Перамір'е Трампа не спрацавала, бо было медыйным праектам, а не дыпламатыяй — NYT

New York Times разбірае, чаму не спрацоўваюць «перамір'і Трампа» і не дасягаецца трывалага міру. Расія выкарыстала гэтую паўзу, каб назапасіць зброю і нанесці такі ўдар па Украіне, які ўструбаваў нават Венгрыю І Славакію. А NATO спрабуе зрабіць дапамогу Украіне больш сістэмнай і абавязковай для краін-членаў. Ідуць 1541-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.

Агулам на працягу мінулых сутак ва Украіне зафіксавана 241 баявое сутыкненне, паведамляе Генштаб УСУ ў ранішняй зводцы 14 траўня.

На Пакроўскім кірунку абаронцы Украіны адбілі 36 штурмаў расіян у раёнах Навапаўлаўкі, Вольнага, Кучарава Яру, Біліцкага, Радзінскага, Грышына, Удачнага, Сяргееўкі і іншых.

На Гуляйпольскім кірунку адбыліся 32 атакі расійцаў у раёнах Дабраполля, Злагоды, Прыволля, Уздвіжаўскай, Залізнічнага, Горкага, Святапятроўкі і іншых.

На Паўднёва-Слабажанскім кірунку расіяне 22 разы штурмавалі пазіцыі УСУ ў раёнах Ваўчанскіх Хутароў, Ліману, Рыбалчына, Ахрыміўкі, Старыцы і іншых.

На Канстанцінаўскім кірунку расіяне здзейснілі 14 атак паблізу Канстанцінаўкі, Русінага Яра, Плешчыеўкі, Іллінаўкі і Сцяпанаўкі.

* * *

Аляксандраўскі кірунак застаецца адным з самых гарачых на фронце, дзе расійскія войскі працягваюць інтэнсіўныя штурмавыя дзеянні. У той жа час украінскія сілы прымяняюць тактыку актыўнай абароны і маюць пэўныя поспехі, напісаў у Telegram галоўнакамандуючы УСУ Аляксандр Сырскі.

Сырскі паведаміў, што здзейсніў рабочую паездку ў раён баявых дзеянняў. Ён адзначыў, што маштабныя штурмы расійскай арміі з прымяненнем цяжкай тэхнікі на гэтым участку фронту амаль спыніліся. Замест гэтага армія РФ актыўна выкарыстоўвае беспілотнікі, артылерыю і невялікія пяхотныя групы.

«У сваю чаргу Сілы абароны Украіны прымяняюць тактыку актыўнай абароны. Калі гэта магчыма і дарэчы — наступаюць, маюць пэўныя поспехі», — заявіў Сырскі.

На гэтым участку фронту ўкраінскія вайскоўцы нядаўна вызвалілі 12 населеных пунктаў.

* * *

У ноч на 14 траўня, адразу пасля масіраванага ўдару дронаў на працягу дня (амаль 800 БпЛА), Расія працягнула атаку, нанёсшы камбінаваны ўдар па Украіне з прымяненнем ударных БпЛА, ракет паветранага і наземнага базавання.

Асноўны кірунак удару – Кіеў. Былі выкарыстаныя:

• 3 аэрабалістычныя ракеты Х-47 «Кінжал»;

• 18 балістычных ракет Іскандэр-М/С-400;

• 35 крылатых ракет Х-101;

• 675 ударных БпЛА тыпу Shahed, Гербера, Італмас, баражуючых боепрыпасаў «Бандэроль» (2 адз.), дронаў-імітатараў тыпу «Пародыя».

Проціпаветранай абаронай збіта/задушана 693 цэлі — 41 ракета і 652 беспілотнікі розных тыпаў:

• 29 крылатых ракет Х-101;

• 12 балістычных ракет Іскандэр-М/С-400;

• 652 БпЛА розных тыпаў.

Атака працягваецца, у паветраную прастору Украіны ўвайшлі некалькі новых груп ударных БпЛА. Паветраныя сілы Украіны заклікаюць не ігнараваць паветраную трывогу.

* * *

У выніку камбінаванага ўдару па Кіеве загінуў чалавек, паранены больш за 30 людзей. Пад удар патрапілі жылыя дамы і грамадзянская інфраструктура. Перабоі з водазабеспячэннем фіксуюцца на левым беразе Кіева.

Самая масіраваная атака 13 траўня была на Закарпацці. Праз атаку дронаў часова закрывалі пункты пропуску на мяжы са Славакіяй. Гэта першы выпадак, калі такія меры бяспекі прымаліся ў межах Закарпацкай вобласці.

На ўдары па Закарпацці ўпершыню адрэагавала Венгрыя. Урад новага прэм’ера Петэра Мадзьяра асудзіў атаку і выклікаў у МЗС расійскага пасла.

* * * 

* * *

Генеральны сакратар NATO Марк Рутэ прапанаваў краінам Альянсу штогод пачаць выдаткоўваць Украіне па 0,25% свайго ВУП. Аднак некаторыя з іх ужо выступілі супраць такой ініцыятывы, піша Politico.

Двое дыпламатаў распавялі выданню, што генсек NATO выступіў з гэтай прапановай на закрытай сустрэчы пастаянных прадстаўнікоў Альянсу ў канцы мінулага месяца. Прапанова Рутэ часткова стала адказам на незадаволенасць некаторых краін, якія лічаць, што робяць для Украіны значна больш, чым іншыя саюзнікі па Альянсе.

Politico падлічыла, што з улікам уласнай ацэнкі Альянсу сукупнага ВУП NATO гэта б азначала штогадовае выдзяленне Украіне 143 млрд. долараў.

У той жа час у некаторых краін, у прыватнасці Францыі і Брытаніі, гэтая прапанова выклікала скептыцызм. Адзначаецца, што для адабрэння падобнай ініцыятывы неабходная аднагалосная падтрымка членаў NATO.

* * *

Новая імаверная хваля мабілізацыі ў РФ можа выклікаць маштабны эканамічны крызіс у Расіі, наступствы якога будуць адчувацца гадамі, піша прэс-служба Службы знешняй разведкі Украіны.

Разведка, спасылаючыся на аналіз экспертаў, прагназуе значнае пагаршэнне эканамічных паказчыкаў у РФ у выпадку імавернай чарговай хвалі мабілізацыі. Калі цяпер эканоміка Расіі перажывае стадыю рэцэсіі, то ў выпадку мабілізацыі эканоміка РФ цалкам чакана пяройдзе да наступнага этапу — стагнацыі, наступствы якой прыйдзецца разграбаць доўгі час.

Адным з негатыўных для эканомікі наступстваў мабілізацыі ў РФ стане яшчэ больш паглыблены дэфіцыт кадраў: сучасная вайна залежыць не столькі ад колькасці вайскоўцаў, колькі ад тых, хто забяспечвае ўзровень тэхнічнага забеспячэння, сістэм сувязі і радыёэлектроннай барацьбы.

Эксперты папярэджваюць, што новая хваля мабілізацыі ў РФ можа выклікаць масавы выезд расіян за мяжу. Адзначаецца, што пасля мабілізацыі ў 2022 годзе частка эмігрантаў вярнулася на Радзіму, але гэтым разам Расію могуць канчаткова пакінуць высокакваліфікаваныя спецыялісты, што таксама адаб’ецца на эканоміцы.

«Асобна варта акцэнтаваць увагу на фінансавых цяжкасцях Расіі. Бюджэтны дэфіцыт РФ ужо ў разы перавысіў запланаваныя паказчыкі, а забеспячэнне соцень тысяч мабілізаваных запатрабуе непад’ёмных выдаткаў», — дадалі ў Службе знешняй разведкі.

Нагадаем, днямі паведамлялася, што Расія рыхтуе новую мабілізацыю да 300 тысяч чалавек, аднак канчатковае рашэнне пакуль не прынята.

* * *

Пры Дональдзе Трампе перамір’і ў вайне РФ супраць Украіны сталі часткай палітычнага шоу, а не крокам да міру, піша The New York Times.

Як адзначае выданне, апошняе абвешчанае перамір’е паміж Расіяй і Украінай паказала, што сама ідэя спынення агню змянілася. Часовыя паўзы ў баявых дзеяннях ператварыліся ў самастойны палітычны інструмент, звязаны з інфармацыйным парадкам дня.

Выданне звяртае ўвагу, што падчас трохдзённага перамір’я, абвешчанага Трампам, баявыя дзеянні ва Украіне фактычна працягваліся: над Украінай працягвалі ляцець расійскія беспілотнікі, ракеты і кіраваныя авіябомбы, а сярод мірнага насельніцтва былі загінулыя.

Прафесар Мадхаў Джошы нагадаў, што паспяховыя мірныя пагадненні звычайна патрабуюць доўгай падрыхтоўкі. Вывучаныя ім 42 мірныя пагадненні, заключаныя ў перыяд з 1989 па 2018 год, рэалізоўваліся ў сярэднім каля чатырох гадоў.

На думку эксперта, цяперашнім спробам спынення агню паміж РФ і Украінай не хапае ключавых умоў для поспеху — незалежнага кантролю і паўнавартаснай палітычнай асновы для перамоў. Перамоўны працэс паміж Масквой і Кіевам пры пасярэдніцтве ЗША фактычна апынуўся замарожаны на месяцы, а паведамленні пра новыя перамір’і з’яўляюцца нечакана і без папярэдняй дыпламатычнай падрыхтоўкі.

Прафесар Джорджтаўнскага ўніверсітэта Дэніэл Байман лічыць, што адміністрацыя Трампа дэманструе нецярпенне да працяглай дыпламатычнай працы, а для Трампа сама аб’ява перамір’я ўжо ўспрымаецца як дасягненне міру. Такі падыход адсоўвае на другі план складаныя перамоўныя працэсы і працу прафесійных дыпламатаў. Аналітыкі лічаць, што акцэнт робіцца перш за ўсё на гучных палітычных заявах і медыйным эфекце.