862-гі дзень вайны: Ні адзін «Кінжал» не даляцеў да Кіева з траўня 2023 года

Украіна наносіць удары па расійскіх НПЗ у адказ на атакі па ўкраінскай энергетычнай інфраструктуры. Прэзідэнт Украіны прапанаваў заходнім партнёрам: «Наша пазіцыя простая: свету балюча, што мы б'ем па энергетыцы Расіі, — зрабіце так, каб Расія не біла па нашай энергетыцы».

Зяленскі: «Моцная Украіна — гэта праблемная Украіна, і многім яна не патрэбная»

Украіна гатовая пачаць контрнаступленне, калі Захад дапаможа ўкамплектаваць 14 новых брыгад УСУ, заявіў Уладзімір Зяленскі ў інтэрв'ю Bloomberg: «У нас стаяць брыгады без зброі. У нас стаяць рэзервы. У нас стаяць 14 брыгад неўкамплектаваных, у якіх няма адпаведнай зброі, за якую ўжо галасавалі, пра якую ўжо казалі. Пакеты павінны прыходзіць, але яны ідуць, на жаль, павольна».

Зяленскі пракаментаваў магчымасць уступлення Украіны ў NATO без акупаваных тэрыторый: «Я з'яўляюся прэзідэнтам і гарантам Канстытуцыі, І калі мы гаворым пра нейкія змены адносна нашых тэрыторый — гэта змены Канстытуцыі і гэта злачынства. І таму калі нам прапануюць нямецкую мадэль ці яшчэ якую-небудзь, карэйскую і г.д., у любым выпадку трэба разумець, што нам прапануюць, хто нам прапануе, для чаго гэта робіцца. А пасля гэтага зразумець меркаванне ўсіх нас. Не толькі маё, а перш за ўсё грамадства, народа Украіны», — піша korrespondent.net.

Таксама ўкраінскі прэзідэнт лічыць, што многім было б выгадна, калі б Украіна была слабая: «Украіна, пра якую ніхто не кажа і пра якую ніхто не чуе, задаволіла б многіх. Моцная Украіна — гэта праблемная Украіна, і многім яна не патрэбная».

Зяленскі заявіў, што нельга проста казаць аб спыненні агню, патрэбны план. Так ён пракаментаваў  прапанову Орбана: «Мы ў прынцыпе не можам давяраць Пуціну, таму што для нас ён забойца і агрэсар. Важна, што Венгрыя прызнае, што Расія — агрэсар, прызнае тэрытарыяльную цэласнасць і суверэнітэт Украіны». Украінскі прэзідэнт нагадаў, што ва Украіны былі «сотні сустрэч» яшчэ з часоў Мінскіх пагадненняў з дамоўленасцямі аб перамір'і, але Расія кожны раз гэтыя дамоўленасці парушала.

Таксама прэзідэнт Украіны ў інтэрв'ю Bloomberg заявіў, што Украіна наносіць удары па расійскіх НПЗ у адказ на атакі па ўкраінскай энергетычнай інфраструктуры: «Наша пазіцыя простая: свету балюча, што мы б'ем па энергетыцы Расіі, — зрабіце так, каб Расія не біла па нашай энергетыцы».

Politico: Трамп вядзе перамовы з Пуціным аб тым, «колькі ўкраінскай тэрыторыі можа пакінуць за сабой Масква»

ВПС: Ні адна ракета «Кінжал» не даляцела да Кіева з траўня 2023 года 

Расія ўначы атакавала дронамі Кіеў. Як распавёў начальнік КГВА Сяргей Папко, ударныя беспілотнікі набліжаліся хвалямі і з розных напрамкаў, усе яны былі знішчаныя на подступах да сталіцы. Паводле папярэдняй інфармацыі, ахвяр і разбурэнняў няма.

Усе расійскія балістычныя ракеты «Кінжал», якія былі запушчаныя па сталіцы Украіны пасля атрымання ЗРК «Пэтрыёт», былі паспяхова перахопленыя. Агулам у Кіеве захопнікі выпусцілі ўжо больш за 20 «Кінжалаў», піша РБК-Украіна са спасылкай на заяву камандзіра 96-й зенітна-ракетнай брыгады палкоўніка ВПС Сяргея.

«Калі мы працуем супраць балістыкі, нам усё роўна, ці гэта Х-47М «Кінжал», ці «Іскандэр-М», ці 48Н (ракета з С-400), ці «Цыркон», які запускаецца з ракетнага комплексу «Бастыён», — адзначыў Ярэменка.

Ён растлумачыў, што для ВПС гэта, перш за ўсё, балістычная цэль, і толькі потым аналітыкі, эксперты па пэўных характарыстыках, пошуку абломкаў вызначаюць, якая гэта была паветраная цэль.

«Скажу толькі адно: усе «Кінжалы», якія былі запушчаныя над сталіцай Украіны, з моманту абвяшчэння аб заступленні на баявое дзяжурства зенітна-ракетнага комплексу «Пэтрыёт», усе былі паспяхова перахопленыя», — падкрэсліў Ярэменка.

Як растлумачыў палкоўнік, з пачатку мая 2023 года ніводная балістычная цэль не дасягнула сваёй мэты ў межах сталіцы нашай краіны. Усяго па «Кіеву» было запушчана больш за 20 «Кінжалаў», якія былі паспяхова перахопленыя.

Чаму цяпер Расія спыніла актыўныя абстрэлы Кіева? Ярэменка лічыць, што гэта не звязана з тым, што ВПС эфектыўна адбіваюць атакі.

«Расія, маючы наяўныя сродкі, вызначае пералік аб'ектаў для нанясення ўдараў. Магчыма, у гэты перыяд яе цікавяць і іншыя аб'екты. Але перыядычна, вядома, важныя дзяржаўныя аб'екты ў Кіеўскай вобласці таксама знаходзяцца пад уплывам праціўніка. Ён можа наносіць удары кожны дзень, кожную секунду, у любы час сутак», — запэўніў камандзір брыгады.

Што вядома пра расійскія ракеты «Кінжал»

• «Кінжал» — расійская аэрабалістычная ракета з магчымасцю несці ядзерны зарад. Пасля паспяховых выпрабаванняў комплекс быў прыняты на ўзбраенне — і з 1 снежня 2017 года заступіў на баявое дзяжурства на аэрадромах Паўднёвай ваеннай акругі.
• Нагадаем, апошні раз расіяне абстрэльвалі сталіцу Украіны з «Кінжалаў» у траўні 2023 года, тады ў выніку атакі акупантаў пацярпелі сем чалавек.

• Супрацьпаветраная абарона Украіны ўначы знішчыла 21 з 22 БПЛА тыпу Shahed-131/136, якімі Расія атакавала з Курскай вобласці, паведамілі ў паветраных сілах. Дроны збітыя ў межах Кіеўскай, Чарнігаўскай, Жытомірскай, Сумскай, Днепрапятроўскай і Палтаўскай абласцей.

Бербок: Расія становіцца самай вялікай пагрозай для бяспекі Еўропы

Міністр замежных спраў Германіі Аналена Бербок папярэдзіла, што NATO павінна працягваць падтрымку Украіны. Таму што Расія застаецца самай вялікай пагрозай для бяспекі Еўропы, піша РБК са спасылкай на Der Standard.

«У агляднай будучыні Расія застанецца самай вялікай пагрозай для нашай бяспекі і свабоды ў Еўропе. Захад павінен прыняць меры для абароны свабоды і дэмакратыі. Мы гэтага не выбіралі. Мы гэтага не хацелі», — сказала яна.

Па словах Бербок, асаблівая адказнасць за гэта ляжыць на Германіі, якая дзякуючы сваёй палітыцы ў дачыненні да Расіі аднавіла страчаны давер.

«Мы не павінны рызыкаваць гэтым падчас перамоваў па бюджэце», — папярэдзіла міністр у сувязі з працягваецца спрэчкай у нямецкай кааліцыі наконт бюджэту на 2025 год.

У NATO ёсць план, як дапамагаць Украіне, калі здарыцца перамога Трампа на выбарах у ЗША

Навіны вайны

• Па стане на сённяшні дзень ва Украіне налічваецца каля 11,1 мільёна мужчын ад 25 да 60 гадоў, якія патэнцыйна падлягаюць мабілізацыі. З іх забраніравана 565 тысяч, паведаміў народны дэпутат Дзмітрый Наталуха.

• З-за расійскага ўдару па Палтаўскай вобласці 3 ліпеня быў пашкоджаны аб'ект Укргаздобычы, паведамілі ў кампаніі. У выніку атакі загінуў супрацоўнік кампаніі, таксама ёсць іншыя пацярпелыя работнікі. Працягваюцца работы па лакалізацыі і ліквідацыі наступстваў надзвычайнай сітуацыі. У Мінэнерга ўдакладнілі, што загінуў электраманцёр Укргаздобычы, яшчэ трое супрацоўнікаў параненыя.

• Колькасць пацярпелых у выніку ўчорашняй атакі па Дняпры павялічылася да 55, шэсць чалавек загінулі, паведаміў офіс генпракурора Украіны.

• У Нікапалі Днепрапятроўскай вобласці ў выніку сённяшніх абстрэлаў параненыя сем чалавек, паведаміў кіраўнік АВА Сяргей Лысак.

• У Херсонскай вобласці за мінулыя суткі ў выніку расійскіх абстрэлаў адзін чалавек загінуў, сямёра атрымалі раненні, паведаміў кіраўнік АВА Аляксандр Пракудзін.

• У Данецкай вобласці за 3 ліпеня ў выніку расійскіх абстрэлаў параненыя тры чалавекі — у Дружкоўцы, паведаміў кіраўнік АВА Вадзім Філашкін.

• У Запарожскай вобласці за мінулыя суткі два чалавекі загінулі ў выніку варожых абстрэлаў Васільеўскага і Полагаўскага раёнаў. Яшчэ адзін чалавек паранены ў выніку расійскіх нападаў па Запарожскім раёне, паведаміў кіраўнік ОВА Іван Фёдараў.

• У Чарнігаўскай вобласці падчас начной атакі расійскі «Шахед» трапіў у адзін з аб'ектаў, без электразабеспячэння засталіся 5963 спажыўца, паведаміў кіраўнік АВА Вячаслаў Чавус.

• Украінскі Генштаб агучыў прыкладныя страты РФ на раніцу 4 ліпеня: асабовага складу —каля 547 470 (+1200 за мінулыя суткі) чалавек, танкаў — 8132 (+9), баявых браніраваных машын —15 600 (+17), артылерыйскіх сістэм — 14 777 (+65), БПЛА аператыўна-тактычнага ўзроўню — 11 694 (+26), крылатых ракет — 2342 (+6), аўтамабільнай тэхнікі і аўтацыстэрнаў — 19 923 (+73), спецыяльнай тэхнікі — 2468 (+4).

За мінулыя суткі на фронце зафіксавана 161 баявое сутыкненне, паведаміў Генштаб. Войскі РФ значна актывізаваліся на Тарэцкім кірунку — здзейснілі 25 атак, у тым ліку ў раёнах населеных пунктаў Дыліеўка, Тарэцк, Паўночнае і Нью-Ёрк Данецкай вобласці. Яшчэ 37 атак адбіта на Пакроўскім кірунку — паблізу населеных пунктаў Калінава, Новааляксандроўка, Ваздзвіжанка, Яўгеньеўка, Прагрэс, Уманскае, Карлаўка Данецкай вобласці. На Ліманскім кірунку Сілы абароны Украіны адбілі 32 варожыя атакі ў раёнах населеных пунктаў Грэкаўка, Макееўка, Неўскае Луганскай вобласці, Церны Данецкай вобласці і Серабранскага лясніцтва.