Уладзімір Зяленскі: стаўленне беларусаў да ўкраінцаў нашмат лепшае, чым стаўленне расійцаў

Прэзідэнт Украіны Уладзімір Зяленскі лічыць, што Аляксандр Лукашэнка мусіць улічваць стаўленне беларусаў да вайны ва Украіне пры ажыццяўленні сваёй палітыкі ў дачыненні да Украіны.

«Я спакойна стаўлюся... Якім бы ні быў лідар у той ці іншай дзяржаве, ён павінен слухаць народ, які яго абраў. Усё роўна ён не можа праводзіць выключна сваю палітыку», — сказаў Уладзімір Зяленскі, каментуючы па просьбе журналістаў вынікі выбараў у Вугоршчыне.

У якасці прыкладу ён узгадаў Аляксандра Лукашэнку:

«Мы можам паглядзець на таго самага Лукашэнку. На жаль, такая сітуацыя, якая яна ёсць паміж нашымі дзяржавамі. І, на жаль, ракеты ляцелі ад яго, і ён цудоўна пра гэта ведае і разумее. Але мы бачым, што ён нешта, нейкія крокі ён там рабіў, каб не ўступіць цалкам у вайну. Не факт, што ён увойдзе, не факт, што не ўступіць. Мы гэтага не ведаем да канца. Вайна не закончылася, але тым не менш, таму што яму трэба глядзець на свой народ», — цытуе Зяленска беларускае радыё, прызнанае «эстрэмісцкім».

«А народ Беларусі супраць вайны з Украінай. Дарэчы, калі параўноўваць статыстыку, трагічную, дарэчы, статыстыку народу Расійскай Фэдэрацыі і народу Беларусі, то вы можаце пабачыць, што стаўленне Беларусі нашмат лепшае да ўкраінцаў, чым стаўленне расійцаў. Гэта праўда», — дадаў украінскі прэзыдэнт.

Украіна ад пачатку расійскага ўварвання ўвяла абмежаванні ў банкаўскай сістэме супраць грамадзян Беларусі, але так і не далучылася да міжнародных санкцый, уведзеных супраць Аляксандра Лукашэнкі і вайсковага кіраўніцтва Беларусі ўрадамі Вялікабрытаніі, ЗША, Канады, Швейцарыі, Аўстраліі, Японіі, а таксама Еўрапейскім Саюзам.