769-ы дзень вайны: Орбан прапанаваў Зяленскаму спыніць агонь яшчэ да пачатку мірных перамоваў

Венгерскі прэм'ер упершыню з пачатку вайны прыбыў у Кіеў і сустрэўся з Уладзімірам Зяленскім. Віктар Орбан лічыць, што яго прапанова можа паскорыць мірныя перамовы з Расіяй. Украінскія пілоты нанеслі сакрушальны ўдар па складзе боепрыпасаў РФ. Расійскія войскі наступаюць на Харкаў. 

Пасля перамоваў з Зяленскім Орбан заявіў, што заклікаў украінскага лідара падумаць аб спыненні агню яшчэ да перамоваў

Прэм'ер-міністр Венгрыі Віктар Орбан прыбыў у Кіеў сёння, 2 ліпеня, і заявіў, што яго візіт у Кіеў звязаны са старшынствам Будапешта ў Еўрасаюзе. Перад візітам ён паабяцаў зрабіць «першы крок» да ўсталявання міру ва Украіне.

Прэм'ер-міністр Венгрыі Віктар Орбан прапанаваў прэзідэнту Уладзіміру Зяленскаму спыніць агонь да пачатку мірных перамоваў. Гэта стала вядома з прэс-канферэнцыі Орбана і Зяленскага ў Кіеве.

Паводле слоў Орбана, вайна вельмі моцна ўплывае на бяспеку Еўропы.

Ён заявіў, што высока цэніць усе ініцыятывы прэзідэнта Зяленскага дзеля дасягнення міру, але гэтыя ініцыятывы займаюць шмат часу. Менавіта з-за правілаў міжнароднай дыпламатыі яны складаныя.

«І я папрасіў спадара прэзідэнта падумаць, ці можна пайсці крыху па-іншаму. Зрабіце паўзу. Спыніце агонь, а потым працягвайце, пачынайце перамовы», — сказаў Орбан.

Орбан сказаў, што спыненне агню магло б паскорыць тэмп гэтых перамоваў. «Я сказаў гэта прэзідэнту, і я ўдзячны прэзідэнту за адкрытае меркаванне па гэтым пытанні», — дадаў прэм'ер-міністр Венгрыі.

• Зяленскі пра візіт Орбана: «Будзем абмяркоўваць, як забяспечыць справядлівы і працяглы мір»

Прэзідэнт Украіны Уладзімір Зяленскі ў сваіх сацыяльных сетках распавёў аб ходзе візіту ў Кіеў прэм'ер-міністра Венгрыі Віктара Орбана. «Сёння мы будзем казаць пра тое, як забяспечыць справядлівы і працяглы мір», — напісаў Зяленскі.

Ён таксама падзякаваў Венгрыю за ўдзел у Глабальным саміце міру, які нядаўна адбыўся ў Швейцарыі.

Зяленскі наўпрост не адказаў на прапанову аб спыненні агню, што, нібыта, можа паскорыць мірныя перамовы з Расіяй. Украінскі прэзідэнт, распавядаючы пра вынікі перамоваў, зрабіў акцэнт на двухбаковых украінска-венгерскіх стасунках.

Ён паведаміў, што абмеркаваў з Орбанам «самыя прынцыповыя пытанні нашых суседскіх адносін — гандаль, трансгранічнае супрацоўніцтва, інфраструктурныя і энергетычныя пытанні».

Зяленскі выказаў надзею, што «змест нашага дыялогу можа стаць асновай для новага двухбаковага дакумента паміж нашымі дзяржавамі — дакумента, які будзе рэгуляваць усе нашы ўзаемаадносіны» і «будзе заснаваны на люстраным падыходзе».

Зрэшты, Орбан, які вядомы сваім сяброўствам з Уладзімірам Пуціным, пастаянна блакуе дапамогу ЕС Украіне. Венгрыя — адзіная краіна ў Еўропе, якую ўкраінцы ўспрымаюць варожа.

Зяленскі: «Мы і Захад па-рознаму ўяўляем перамогу»

Расіяне атакуюць Харкаў

Сёння, 2 ліпеня, расійскія войскі наступаюць на Харкаў. У Харкаўскай вобласці аб'яўлена паветраная трывога. Пра гэта піша РБК-Украіна са спасылкай на мэра Харкава Ігара Церахава ў Telegram, кіраўніка Харкаўскай АВА Алега Сінягубава ў Telegram і ВПС Узброеных сіл Украіны ў Telegram. 

Церахаў заявіў, што ў Харкаве чуваць моцны шум. Ён заклікаў мясцовых жыхароў быць асцярожнымі.

У сваю чаргу, Сінягубаў адзначыў, што расіяне наносяць удары.

Перад выбухамі ў Харкаве ВПС папярэджвалі аб пуску кіраваных авіябомбаў (КАБ) у бок горада.

• Выбухі ў Харкаве

Варта адзначыць, што Харкаў амаль рэгулярна падвяргаецца расійскім абстрэлам, бо знаходзіцца непадалёк ад мяжы з РФ. Часцей за ўсё для ўдараў па горадзе РФ выкарыстоўвае кіраваныя авіябомбы (КАБ), якія валодаюць значнай разбуральнай сілай.

Але такія авіябомбы не заўсёды дасягаюць мэты. Часам яны падаюць на тэрыторыю Белгарадскай вобласці. Учора, 1 ліпеня, The Washington Post напісала, што за год расіяне скінулі на Белгарадскую вобласць каля 40 авіябомб. Пра гэта гаворыцца ў перахопленым унутраным дакуменце РФ.

Брытанская выведка патлумачыла адпраўку Масквой тысяч мігрантаў на фронт

Масква адпраўляе на вайну з Украінай тысячы мігрантаў з Цэнтральнай Азіі, каб не браць у войска больш палітычна актыўных людзей, піша Міністэрства абароны Вялікабрытаніі ў Х (Twitter).

Як адзначаецца ў зводцы, кіраўнік Следчага камітэта Расіі Аляксандр Бастрыкін, калі выступаў на Пецярбургскім міжнародным юрыдычным форуме 27 чэрвеня 2024 года, заявіў, што расійскія ўлады выявілі 30 тысяч мігрантаў, якія нядаўна сталі грамадзянамі Расіі і з'яўляюцца не на вайсковым уліку.

Бастрыкін таксама пахваліўся, што 10 тысяч з іх ужо адправілі ва Украіну. Ён сцвярджаў, што гэтыя перасяленцы будуць капаць акопы і выконваць іншыя абавязкі ў тылавых раёнах.

Паводле брытанскай выведкі, расійскія незалежныя СМІ раней паведамлялі, што сілы бяспекі вядуць кампанію легальнага пераследу мігрантаў, у прыватнасці з Цэнтральнай Азіі, спрабуючы заахвоціць іх далучыцца да расійскай арміі ў абмен на грамадзянства або каб пазбегнуць арышту па сфабрыкаваных справах..

«Гэта, верагодна, яшчэ адзін геніяльны спосаб стымуляваць набор у войска, спрабуючы пры гэтым абмежаваць уплыў на тыя часткі расійскага насельніцтва, якія праяўляюць большую палітычную актыўнасць», — адзначаюць у брытанскім Мінабароны.

Нагадаем, Крэмль імкнецца пазбегнуць другой хвалі непапулярнай мабілізацыі пасля таго, як у верасні 2022 года прызыў 300 тысяч расіян справакаваў паніку і ўцёкі з краіны. Замест гэтага ўлада спрабуе цяпер завабіць людзей у войска грашыма.

УСУ знішчылі склад боепрыпасаў у Крыме

Украінскія пілоты нанеслі паспяховы ўдар па складзе боепрыпасаў у часова акупаваным Крыме. Пра гэта паведаміў камандуючы паветраных сіл УСУ Мікалай Аляшчук у Telegram у аўторак, 2 ліпеня.

Паводле яго слоў, у чарговы раз нібыта «знішчаная» прапагандай РФ украінская авіяцыя працягвае выконваць баявыя задачы і наносіць ракетна-бомбавыя ўдары па пазіцыях акупантаў, а таксама знішчаць ваенныя аб'екты ў глыбокім тыле расіян.

«1 ліпеня 2024 года ўкраінскія пілоты нанеслі зруйнавальны ўдар па складзе боепрыпасаў у Крыме», — напісаў ён.

Напярэдадні выбухі прагрымелі ў акупаваным РФ Севастопалі. Расіяне паспяшаліся запэўніць, што былі «знішчаныя чатыры паветраныя мэты», аднак над горадам падняўся чорны дым.

А 25 чэрвеня ў раёне мыса Чауда ў Крыме ўспыхнуў моцны пажар. На мысе размешчаны ваенныя аб'екты расіян, у прыватнасці месца пуску «Шахедаў».

У NATO ёсць план, як дапамагаць Украіне, калі здарыцца перамога Трампа на выбарах у ЗША

Навіны вайны

• Расіяне 1 ліпеня нанеслі ўдар па аэрадроме ў Міргарадзе Палтаўскай вобласці, пішуць паблікі. Пры гэтым расіяне заяўляюць аб нібыта знішчэнні чатырох украінскіх Су-27 і пашкоджанні яшчэ двух. Украінскія маніторынгавыя паблікі сцвярджаюць, што страты УСУ значна меншыя. Былы спікер УСУ Юрый Ігнат удар пацвердзіў: «Удар быў. Ёсць пэўныя страты, але зусім не такія, як прыпісвае сабе вораг, урэшце, яны заўсёды так робяць з пачатку ўварвання. Не ўсё так страшна, як вы, украінцы, пішаце на эмоцыях».
• У Данецкай вобласці за мінулыя суткі ў выніку расійскіх абстрэлаў 27 чалавек атрымалі раненні, яшчэ чацвёра загінулі — двое ва ўкраінскую, па адной у Навадзмітроўцы і Селідава, паведаміў кіраўнік АВА Вадзім Філашкін.
• Раніцай расійскія войскі атакавалі Херсон, адзін чалавек паранены, паведаміла АВА. За папярэднія суткі ў вобласці ў выніку расійскіх абстрэлаў параненыя дзевяць чалавек.
• У Запарожскай вобласці два чалавекі параненыя ў выніку расійскіх атак на Васільеўскі і Полагаўскі раёны, паведаміў кіраўнік АВА Іван Фёдараў. 
• У Дняпры ратавальнікі раніцай знайшлі цела жанчыны ў доме, разбураным у выніку расійскага ўдару 28 чэрвеня. Такім чынам, ужо вядома пра двух чалавек, якія загінулі ў выніку ўдару, паведаміў кіраўнік АВА Сяргей Лысак. Работы працягваюцца, разабрана ўжо каля 70% канструкцый.
• Колькасць параненых у выніку сённяшніх абстрэлаў Херсона ўзрасла да сямі, адзін чалавек загінуў, паведаміў кіраўнік АВА Аляксандр Пракудзін.
• У Нікапалі Днепрапятроўскай вобласці ў выніку сённяшняй расійскай атакі, паводле папярэдняй інфармацыі, два чалавекі загінулі, дзевяць параненыя, сярод іх дзевяцігадовае дзіця і 17-гадовы падлетак, паведаміў кіраўнік АВА Сяргей Лысак.

Украінскі Генштаб агучыў арыенціровачныя страты РФ паводле стану на 2 ліпеня:  асабовага складу — каля 545 090 (+1280) чалавек, танкаў — 8107 (+8), баявых браніраваных машын — 15 566 (+16),  артылерыйскіх сістэм — 14 655 (+56), РСЗА — 1114 (+3), БПЛА аператыўна-тактычнага ўзроўню — 11 641 (+21), крылатых ракет —2335 (+2),  аўтамабільнай тэхнікі і аўтацыстэрнаў —19 787 (+74), спецыяльнай тэхнікі — 2452 (+4).

Навіны заходніх партнёраў Украіны

Нідэрланды гатовыя адправіць Украіне першыя F-16. Міністр абароны Кайса Олангрэн у сваім лісце ў Палату прадстаўнікоў Нідэрландаў паведаміла аб завяршэнні афармлення дазволу на экспарт 24 знішчальнікаў F-16 ва Украіну. Першы з іх павінны перадаць «у хуткім часе», дакладная дата адпраўлення не згадваецца.

NATO на сваім саміце ў Вашынгтоне 11 ліпеня абвесціць аб прызначэнні адказнага за доўгатэрміновую дапамогу Украіне, піша The Wall Street Journal. Мяркуецца, што высокапастаўлены грамадзянскі чыноўнік у Кіеве засяродзіцца на доўгатэрміновых патрэбах Украіны ў ваеннай мадэрнізацыі і неваеннай падтрымцы. Выданне адзначае, што краіны NATO падрыхтавалі новыя захады доўгатэрміновай падтрымкі Украіны на выпадак перамогі Трампа ў ЗША і правых у Еўропе.

Кіраўнік Пентагона Лойд Осцін на сустрэчы з Рустэмам Умеравым анансаваў наданне Украіне вайсковай дапамогі на 2,3 мільярда долараў. З ягоных слоў, аб пакеце павінны афіцыйна абвясціць «найбліжэйшым часам». У яго ўвойдзе, у прыватнасці, процітанкавая зброя, перахопнікі і боепрыпасы для Patriot і іншых сістэм СПА.