854-ты дзень вайны. Кіраўнік Пентагона і міністр абароны РФ «абмяняліся поглядамі аб сітуацыі вакол Украіны»

У NATO — новы генеральны сакратар. Кіраўнік Пентагона Лойд Осцін упершыню паразмаўляў па тэлефоне з міністрам абароны РФ Андрэем Белавусавым. А Уладзімір Зяленскі прыехаў у Данецкую вобласць. Распавядаем пра галоўныя падзеі чарговага дня поўнамаштабнай вайны Расіі супраць Украіны. 

Кіраўнік Пентагона Лойд Осцін упершыню паразмаўляў па тэлефоне з міністрам абароны РФ Андрэем Белавусавым

Кіраўнік Пентагона Лойд Осцін 25 чэрвеня правёў тэлефонную размову з міністрам абароны РФ Андрэем Белавусавым. Пра гэта паведаміў прэс-сакратар амерыканскага ваеннага ведамства Патрык Райдэр.

Падчас размовы Осцін заявіў аб важнасці захавання каналаў камунікацыі паміж ваеннымі ведамствамі ва ўмовах вайны Расіі з Украінай.

Прадстаўнік Пентагона нагадаў, што апошні раз Осцін меў зносіны з кіраўніком Мінабароны Расіі ў сакавіку 2023 года — тады гэтую пасаду займаў Сяргей Шайгу.

Мінабароны Расіі пацвердзіла, што паміж Белавусавым і Осцінам адбылася тэлефонная размова па ініцыятыве амерыканскага боку. У паведамленні ваеннага ведамства гаворыцца, што міністры абароны «абмяняліся поглядамі аб сітуацыі вакол Украіны».

Уладзімір Зяленскі прыехаў у Данецкую вобласць

Прэзідэнт Украіны запісаў відэа на ўездзе ў Пакроўск, запіс з'явіўся ў ягоных сацыяльных сетках;

Падчас візіту прэзідэнт Украіны прадставіў вайскоўцам новага камандуючага Аб'яднанымі сіламі генерала Андрэя Гнатава.

Па словах Зяленскага, ён правёў у Данецкай вобласці нараду па бяспецы і падтрымцы жыхароў.

«І будзе асобная размова ў Кіеве, у тым ліку з чыноўнікамі, якія павінны быць і тут, і ў іншых месцах паблізу фронту — у складаных супольнасцях, дзе людзям патрэбныя неадкладныя рашэнні. Рашэнні, якіх проста з Кіева не відаць. І быў здзіўлены, што некаторыя профільныя чыноўнікі не былі тут па паўгода і болей. Буду рабіць па іх адпаведныя высновы», — заявіў Зяленскі.

У NATO — новы генеральны сакратар

Амбасадары NATO зацвердзілі нідэрландскага палітыка Марка Рутэ ў якасці новага генеральнага сакратара альянсу, паведамляе AFP.

Адзіным прэтэндэнтам на пасаду генеральнага сакратара альянсу акрамя Рутэ быў прэзідэнт Румыніі Клаўс Ёханіс. 20 чэрвеня ён аб'явіў, што здымае сваю кандыдатуру. У той жа дзень усе 32 краіны, якія ўваходзяць у NATO, падтрымалі кандыдатуру Рутэ на пасаду генеральнага сакратара.

На пасадзе генсака NATO Рутэ зменіць Енса Столтэнберга, які сыдзе з пасады 1 кастрычніка.

Марк Рутэ — прэм'ер-міністр Нідэрландаў з 14 кастрычніка 2010 года.

Адэсу атакавалі балістычнай ракетай

Расійскія войскі ў ноч на 26 чэрвеня атакавалі Адэскую вобласць балістычнай ракетай, выпушчанай з комплексу «Іскандэр», паведаміў прадстаўнік Украінскай добраахвотніцкай арміі «Поўдзень» Сяргей Братчук.

Кіраўнік Адэскай вобласці Алег Кіпер заявіў, што расійскія войскі нанеслі ракетны ўдар па грамадзянскай інфраструктуры.

«У прамысловым сектары пашкоджаны адміністрацыйны будынак. На шчасце, людзі не пацярпелі», — паведаміў Кіпер.

Нікопальскі раён атакаваны цяжкай артылерыяй

Расійскія войскі ў ноч на 26 чэрвеня атакавалі Марганецкую абшчыну Нікопальскага раёна Днепрапятроўскай вобласці, паведаміў кіраўнік рэгіёну Сяргей Лысак.

Паводле яго слоў, войскі РФ вялі абстрэл пры дапамозе цяжкай артылерыі і дрона. «Пашкоджаны два прыватныя дамы, гаспадарчая пабудова, цяпліца і лінія электраперадачы», — паведаміў Лысак.

Паводле яго слоў, таксама пад абстрэл патрапіла Міроўская абшчына. Ніхто не пацярпеў.