«Быў упэўнены, што не прычыню нікому шкоды»

Расеец, які адкрыў стральбу ў ваенкамаце, патлумачыў матывы.

Жыхар Іркуцкай вобласці Руслан Зінін, які адкрыў стральбу ў ваенкамаце Усць-Ілімска (Іркуцкая вобласць), напісаў адкрыты ліст, у якім патлумачыў матывы сваіх дзеянняў.

Па словах Зініна, ён прыйшоў у ваенкамат з упэўненасцю, што ў яго сілах будзе не дапусціць мабілізацыі малодшага брата, якому напярэдадні прыйшла позва. «Я таксама да апошняга моманту быў свята ўпэўнены, што не прычыню нікому якой-небудзь шкоды. Я катэгарычна супраць гвалту з малых гадоў, усе, хто мяне блізка ведаюць, могуць гэта пацвердзіць», — падкрэсліў Зінін.

Мужчына распавёў, што яго «па сёння мучаюць кашмары», пасля таго, як ён убачыў пасмяротныя фота свайго 18-гадовага школьнага прыяцеля, які быў прызваны на тэрміновую службу ў лістападзе 2021 года і загінуў у першыя дні вайны ва Украіне. «Уявіўшы на імгненне, што мне калі-небудзь, не дай Бог, прыйдзецца ўбачыць такім свайго роднага чалавека, я зразумеў, што не змагу жыць далей, ведаючы, што нічога не распачаў, каб гэтага не дапусціць, і гатовы быў з голымі рукамі кінуцца пад танк за любога з сваіх братоў», — адзначыў Зінін.

Па словах мужчыны, брат, якому прыйшла павестка, меў, як і сам Зінін, прафесію ваеннага вадзіцеля, якая ва ўмовах вайны фактычна рабіла яго «смяротнікам».

Як у казцы: Жонкі мабілізаваных прыехалі ў вайсковую частку вяртаць сваіх мужоў з перадавой. І некаторых вярнулі!

«Мой пратэст сям'я рашуча адпрэчыла, заявіўшы, што альтэрнатывай з'яўляецца турма, яны былі запалоханыя. Тады я зразумеў, што разлічваць можна толькі на сябе. Усё адбылося занадта хутка, таму я лічу, што не здолеў засцерагчы сябе і людзей ад непрадбачаных абставінаў. Усё тое, што адбылося далей у будынку ваенкамата, лічу следствам сваіх фатальных памылак і трагічным збегам абставінаў».

У лісце Зінін падкрэсліў, што не сутыкаўся з катаваннямі з боку сілавікоў, але адзначыў, што мае патрэбу ў дапамозе грамадзянскіх лекараў, бо ў СІЗА няма неабходнага дыягнастычнага абсталявання. Ён таксама папрасіў «данесці спачуванні» да параненага ім ваенкама і яго сваякоў.

Зінін адкрыў стральбу ў ваенкамаце Усць-Ілімска 26 верасня, неўзабаве пасля пачатку мабілізацыі ў Іркуцкай вобласці. У выніку інцыдэнту вайсковы камісар раёна Аляксандр Елісееў быў цяжка паранены і трапіў у рэанімацыю, 14 лістапада яго выпісалі з лякарні. СК узбудзіў крымінальную справу па артыкулах аб замаху на жыццё вайскоўца і незаконным нашэнні зброі. Зінін знаходзіцца пад арыштам.

Паводле «Медузы».