Працуюць УСУ? У Белгародскай вобласці гарыць склад з боепрыпасамі, паблізу Крымскага маста чулі выбухі

Чарговыя эксцэсы заўважаны пад расійскім Белгарадам і ў Крыме каля Керчанскага маста, паведамляе «Украінская праўда».

У раёне вёскі Цімонава Белгародскай вобласці РФ гарыць склад з боепрыпасамі.

Як паведаміў тамтэйшы губернатар Вячаслаў Гладкоў, «у раёне вёскі Цімонава Валуйскай гарадской акругі загарэўся склад з боепрыпасамі. Па апошніх даных, пацярпелых няма, ахвяр няма».

Паводле слоў Гладкова, прычына пажару ўстанаўліваецца.

Жыхароў вёсак Цімонава і Солаці эвакуіруюць на бяспечную адлегласць.

Тым часам жыхары Керчы ў акупаваным Крыме ў чацвер вечарам чулі выбух. Акупанты заявілі аб 
спрацоўванні сістэмы СПА.

Дарадца назначанага Крамлём кіраўніка Крыма Алег Кручкоў паведаміў: «Папярэдне. У Керчы спрацавалі сістэмы СПА. Небяспекі для горада і маста няма».

У той жа час у крымскіх пабліках паведамляюць аб гучным выбуху ў Керчы, які было чуваць у розных раёнах горада, а таксама ў бліжэйшых вёсках. У некаторых дамах дрыжэлі шыбы.

Менавіта ў Керчы бярэ свой пачатак Крымскі мост, які злучае акупаваны паўвостраў з Расіяй.

Нагадаем, 17 жніўня дарадца кіраўніка Офіса ўкраінскага прэзідэнта Міхаіл Падаляк заявіў, што Крымскі мост павінен быць знішчаны як законная ваенная цэль.