341-ы дзень на вайне. Расійцы абстралялі жылы дом у Харкаве

Па папярэдніх дадзеных, удар быў нанесены ракетай С-300. Дом часткова знішчаны. Жыхароў эвакуявалі.

У ноч на 30 студзеня расійскія вайскоўцы нанеслі ракетны ўдар па жылым чатырохпавярховым доме ў Кіеўскім раёне ў цэнтры Харкава, паведамляе кіраўнік ваеннай адміністрацыі Харкаўскай вобласці Алег Сінягубаў.

У выніку загінула адна мясцовая жыхарка, яшчэ тры чалавекі атрымалі раненні.

Ранішняя зводка Генштаба УСУ. Галоўнае
Вораг за мінулыя суткі нанёс адзін авіяцыйны і тры ракетныя ўдары, адзін з якіх — па Харкаву. Учыніў 44 абстрэлы з рэактыўных сістэм залпавага агню, у тым ліку і па населеных пунктах. Ёсць параненыя і загінулыя сярод мірнага насельніцтва.
Расійскія войскі вядуць наступальныя дзеянні на Ліманскім, Бахмуцкім, Аўдзееўскім і Навапаўлаўскім кірунках.
На іншых кірунках — абараняюцца.

Вораг працягвае несці страты. У адзін з моргаў Горлаўкі Данецкай вобласці, толькі 28 студзеня, прывезлі каля 20 цел загінулых з раёнаў Новабахмутоўкі і Маёрска.