Расія пачала наступ на Данбасе, ідуць баі за Марыупаль

Асноўныя намаганні РФ сканцэнтраваны на ўсталяванні поўнага кантролю над тэрыторыяй Данецкай і Луганскай абласцей і ўтрыманні раней захопленай тэрыторыі.

На Данбасе фіксуюцца прыкметы пачатку наступальнай аперацыі з боку Расіі.
Пра гэта Генеральны штаб Узброеных Сіл Украіны паведамляе ў Facebook. Працягваюцца ракетна-бомбавыя ўдары акупантаў па аб'ектах прамысловай і грамадзянскай інфраструктуры.
Асноўныя намаганні РФ сканцэнтраваны на ўсталяванні поўнага кантролю над тэрыторыяй Данецкай і Луганскай абласцей і ўтрыманні раней захопленай тэрыторыі.
«Фіксуюцца прыкметы пачатку наступальнай аперацыі ва ўсходняй аперацыйнай зоне. У Слабажанскім і Данецкім аперацыйных раёнах агрэсар на асобных кірунках актывізаваў наступальныя і штурмавыя дзеянні. На Валынскім, Паляўскім і Северскім кірунках істотных змен у дзейнасці войскаў праціўніка не адзначана», — гаворыцца ў паведамленні.
На Слабажанскім кірунку групоўкі РФ, у склад якіх уваходзяць асобныя падраздзяленні 6-й агульнавайсковай арміі Заходняй ваеннай акругі, берагавых войскаў Балтыйскага і Паўночнага флатоў, працягвае часткова блакаваць горад Харкаў і разбураць артылерыйскім агнём жылыя кварталы горада.
На Ізюмскім кірунку агрэсар дзейнічае асобнымі падраздзяленнямі са складу 1-й танкавай арміі, 20-й агульнавайсковай арміі Заходняй ваеннай акругі, 35-й і 68-й агульнавайсковых армій Усходняй ваеннай акругі і паветрана-дэсантных войскаў. Чакаецца працяг спроб наступу на напрамках «Ізюм — Славянск» і «Ізюм — Барвенкава».
У раёне непасрэднай блізкасці ад дзяржаўнай мяжы з Украінай, на тэрыторыі Белгарадскай вобласці, адзначаецца разгортванне верталётных пляцовак.
На Данецкім і Таўрычаскім кірунках групоўкі акупацыйных войскаў працягваюць засяроджваць асноўныя намаганні на захопе населеных пунктаў Ліман, Крэменная, Папасная і Рубежнае, а таксама на ўсталяванні поўнага кантролю над горадам Марыупаль.
Праціўнік актывізаваў наступальныя дзеянні на Севераданецкім, Папаснянскім, Курахоўскім і Запарожскім кірунках. Для нарошчвання намаганняў праціўнік працягвае засяроджванне дадатковых танкавых і артылерыйскіх падраздзяленняў.
Працягваюцца баі за Марыупаль. Расійцы праводзяць штурмавыя дзеянні ў раёне марскога порта.
На Паўднёвабугскім кірунку асобныя падраздзяленні акупантаў працягваюць засяроджваць асноўныя намаганні на ўтрыманні займаемых межаў і абстрэлах пазіцый групоўкі войск Сіл абароны. Расійцы не спыняюць спроб усталяваць поўны кантроль над тэрыторыяй Херсонскай вобласці, вядуць баявыя дзеянні ў раёне населенага пункта Аляксандраўка, поспеху не маюць.
Карабельныя групоўкі суперніка ў акваторыях Чорнага і Азоўскага мораў працягваюць ізаляцыю марскога ўзбярэжжа Украіны, а таксама вядзенне выведкі.