503-ці дзень вайны: у Расіі забіваюць сваіх афіцэраў, Швецыя займела падтрымку Эрдагана

Сабралі самае асноўнае, што адбылося на фронце.

Ранішняя зводка Генштаба УСУ. Галоўнае

За мінулыя суткі Узброеныя сілы РФ нанеслі ракетны ўдар па аб'екце інфраструктуры ў Мікалаеве. Акрамя таго, расійскія войскі нанеслі 48 авіяцыйных удараў і здзейснілі 60 абстрэлаў з рэактыўных сістэм залпавага агню. Ёсць пацярпелыя сярод мірнага насельніцтва.

Расійскія сілы засяродзілі асноўныя намаганні на Купянскім, Ліманскім, Бахмуцкім, Аўдзееўскім і Мар'інскім напрамках. Працягваюцца цяжкія баі. За суткі адбылося 30 баявых сутыкненняў.

Узброеныя сілы Украіны адбілі атакі расійскіх сіл на Бахмуцкім напрамку ў раёне Грыгор'еўкі Данецкай вобласці, на Аўдзееўскім напрамку  — у раёне пасёлка Паўночнае, на Мар'інскім — у раёнах населеных пунктаў Мар'інка і Краснагораўка.

УСУ працягваюць весці наступальнай аперацыі на Мелітопальскім і Бярдзянскім напрамках, замацоўваюцца на дасягнутых рубяжах.

Авіяцыя УСУ за суткі нанесла 15 удараў па раёнах засяроджання асабовага складу, узбраення і ваеннай тэхнікі, падраздзяленні ракетных войскаў і артылерыі паразілі адзін пункт кіравання, тры раёны засяроджання жывой сілы, склад боепрыпасаў.

Расійскія войскі ў ноч на 11 ліпеня запусцілі па тэрыторыі Украіны 28 дронаў-камікадзэ «Шахед-136», паведаміла камандаванне Паветраных сіл УСУ. 26 беспілотнікаў збілі. У Кіеве і Кіеўскай вобласці збілі ўсе дроны, нацэленыя на сталіцу Украіны. У Кіеўскай вобласці абломкі аднаго з дронаў пашкодзілі прыватнае домаўладанне.

«Вагнераўцы» падчас мяцяжу набліжаліся да расійскай ядзернай базы — «Reuters»

Калі найміты ПВК« Вагнер» набліжаліся да Масквы 24 чэрвеня, частка байцоў падраздзялення рушылі па шашы ў напрамку базы расійскай арміі «Варонеж-45», на якой захоўваецца ядзерная зброя. Аднак прыкладна за 100 кіламетраў ад базы, у раёне пасёлка Таловая, сведчанні аб іх прасоўванні абрываюцца, піша «Reuters» са спасылкай на аналіз відэа і інтэрв'ю з мясцовымі жыхарамі.

Кіраўнік ваеннай выведкі Украіны Кірыл Буданаў сцвярджае, што байцы ПВК дасягнулі базы і хацелі атрымаць пераносныя ядзерныя зарады савецкага ўзору, якія захоўваюцца там, каб «падняць стаўкі». Але, дадаў Буданаў, «вагнераўцам» так і не ўдалося патрапіць на базу.

НАТА варта ўладкаваць пастаянныя базы ля расійскай мяжы, заявіў «The Times» прэзідэнт Літвы Гітанас Наўседа.

Стварэнне такіх баз забараняе акт аб адносінах і супрацоўніцтве НАТА з Расіяй, падпісаны ў 1997 годзе.

Але Наўседа лічыць, што гэта пагадненьне «мёртвае», паколькі Расія робіць захады па размяшчэнні тактычнай ядзернай зброі ў Беларусі.

Парламент Турцыі можа ратыфікаваць уступленне Швецыі ў НАТА да канца наступнага тыдня, паведамляе CNNTürk.

Швецыя падала заяўку на ўступленне ў НАТА летам 2022-га  разам з Фінляндыяй. Краіны прынялі рашэнне далучыцца да альянсу на фоне поўнамаштабнага ўварвання войскаў Расіі ва Украіну. Для ўступлення ў НАТА неабходна, каб заяўку краіны-кандыдата адобрылі ўсе ўдзельнікі альянсу.

Галоўнае ўпраўленне разведкі Мінабароны Украіны пацвердзіла, што ў Краснадары забіты намеснік начальніка гарадскога аддзела па мабілізацыйнай працы Станіслаў Ржыцкі. Раней аб забойстве Ржыцкага паведамілі расійскія СМІ, якія спаслаліся на крыніцы.