У Беларусі зрабілі «экстрэмістам» украінскага дэпутата Аляксея Ганчарэнку

У Беларусі прызналі «экстрэмісцкімі» сацсеткі ўкраінскага дэпутата Аляксея Ганчарэнкі. Адпаведнае рашэнне 23 студзеня прыняў суд Ленінскага раёну Магілёва.

У Вярхоўнай Радзе Ганчарэнка ўваходзіць у міжфракцыйную групу «За дэмакратычную Беларусь». Ён вядомы сваёй рэзкай і паслядоўнай крытыкай Лукашэнкі.

У жніўні Генпракуратура Беларусі распачала крымінальныя справы ў дачыненні да Аляксея Ганчарэнкі. Яму закінулі пагрозу гвалтам у дачыненні да Лукашэнкі і дыскрэдытацыю Беларусі.

Тады дэпутат адказаў на віншаванне Лукашэнкі з Днём Незалежнасці Украіны словамі, маўляў, «у наступны Дзень Незалежнасці Украіны Лукашэнка будзе вісець на слупе, а беларускі народ будзе вольны і будзе жыць у дэмакратычнай дзяржаве!».

Даведаўшыся пра крымінальную справу ў Беларусі, Аляксей Ганчарэнка адказаў: «Мне інкрымінаваныя пагроза гвалтам да "прэзідэнта" Беларусі і дыскрэдытацыя Рэспублікі Беларусь. Адно пытанне, а як я пагражаў гвалтам Святлане Ціханоўскай? Я пагражаў вашаму клоўну Лукашэнку, які незаконна захапіў уладу і якому вы дапамагаеце заняволіць мой любімы беларускі народ. Жыве Беларусь!»

Напярэдадні Лукашэнка накіраваў віншаванні ўкраінскаму народу і пажадаў яму мірнага неба. Праз некалькі гадзін з тэрыторыі Беларусі працягнуліся ракетныя ўдары па Украіне.

Арастовіч: «Беларусы знаходзяцца ў такой жа акупацыі, як нашы на акупаваных тэрыторыях»

Цікава, што яшчэ раней — у сакавіку 2020 года — усё тая ж няўрымслівая Генеральная пракуратура Беларусі ўзбудзіла крымінальную справу ў дачыненні да тагачаснага дарадцы Офіса прэзідэнта Украіны Аляксея Арастовіча. Яго абвінавацілі паводле артыкула «Заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Беларусі» (ч. 3 арт. 361).

Гаворка ішла пра відэаролік, які Аляксей Арастовіч размясціў у сваім тэлеграм-канале. У ім ён гаварыў пра «рэйкавую вайну» ў Беларусі і Расіі як сродак спыніць расійскую армію. У Генпракуратуры інтэрпрэтавалі гэта як заклікі да здзяйснення актаў тэрарызму.

Тады ж Арастовіч пракаментаваў распачатую ў дачыненні яго крымінальную справу. Ён напісаў у сацсетках, што «гэта заклік да акта вайны, а не да тэрарызму» — і толькі супраць перавозак расійскіх войск.

Ён адзначыў, што «Беларусь удзельнічае ў ваеннай агрэсіі супраць Украіны, прадастаўляючы сваю тэрыторыю, ваенную і грамадзянскую інфраструктуру расійскім войскам, якія здзяйсняюць шматлікія злачынствы супраць Украіны». Таму ён лічыць, што яго заклікі «абсалютна законныя з пункту гледжання міжнароднага права».

Арастовіч прапанаваў супрацоўнікам Генпракуратуры РБ падумаць, чым асабіста для іх і для рэжыму Лукашэнкі скончыцца «пуцінская авантура».

«Цяперашняму рэжыму ў Беларусі даўно даў ацэнку беларускі народ, — напісаў Арастовіч. — І я яго (народ) разумею».

Нагадаем, што Аляксей Арастовіч напалову беларус. Яго бацька паходзіць са Слуцка, у Беларусі адзін з самых прыкметных сёння ваенных спікераў Украіны правёў частку дзяцінства.