Беларусь прэтэндуе на месца правядзення перамоў Пуціна і Зяленскага — але без імпэту
Прадстаўніца Лукашэнкі Наталля Эйсмант заявіла, што РБ «не імкнецца» да ролі пасярэдніка, але гатова арганізаваць сустрэчу Пуціна і Зяленскага на сваёй тэрыторыі. Таксама выказалі жаданне прыняць саміт Венгрыя і Аўстрыя. А пакуль ідуць размовы, ва Украіне працягваюцца баявыя дзеянні. Ідуць 1274-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
За мінулыя суткі ва Украіне адбылося 175 баявых сутыкненняў, паведамляе Генштаб УСУ ў ранішняй зводцы 20 жніўня.
На Пакроўскім кірунку абаронцы Украіны спынілі 50 штурмаў расіян ў раёнах Уладзіміраўкі, Маяку, Ніканараўкі, Новаэканамічнага, Чырвонага Ліману, Радзінскага, Лісоўкі, Зверава, Удалага, Нованікалаеўкі і іншых.
На Ліманскім кірунку расійцы атакавалі 33 разы каля Зялёнай Даліны, Студні, Мірнага, Торскага і іншых.
На Новапаўлаўскім кірунку УСУ спынілі 28 атак расіян ў раёнах Грушаўкі, Зялёнага Гаю, Цеміраўкі, Васкрасенкі, Зялёнага Поля.
На Тарэцкім кірунку адбылося 10 атак арміі РФ у раёнах Тарэцка, Шчарбінаўкі, Яблонаўкі і Палтаўкі.
На Паўночна-Слабажанскім (Курскім) кірунку за мінулыя суткі адбылося сем баявых сутыкненняў.
* * *
Расійскія войскі дасягнулі пэўнага поспеху ў раёне Серабранскага лясніцтва і паблізу населенага пункта Альгоўскае, паведамляе аналітычны праект DeepState у ноч з 19 на 20 жніўня.
Згодна з абнаўленнямі карты баявых дзеянняў, тэрыторыя, якая раней заставалася адносна стабільнай і непрыдатнай для наступальных дзеянняў, цяпер стала зонай актыўных баявых сутыкненняў. Расійскія падраздзяленні спрабуюць пранікаць у слаба абароненыя ўчасткі, замацоўвацца ў тыле і ствараць новыя пагрозы. Гэтыя манеўры часта суправаджаюцца нечаканымі атакамі.
* * *
У ноч на 20 жніўня Расія нанесла масіраваны ўдар беспілотнікамі па горадзе Ахтырка на Сумшчыне. Пацярпеў шматкватэрны дом, 13 прыватных дамоў, гаспадарчая пабудова і гараж. У выніку атакі раненні атрымалі 12 чалавек, сярод якіх двое дзяцей.
Расійская армія гэтай ноччу дронамі атакавала Адэскую вобласць. Пад ударам быў Ізмаільскі раён. У выніку атакі пашкоджана прыпартовая інфраструктура, пацярпеў адзін чалавек.
* * *
* * *
Прэс-сакратарка Белага дома Кэралайн Левіт на брыфінгу ў аўторак пацвердзіла, што кіраўнік РФ Уладзімір Пуцін пагадзіўся на двухбаковую сустрэчу з прэзідэнтам Украіны Уладзімірам Зяленскім.
«Прэзідэнт (Трамп) заўсёды казаў, што ў гэтай вайне ёсць пытанні, па якіх існуюць рознагалоссі, якія павінны быць абмеркаваны і вырашаны гэтымі дзвюма краінамі. Таму ён хоча, каб гэтыя дзве краіны ўступілі ў прамыя дыпламатычныя перамовы», — сказала яна.
На ўдакладненне, ці пацвердзіў Пуцін у размове з Трампам гатоўнасць да двухбаковай сустрэчы з Зяленскім, прэс-сакратар Белага дома некалькі разоў гэта пацвердзіла.
«Гэтая ідэя ўзнікла падчас перамоваў прэзідэнта з Пуціным, Зяленскім і еўрапейскімі лідарамі. І, як вы бачылі, усе еўрапейскія лідары, якія пакінулі Белы дом, уключаючы генеральнага сакратара NATO, пагадзіліся, што гэта выдатны першы крок», — адзначыла Левіт.
* * *
У рамках сустрэчы ў Белым доме блізу 10 краін гатовыя былі адправіць свае войскі ва Украіну для гарантый бяспекі. Гэтыя войскі будуць навучаць украінскіх байцоў, калі баявыя дзеянні скончацца, піша Bloomberg.
«Пакет гарантый бяспекі для Украіны будзе сфармаваны ўжо на гэтым тыдні, калі лідары скарыстаюцца падтрымкай прэзідэнта Дональда Трампа паводле плана, што прадугледжвае ўвядзенне еўрапейскіх войскаў у рамках патэнцыйнага мірнага пагаднення», — рассказвае выданне.
Пасля таго, як у панядзелак на саміце ў Белым доме была пацверджана больш цвёрдая прыхільнасць ЗША гарантыям, еўрапейскія лідары імкнуцца выкарыстоўваць прапанову Трампа. Па словах людзей, дасведчаных у гэтым пытанні, сустрэча еўрапейскіх чыноўнікаў у аўторак засяродзілася на плане адпраўкі брытанскіх і французскіх войскаў ва Украіну ў рамках мірнага пагаднення, уключаючы колькасць і пазіцыі вайскоўцаў.
Аднак якой менавіта будзе падтрымка з боку ЗША, застаецца незразумелым. У брытанскім урадзе заявілі, што еўрапейскія вайскоўцы сустрэнуцца з амерыканскімі калегамі ў найбліжэйшыя дні, каб абмеркаваць «надзейныя гарантыі бяспекі і падрыхтавацца да разгортвання сіл заспакаення, калі баявыя дзеянні скончацца». Еўрапейскія чыноўнікі чакаюць, што ЗША, як мінімум, будуць працягваць прадастаўляць выведвальныя даныя і ваеннае абсталяванне праз партнёраў.
* * *
Вашынгтон можа даць Украіне падтрымку ў паветры ў рамках патэнцыйнага мірнага пагаднення з Расіяй, заявіў прэзідэнт ЗША Дональд Трамп, паведамляе Sky News.
«Калі гаворка ідзе пра бяспеку, еўрапейцы гатовыя адправіць людзей на месца. Мы гатовыя дапамагчы ім у некаторых пытаннях, асабліва, верагодна, з паветра», — сказаў ён.
Пры гэтым ён паўтарыў, што амерыканскія салдаты не будуць адпраўленыя ва Украіну.
Прэс-сакратарка Белага дома Караліна Левіт заявіла журналістам, што паветраная падтрымка ЗША з'яўляецца «варыянтам і магчымасцю».
«Прэзідэнт выразна заявіў, што амерыканскія войскі не будуць ва Украіне, але мы, безумоўна, можам дапамагчы ў каардынацыі і, магчыма, даць іншыя сродкі гарантый бяспекі нашым еўрапейскім саюзнікам», — адзначыла яна.
Як пісалі СМІ, будучыя гарантыі бяспекі для Украіны могуць уключаць чатыры ключавыя кампаненты: вайсковая прысутнасць; сістэмы супрацьпаветранай абароны; пастаўкі ўзбраення; маніторынг спынення баявых дзеянняў.
* * *
Аўстрыя, Венгрыя і Беларусь заявілі пра гатоўнасць правесці саміт прэзідэнта Украіны Уладзіміра Зяленскага і расійскага дыктатара Уладзіміра Пуціна.
Прэм'ер-міністр Аўстрыі Крысціян Штокер падкрэсліў гістарычную ролю Вены як платформы для міжнароднага дыялогу, у прыватнасці дзякуючы шматлікім арганізацыям, якія маюць тут свае штаб-кватэры, сярод якіх вылучыў АБСЕ, паведамляе Vienna Online.
Што тычыцца выдадзенага Міжнародным крымінальным судом ордэра на арышт расійскага кіраўніка, урад Аўстрыі падкрэсліў неабходнасць узгадніць пытанне ўдзелу Пуціна ў магчымых перамовах з судом. У выпадку правядзення сустрэчы, Вена абяцае супрацоўнічаць з МКС праз дзеючыя пагадненні паміж сталіцай і міжнароднымі арганізацыямі для забеспячэння ўдзелу Пуціна.
Паводле інфармацыі Bloomberg, прэм'ер-міністр Венгрыі Віктар Орбан падчас тэлефоннай размовы з Трампам з нагоды зняцця блакавання ўступлення Украіны ў ЕС, прапанаваў Будапешт як магчымае месца для правядзення сустрэчы паміж Пуціным і Зяленскім. Прэс-сакратарка Белага дома Кэралайн Левіт адмовілася паведамляць, ці разглядаецца ўсур'ёз варыянт правядзення саміту ў Венгрыі.
Беларусь выказала гатоўнасць прыняць саміт. Прадстаўніца Лукашэнкі Наталля Эйсмант заявіла, што дзяржава не імкнецца да ролі пасярэдніка, але гатова арганізаваць сустрэчу, калі гэта будзе спрыяць міру ва Украіне, паведамляе РБК.