі, у адным з населеных пунктаў абшчыны абломкамі БПЛА былі пашкоджаныя 6 прыватных дамоў і 1 аўтамабіль. У дамах выбітыя вокны, пашкоджаныя дзверы, дахі. Загінулых і пацярпелых няма».

Токар дадаў, што ўсе неабходныя службы працуюць на месцы здарэння.

***

У выніку расійскіх удараў па Данецкай вобласці 4 ліпеня загінулі 3 чалавекі, яшчэ 24 параненыя, паведаміў кіраўнік Данецкай абласной адміністрацыі Вадзім Філашкін.

«За 4 ліпеня расійцы забілі траіх жыхароў Данецкай вобласці: у Сценках, Ракітным і Краснагораўцы. Яшчэ 24 чалавекі ў вобласці за суткі атрымалі раненні».

Паводле слоў Філашкіна, усяго за суткі расіяне 32 разы абстралялі населеныя пункты Данеччыны. Таксама кіраўнік АВА падкрэслівае, што агульная колькасць ахвяр расійцаў у Данецкай вобласці пададзеная без уліку Марыупаля і Валнавахі.

***

У выніку спецаперацыі ўкраінскай выведкі раніцай 4 ліпеня адзін з дронаў-камікадзэ папаў у Тамбоўскі парахавы завод у горадзе Катоўск Тамбоўскай вобласці РФ, паведамляе «Украінская праўда» са спасылкай на крыніцы ў ГУР Украіны.

Наступствы пападання, ступень паражэння і інфармацыя пра страты праціўніка пакуль удакладняюцца.

Афіцыйныя ўлады РФ адмаўляюць факт паражэння парахавога завода. Кіраўнік Тамбоўскай вобласці Максім Ягораў, у прыватнасці, адзначыў, што «абодва БПЛА знішчаны. Ахвяр і разбурэнняў няма. Сітуацыя пад кантролем».

Нягледзячы на гэта, мясцовыя жыхары публікуюць у сеціве відэа, на якіх выразна відаць пападанне аднаго з дронаў-камікадзэ з наступнай дэтанацыяй і ўзгараннем на тэрыторыі аб'екта.

19 студзеня 2024 года беспілотнікі ГУР МАУ ўжо атакавалі Тамбоўскі парахавы завод. Тады адзін з дронаў-камікадзэ выбухнуў на пляцоўцы каля цэха змешвання порахаў. Беспілотнікі атакавалі завод і ў лістападзе 2023 года.

Паводле слоў крыніцы УП, Тамбоўскі парахавы завод — адно з найбуйнейшых прадпрыемстваў Расіі, дзе вырабляюцца боепрыпасы і порах для стралковай зброі. З пачатку поўнамаштабнага ўварвання РФ ва Украіну завод павялічыў вытворчасць на траціну. Прадпрыемства знаходзіцца пад санкцыямі з сакавіка 2023 года.

***

Шасцігадовая дзяўчынка, якую параніла падчас атакі беспілотнікаў на Прыморска-Ахтарск, памерла ў бальніцы — гэтую інфармацыю пацвердзіў губернатар Краснадарскага краю Веніямін Кандрацьеў.

Раней ён заявіў, што абломкі збітых дронаў упалі на трохпавярховы шматкватэрны дом, у выніку атакі пацярпелі шэсць чалавек, сярод іх двое дзяцей.

«Акрамя гэтага, парушаная праца энергападстанцыі, што сілкуе значную частку горада. Ідуць рамонтна-аднаўленчыя работы», — напісаў Кандрацьеў.

***

Губернатар Растоўскай вобласці Васіль Голубеў паведаміў, што СПА РФ адбівае атаку «некалькіх паветраных цэляў» у Растове-на-Доне.

Мясцовыя праўладныя каналы пісалі, што дроны бачылі каля ЦЭЦ-2 у Растове і што ў гэтай мясцовасці пачаліся пажары, першапачаткова іх было тры, але цяпер застаецца адзін, піша «Бі-бі-сі».

Міністэрства абароны Расіі паведамляе, што ўначы расійскія сілы СПА збілі 14 БПЛА над Краснадарскім краем і 10 над Растоўскай вобласцю.