613-ты дзень поўнамаштабнай вайны Расіі супраць Украіны: апошнія навіны

Рэшткі групы Вагнера вядуць баі на Аўдзееўскім кірунку і падпарадкоўваюцца фармаванням, падкантрольным Мінабароны Расіі.

Як паведамляе Інстытут вывучэння вайны (ISW), расейскі вайсковы карэспандэнт апублікаваў 25 кастрычніка інтэрв'ю з камандзірам расейскага асобнага гвардзейскага батальёна спецыяльнага прызначэння «Арбат», які абслугоўвае Аўдзееўскі кірунак. Камандзір сцвярджаў, што частка батальёна «Арбат» амаль цалкам складаецца з былых вагнераўцаў. Паводле яго, Аўдзееўскі кірунак з'яўляецца «асноўным напрамкам» арбацкага батальёна, паколькі падраздзяленне ўваходзіць у склад «Дзікай дывізіі Данбаса» і брыгады «Пятнашка» — фарміравання самаабвешчанай Данецкай Народнай Рэспублікі (ДНР), якое адказвае за абарону Данецка. Камандуючы адзначыў, што падраздзяленне, укамплектаванае вагнераўцамі, па меры неабходнасці накіроўвае аператараў беспілотнікаў, спецыялістаў па радыёэлектроннай барацьбе (РЭБ) і іншых байцоў у іншыя часткі на розных участках фронту. Карэспандэнт таксама ўказаў, што батальён «Арбат» уваходзіць у склад Узброеных сіл Расеі, і цалкам імаверна, што брыгада складаецца з былых вайскоўцаў Вагнера, якія падпісалі кантракты непасрэдна з Мінабароны Расеі пасля бунту і/або яго смерці Яўгена Прыгожына.

Таксама паведамляецца, што камандуючы спецназам «Ахмат» Апты Алаудзінаў пацвердзіў вярбоўку Расгвардыяй былых «вагнераўцаў» у шэрагі гэтага чачэнскага падраздзялення. У інтэрв'ю ад 28 кастрычніка ён заявіў, што «вялікая» колькасць наймітаў расейскай ПВК далучылася да розных атрадаў кадыраўцаў і дзейнічае на некалькіх участках фронту ва Украіне.

*****

РФ ноччу ўдарыла па Украіне БПЛА, ракетай і авіябомбамі.

За мінулыя суткі адбылося каля 70 баявых сутыкненняў, паведамляе Генштаб УСУ. Усяго вораг нанёс 7 ракетных і 24 авіяцыйных удараў, здзейсніў 30 абстрэлаў з рэактыўных сістэм залпавага агню па пазіцыях украінскіх войскаў і населеных пунктах. У выніку ёсць загінулыя і параненыя сярод грамадзянскага насельніцтва. Разбураны і пашкоджаны прыватныя жылыя дамы і іншая грамадзянская інфраструктура. Акрамя таго, ноччу расейскія акупанты нанеслі чарговы ўдар па Украіне, ужыўшы 5 ударных БПЛА тыпу "Shahed-136/131". Украінскай супрацьпаветранай абаронай усе дроны былі знішчаны.

*****

Войскі РФ пачалі ўжываць абноўлены дрон-камікадзэ. 

Расейскія акупанты ў вайне супраць Украіны пачалі ўжываць абноўленую версію беспілотнікаў «Ланцэт», якую назвалі «Выраб-53», паведамляе ISW. Дрон нібыта абсталяваны сістэмай аўтаматычнага навядзення, і з яго дапамогай расейцы спадзяюцца абыходзіць СПА УСУ. Захопнікі плануюць масавыя сінхранізаваныя атакі. 

*****

Украіна і ЗША стварылі гібрыдныя сістэмы СПА FrankenSAM.

Неўзабаве на ўзбраенні УСУ з'явяцца гібрыдныя сістэмы супрацьпаветранай абароны (СПА), створаныя ўкраінскімі і амерыканскімі інжынерамі на базе заходняга і савецкага ўзбраення.

Як піша The New York Times, амерыканскія афіцыйныя асобы называюць гэтую праграму Frankencam.

«З набліжэннем зімы Украіна адчайна мае патрэбу ва ўзмацненні сродкаў супрацьпаветранай абароны, каб абараніць электрасеткі ад удараў Расеі, якія могуць пагрузіць краіну ў ледзяную цемру», — гаворыцца ў публікацыі.

*****

У Краснадарскім краі Расеі ў ноч на 29 кастрычніка адбыўся выбух на Афіпскім нафтаперапрацоўчым заводзе — гэта буйны НПЗ, які знаходзіцца каля пасёлка Афіпскі (праектная магутнасць па перапрацоўцы нафты — 6,25 млн тон у год).

Паводле звестак аператыўнага штаба, на заводзе было «лакальнае ўзгаранне», якое службы прадпрыемства «ліквідавалі цягам паўгадзіны», і прычыны інцыдэнту высвятляюцца. Telegram-Baza піша, што прыкладна ў 3:24 на тэрыторыю прадпрыемства ўпаў дрон.

Паводле папярэдніх звестак, ніхто не пацярпеў.