922-гі дзень поўнамаштабнай вайны Расіі супраць Украіны: масіраваны ракетны ўдар па Кіеве, Херсоне і Сумах

Расія нанесла чарговы ўдар па ўкраінскай сталіцы, а таксама па Сумшчыне і Херсоншчыне. Ёсць разбурэнні і ахвяры.

***

На думку экспертаў амерыканскага «Інстытута вывучэння вайны» (ISW), якія прааналізавалі апытанні ў РФ, аперацыя Сіл абароны Украіны ў Курскай вобласці выклікала занепакоенасць у расійцаў, аднак інфармацыйныя аперацыі Крамля «змякчаюць унутраную стомленасць ад вайны» і дазваляюць уладам Расіі выбіраць стратэгію вядзення зацяжной вайны на знясіленне супраць Украіны.

У справаздачы адзначаюць, што нядаўнія расійскія ўнутраныя апытанні сведчаць пра тое, што аперацыя Украіны ў Курскай вобласці яшчэ не знізіла ўзровень падтрымкі вайны ва Украіне ў Расіі ў кароткатэрміновай перспектыве і што падтрымка вайны ў Расіі застаецца высокай з 2022 года.

Расійская сацыялагічная арганізацыя «Левада-цэнтр» апублікавала вынікі штомесячнага апытання 30 жніўня і выявіла, што каля 78% рэспандэнтаў падтрымліваюць расійскія ваенныя аперацыі ва Украіне — гэта больш, чым 75% у ліпені 2024 года і 77% у чэрвені 2024 года.

Эксперты паведамляюць, што апытанне «Левада-цэнтра» паказвае на тое, што самы нізкі ўзровень падтрымкі расійцамі вайны ва Украіне быў у лютым 2022 года, калі вайну падтрымлівалі 68% рэспандэнтаў, і што падтрымка вайны сярод рэспандэнтаў не апускаецца ніжэй за 70% з сакавіка 2022 года.

У жніўні 2024 года «Левада-цэнтр» таксама спытаў рэспандэнтаў пра ўкраінскую аперацыю ў Курскай вобласці і выявіў, што 91% рэспандэнтаў занепакоены ўкраінскімі ваеннымі аперацыямі на расійскай тэрыторыі.

Акрамя таго, «Левада-цэнтр» паведаміў, што 57% рэспандэнтаў не чакаюць другой хвалі мабілізацыі, а 60% не бачаць неабходнасці ў правядзенні другой хвалі мабілізацыі ў бліжэйшыя месяцы — абодва паказчыкі знізіліся з 65% і 69% адпаведна.

«Звесткі апытання "Левада-цэнтра" паказваюць на тое, што адмова Крамля цалкам перавесці расійскае грамадства агулам на ваенныя рэйкі і ўнутраныя інфармацыйныя аперацыі Крамля, накіраваныя на нармалізацыю вайны ў расійскім грамадстве, пакуль змякчаюць унутраную стомленасць ад вайны і што ўкраінская аперацыя ў Курскай вобласці не змяніла гэтых настрояў.

Той факт, што расійскае грамадства ў цэлым не адчувае стомленасці ад вайны, верагодна, надае Крамлю гнуткасці ў выбары стратэгіі вядзення зацяжной вайны на знясіленне супраць Украіны».

https://www.understandingwar.org/backgrounder/russian-offensive-campaign-assessment-september-1-2024

***

Польшча і краіны, якія мяжуюць з Украінай, абавязаныя збіваць расійскія ракеты яшчэ да іх набліжэння да межаў дзяржаў насуперак супрацьдзеянню NATO, заявіў кіраўнік МЗС Польшчы Радослаў Сікорскі.

У інтэрв'ю «The Financial Times» міністр адзначыў, што сяброўства ў NATO не адмяняе адказнасці кожнай краіны за абарону сваёй паветранай прасторы і гэта з'яўляецца ўласным канстытуцыйным абавязкам дзяржаў. Ён дадаў, што ракеты лепш перахопліваць на большай вышыні над Украінай, каб знізіць рызыкі і для польскіх грамадзян.

https://www.ft.com/barrier/corporate/20572874-e46f-4e46-934f-134251b88b79

***

Раніцай 2 верасня расійцы здзейснілі камбінаваную атаку на Кіеў, ужыўшы больш за 10 крылатых ракет, каля дзясятка балістычных і ўдарны беспілотнік, паведаміў начальнік Кіеўскай ГВА Сяргей Папко

«Удар быў камбінаваны — крылатымі і балістычнымі ракетамі.

Крылатыя ракеты (патэнцыйна Х-101), хутчэй за ўсё, былі выпушчаныя каля трэцяй гадзіны ночы з бартоў стратэгічных бамбавікоў Ту-95МС з раёна Саратаўскай вобласці РФ.

На Кіеў гэтыя ракеты заходзілі пасля складаных манеўраў, з паўднёвага напрамку.

Адначасова з падлётам да сталіцы крылатых ракет вораг выпусціў па Кіеве і прыгарадзе балістычныя ракеты "KN-24/Іскандэр-М".

Да гэтага ўсяго яшчэ дадаўся адзін ударны БпЛА».

У выніку ракетнага ўдару па Кіеве адбылося падзенне абломкаў у Галасееўскім, Святошынскім, Дняпроўскім і Шаўчэнкаўскім раёнах.

https://t.me/VA_Kyiv/7750

Тры чалавекі пацярпелі, гарэлі 4 аўто, кацельня, прадпрыемства, нежылыя будынкі, напісаў у Telegram мэр сталіцы Віталь Клічко.

«Аднаму чалавеку аказалі медыцынскую дапамогу на месцы. Два чалавекі шпіталізаваныя ў медыцынскія ўстановы сталіцы», — паведаміў ён.

Клічко дадаў, што ў выніку ракетнай атакі пашкоджаныя вокны ў дзвюх школах у Шаўчэнкаўскім і Святошынскім раёнах.

«Камунальнікі аператыўна ліквідуюць пашкоджанні. Навучальны працэс у гэтых школах пачаўся», — падсумаваў мэр Кіева.

https://t.me/vitaliy_klitschko/3470

***

Раніцай 2 верасня ў Харкаве прагрымеў выбух, мэр горада Ігар Церахаў паведаміў пра пажар у выніку ракетнага ўдару.

Зноў у Харкаве быў чутны выбух.

«У Індустрыяльным раёне ад удару ракетай (тып устанаўліваецца) ёсць узгаранне ў садовым таварыстве. Пра ахвяр і пацярпелых пакуль інфармацыя не паступала».

https://t.me/ihor_terekhov/1632

Пазней стала вядома, што адзін чалавек пацярпеў, пашкоджаныя прыватныя дамы, нежылыя пабудовы і чыгуначныя шляхі.

«Як паведаміў кіраўнік Харкаўскай вобласці Алег Сінягубаў у Telegram, каля 1:00 у выніку варожага ўдару БПЛА ў Кіеўскім раёне пацярпела жанчына 66 гадоў, ад шпіталізацыі адмовілася. Пашкоджаны прыватны дом.

У 05:30 акупанты нанеслі чарговыя ўдары па Індустрыяльным раёне г. Харкаў. У садовым таварыстве гарэў прыватны дом і 3 нежылыя будынкі».

Паводле слоў кіраўніка АВА, падчас другога абстрэлу абышлося без пацярпелых.

https://t.me/synegubov/10972

***

За мінулыя суткі расійцы атакавалі 12 кірункаў фронту, адбылося 182 баявыя сутыкненні, 63 разы вораг штурмаваў Пакроўскі кірунак, гаворыцца ў зводцы Генштаба УСУ.

«Сітуацыя на фронце застаецца складанай. Праціўнік, выкарыстоўваючы сваю перавагу ў жывой сіле і тэхніцы, бесперапынна атакуе нашы пазіцыі. Украінскія абаронцы стойка стрымліваюць націск акупантаў, наносяць ворагу значныя страты».

https://www.facebook.com/GeneralStaff.ua/posts/pfbid034C6FLtvGPzxNu6HQEYvJqnAq3gtMdb2EU4J4kvpbbvgo2ks1mnNWnrMNtr8fqbd1l

Тым часам Сілы абароны Украіны працягваюць наносіць страты краіне-агрэсару Расіі — толькі за мінулыя суткі яны абясшкодзілі 1 300 захопнікаў, 26 ББМ і 9 танкаў.

Агульныя баявыя страты расійцаў з 24.02.22 па 02.09.24 арыенціровачна склалі:

• асабістага саставу — каля 617 600 (+1 300) чалавек;
• танкаў — 8 601 (+9) адз.;
• баявых браніраваных машын — 16 786 (+26) адз.;
• артылерыйскіх сістэм — 17 646 (+10) адз.;
• РСЗА — 1 177 (+1) адз.;
• сродкаў СПА — 940 (+0) адз.;
• самалётаў — 368 (+0) адз.;
• верталётаў — 328 (+0) адз.;
• БПЛА аператыўна-тактычнага ўзроўню — 14 537 (+30) адз.;
• крылатых ракет — 2 557 (+0) адз.;
• караблёў / катэраў — 28 (+0) адз.;
• падводных лодак — 1 (+0) адз.;
• аўтамабільнай тэхнікі і аўтацыстэрнаў — 23 925 (+44) адз.;
• спецыяльнай тэхнікі — 2 993 (+2) адз.

У ноч на 2 верасня Расія ўдарыла па Украіне 58 паветранымі сродкамі, супрацьпаветраная абарона знішчыла 9 балістычных ракет з 16, запушчаных ворагам, 13 крылатых ракет і 20 дронаў-камікадзэ, паведаміла прэс-служба Паветраных сіл УСУ ў сацсетках.

У ноч на панядзелак расійскія акупанты нанеслі ракетны ўдар па Кіеўскай, Сумскай і Харкаўскай абласцях, ужыўшы балістычныя, крылатыя і зенітныя кіраваныя ракеты, таксама атакавалі ўдарнымі БПЛА тыпу «Shahed» з паўднёвага напрамку.

Адзначаецца, што радыётэхнічнымі войскамі было выяўлена і ажыццёўлена суправаджэнне 58 паветраных цэляў — 35 ракет розных тыпаў і 23 ударных БПЛА.

https://www.facebook.com/kpszsu/posts/pfbid02HDpspaar9QcAtURGpdK3hC9XFqu2GAaiCevdZhgEEH3Eq6wyWHRt2SnVyURaSoxJl

***

У выніку расійскага ракетнага ўдару па Сумах раненні атрымалі 18 чалавек, сярод якіх — 6 дзяцей. Таксама разбурэнням падвергнулася навучальная ўстанова і прынамсі 5 шматпавярховак.

«Як заявілі ў аддзеле камунікацыі паліцыі Сумскай вобласці, разбурэнням падвергнулася навучальная ўстанова і па меншай меры пяць шматпавярховак.

На месцы здарэння працуюць усе профільныя службы, жыхарам пашкоджаных дамоў аказваюць неабходную дапамогу».

У паліцыі дадалі, што следчыя фіксуюць пашкоджанні і збіраюць доказы ваеннага злачынства з боку войска дзяржавы-агрэсара.

https://su.npu.gov.ua/news/trynadtsiat-postrazhdalykh-z-nykh-chetvero-ditei-vnaslidok-cherhovoho-udaru-po-sumam-politseiski-dokumentuiut-cherhovyi-voiennyi-zlochyn-voroha

***

У выніку ракетнага ўдару па Кіеве 2 верасня істотным разбурэнням падвергнуўся будынак Ісламскага культурнага цэнтра і мячэць на яго тэрыторыі, напісаў старшыня Меджліса крымскататарскага народа Рэфат Чубараў у Facebook.

«Сёння раніцай у выніку чарговага масіраванага ракетнага ўдару расійскіх варвараў па Кіеве істотныя разбурэнні нанесеныя будынку Ісламскага культурнага цэнтра духоўнага кіравання мусульман Аўтаномнай Рэспублікі Крым (мячэць на Ніўках)».

Паводле яго слоў, будынку Ісламскага цэнтра, асабліва размешчанай у ім мячэці, спатрэбіцца рамонт.

Намеснік муфтыя мусульман Крыма вайсковы капелан Сулейман Хайрулаеў паведаміў, што абышлося без чалавечых ахвяр.

https://www.facebook.com/dogrujol/posts/pfbid037qXETG5wivPaZ7q6DNU8JGqqPgZtQChpHhvaYH2KF2EXqYCWRVL3UhhXEgAhsHjtl

***

Кіраўнік Расіі Уладзімір Пуцін заявіў, што расійскія акупацыйныя войскі прасоўваюцца на Данбасе значнымі тэмпамі — «не метрамі, а кіламетрамі», перадаюць яго словы прапагандысты РІА «Новости».

Падчас адкрытага ўрока з расійскімі школьнікамі Пуцін пачаў выхваляцца, што «цяпер гаворка ідзе не пра тое, каб рухацца па 200, па 300 метраў наперад на Данбасе».

Ён заявіў, што такіх тэмпаў наступу даўно не было. «Расійскія Узброеныя сілы ставяць пад кантроль ужо тэрыторыі не па 200-300 метраў, а квадратнымі кіламетрамі», — сказаў кіраўнік краіны-агрэсара.

Пуцін таксама назваў аперацыю УСУ ў Курскай вобласці Расіі «правакацыяй» і спробай спыніць наступ Расіі на Данбасе, якая нібыта не ўдалася.

https://ria.ru/20240902/putin-1969915390.html

***

Расійскія акупацыйныя войскі днём 2 верасня абстрэльваюць Херсон.

Пра гэта паведамляе кіраўнік гарадской ваеннай адміністрацыі Херсона Раман Мрочка.

«У Дняпроўскім раёне Херсона раздаюцца выбухі. Вораг атакуе з часова акупаванага левабярэжжа.

Не знаходзьцеся на адкрытай прасторы. Перайдзіце ў больш бяспечныя месцы».

https://t.me/roman_mrochko/10965

***

Белгарадскі губернатар паведаміў, што ўкраінскі бок абстраляў Белгарад: сігнал ракетнай небяспекі быў абвешчаны каля шостай гадзіны раніцы. Паводле слоў Вячаслава Гладкова, ёсць «прамыя пападанні ў адзін сацыяльны і адзін камерцыйны аб'екты». Таксама ён апублікаваў фота разбуранага дзіцячага садка.

https://m.vk.com/wall639631882_1511080