СМІ: Пуцін ужо не ўпэўнены ў «павольнай перамозе» Масквы на вайне ва Украіне
СМІ разбіраюць на кавалкі заяву Пуціна пра тое, што вайна ва Украіне «ідзе да заканчэння». На думку экспертаў, расійскі кіраўнік спрабуе заспакоіць уласнае насельніцтва, бо ніякіх перамог ва Украіне за апошні час ён не мае. Тым не менш, усе сумняюцца, што ён скончыць баявыя дзеянні. Ідуць 1539-я суткі поўнамаштабнай вайны РФ супраць Украіны пры саўдзеле ў агрэсіі рэжыму Аляксандра Лукашэнкі.
На працягу мінулых сутак ва Украіне зафіксавана 174 баявыя сутыкненні, паведамляе Генштаб УСУ ў ранішняй зводцы 12 траўня.
На Пакроўскім кірунку абаронцы Украіны спынілі 32 штурмы расіян у раёнах Радзінскага, Грышына, Біліцкага, Пакроўску, Котліна, Удачнага, Мураўкі, Новападгародняга, Маладзецкага і іншых.
На Гуляйпольскім кірунку расійцы здзейснілі 20 атак у бок Дабраполля, Стараўкраінкі, Залізнічнага, Новага Запарожжа, Уздвіжаўкі, Чароўнага, Горкага і іншых.
На Ліманскім кірунку армія РФ 17 разоў спрабавала уклініцца ў абарону Украіны, атакуючы ў раёнах Ліману, Дробышава, Зарэчнага, Азёрнага, Ставак.
На Канстанцінаўскім кірунку расійцы здзейснілі 16 атак, паблізу Плешчыеўкі, Канстанцінаўкі, Іллінаўкі, Іванаполля, Тарэцкага, Кучэрава Яру.
На Паўднёва-Слабажанскім кірунку расіяне 11 разоў атакавалі пазіцыі УСУ ў раёнах Ваўчанску, Старыцы і Краснага Першага.
На Славянскім кірунку расійцы дзевяць разоў праводзілі штурмы ў раёнах Рэзнікаўкі, Крывой Лукі і Закітнага.
* * *
Пакуль цягнулася трохдзённае перамір’е, расійскія войскі выкарыстоўвалі паўзу для схаванай перакідкі войскаў і масіраваных атак новымі тыпамі дронаў, паведамляе амерыканскі Інстытут вывучэння вайны (ISW).
Як паказалі аналітыкі, у апошні дзень «перамір’я» (з 9 па 11 траўня) баявыя дзеянні не спыняліся, хоць іх інтэнсіўнасць крыху знізілася. Паводле даных спадарожнікавай сістэмы NASA FIRMS, пажары і абстрэлы працягваліся па ўсёй лініі фронту, нягледзячы на палітычныя заявы.
Паводле даных украінскіх вайскоўцаў, расійская армія выкарыстоўвала абвешчаную паўзу не для дээскалацыі, а для ўзмацнення сваіх падраздзяленняў. Прадстаўнік украінскай брыгады на Ліманскім кірунку паведаміў, што расіяне падцягвалі рэзервы, назапашвалі асабовы склад і працягвалі актыўна ўжываць FPV-дроны і артылерыю.
Украінскія абаронцы таксама звярнулі ўвагу на рэзкае павелічэнне прымянення беспілотнікаў «Маланка». Паводле іх слоў, падчас так званай «цішыні» Расія нават узмацніла атакі гэтымі дронамі ў параўнанні з папярэднімі днямі.
Ва УСУ мяркуюць, што армія РФ магла загадзя назапашваць гэтыя беспілотнікі, каб выкарыстаць перыяд «перамір’я» для скрытага ціску на фронце.
* * *
Расія атакавала аб’екты чыгуначнай інфраструктуры ў Днепрапятроўскай вобласці раніцай 12 траўня, у выніку чаго пацярпеў машыніст цягніка.
Усяго за мінулыя суткі ў выніку расійскіх удараў па Днепрапятроўскай вобласці адзін чалавек загінуў і яшчэ чацвёра атрымалі раненні.
Жыхары шматпавярховага дома ў Абалонскім раёне Кіева, на які ўпалі абломкі БпЛА, самастойна патушылі пажар, абышлося без пацярпелых.
У Фастаўскім раёне Кіеўскай вобласці пашкоджаны дзіцячы сад, шматпавярховы дом і прыватныя дамы.
* * *
* * *
Еўрапейскія саюзнікі ўсё больш занепакоеныя жыццяздольнасцю праграмы паставак амерыканскага ўзбраення Украіне (PURL), паколькі вайна ў Іране імкліва вычарпае запасы ЗША. Асобныя краіны-донары таксама пачалі сумнявацца ў празрыстасці расходавання Пентагонам выдаткаваных сродкаў, піша The Washington Post.
Паводле слоў суразмоўцаў выдання, адміністрацыя Трампа не адпраўляла прызначанае для Украіны ўзбраенне пасля пачатку ўдараў па Іране. Еўрапейскія высокапастаўленыя асобы ўсё больш занепакоеныя тым, што дэфіцыт амерыканскай зброі, які ўжо ўплывае на іх уласныя замовы, можа таксама прывесці да затрымак паставак ва Украіну.
Прадстаўнік Альянсу паведаміў, што краіны далі больш за 5,5 мільярда долараў, уключаючы нядаўнія ўнёскі Нарвегіі і Канады. Саюзнікі «працягваюць рабіць унёскі ў PURL», але недавер да ЗША расце праз інфармацыю аб планах Пентагона патраціць 750 мільёнаў долараў з фонду PURL на кампенсацыю кошту абсталявання, перададзенага Украіне яшчэ пры адміністрацыі Байдэна, а не на дапамогу.
Чыноўнікі па абодва бакі Атлантыкі выказалі сумневы ў тым, ці не парушае такі спосаб выкарыстання сродкаў чаканні еўрапейцаў, што ўсе іх унёскі будуць накіраваныя на падтрымку Кіева.
Высокапастаўлены чыноўнік Пентагона не стаў адмаўляць выкарыстанне сродкаў для папаўнення ўласных запасаў. Аднак ён назваў такія дыскусіі «стымулам для Еўропы нарошчваць уласныя прамысловыя магутнасці».
* * *
Нямецкі абаронны гігант Rheinmetall запускае ўласную вытворчасць крылатых ракет разам з кампаніяй Destinus. Гэта дапаможа Еўропе закрыць прабелы ў абароне пасля змены палітыкі ЗША, піша Financial Times.
Праект атрымаў назву Rheinmetall Destinus Strike Systems. Вытворчасць плануюць пачаць у канцы 2026 года або ў пачатку 2027 года. Спецыялісты засяродзяцца на крылатых ракетах і балістычнай артылерыі. Новая ракета Ruta Block 2 зможа паражаць цэлі на адлегласці больш за 700 км.
Гэта менш, чым у амерыканскіх ракет Tomahawk, аднак Еўропа мае патрэбу ва ўласным рэсурсе. Згодна са справаздачай еўрапейскіх вайскоўцаў, Расія вырабляе 1100 крылатых ракет на год, а Еўрасаюз пакуль вырабляе толькі 300 адзінак.
Нідэрландская Destinus ужо дапамагае УСУ — пастаўляе Украіне крылатыя ракеты і дроны. Праз гэта Міністэрства абароны Расіі ўнесла кампанію ў спіс патэнцыйных цэляў. Кампаненты для беспілотнікаў вырабляюць за межамі Швейцарыі, а збіраюць тэхніку непасрэдна ва Украіне.
* * *
Уладар Крамля Уладзімір Пуцін днямі заявіў аб «магчымым заканчэнні вайны ва Украіне». The Guardian вылучыла пяць асноўных прычын, якія маглі падштурхнуць Пуціна да такіх выказванняў.
- Расія губляе ініцыятыву на полі бою. Раней Масква паступова захоплівала тэрыторыі, што стварала ілюзію непазбежнага паражэння Украіны, але сітуацыя змянілася. Вяртанне Украінай Купянска ў снежні здзівіла заходніх экспертаў. У Запарожскай вобласці адбілі больш за 100 квадратных кіламетраў. У красавіку Расія пацярпела чыстыя тэрытарыяльныя страты, чаго не было са жніўня 2024 года. Павольная перамога Масквы больш не выглядае пэўнай.
- Страты расіян перавышаюць тэмпы мабілізацыі. Чалавечы рэсурс Расіі вычэрпваецца, за апошнія пяць месяцаў забіта або паранена больш салдат, чым Расія паспявае набіраць. Пуцін баіцца новай адкрытай мабілізацыі, бо першая хваля ў 2022 годзе выклікала сур’ёзныя сацыяльныя беспарадкі.
- Удары па НПЗ знішчаюць даходы Крамля. І хоць расійскую эканоміку змог утрымаць раптоўны скачок цэн на нафту, але ўжо ў сакавіку экспарт нафты прынёс Маскве толькі 19 млрд долараў, а агрэсару трэба амаль 1 мільярд штодня толькі на працяг вайны.
- Залежнасць Украіны ад Захаду памяншаецца. Раней Кіеў чакаў F-16 і Patriot, а цяпер Украіна інвестуе ва ўласныя тэхналогіі. Дроны б’юць па аб’ектах за тысячы кіламетраў ад фронту, з’явіліся новыя танныя ракеты-перахопнікі, а Украіна нават экспартуе гэтыя тэхналогіі.
- Не апошняя па важнасці прычына заключаецца ў Трампе. Пуцін хоча пераканаць лідара ЗША націснуць на Кіеў. Мэта — прымусіць Украіну адмовіцца ад Данецкай вобласці. Пакуль Трамп адцягнуўся на Іран, Крэмль рыхтуе глебу для гандлю. Плюс — у лістападзе ў ЗША выбары ў Сенат і Кангрэс, і пасля іх Трамп будзе абмежаваны ў прыняцці рашэнняў, а можа і атрымаць імпічмент. Пазіцыі «сябра Пуціна» як мінімум пахіснуцца.
* * *
Расійскі дыктатар Уладзімір Пуцін заявамі пра хуткае заканчэнне вайны ва Украіне спрабуе адцягнуць увагу ад уласнай слабасці, заявіў міністр абароны Германіі Борыс Пісторыус падчас прэс-канферэнцыі з украінскім калегам Міхайлам Фёдаравым.
«Я лічу, што Пуцін сваімі паводзінамі цяпер хоча адцягнуць увагу ад уласнай слабасці. На гэты момант ён наўрад ці можа пахваліцца тэрытарыяльнымі дасягненнямі. Яго армія зноў і зноў губляе часткі захопленых тэрыторый», — сказаў Пісторыус.
Кіраўнік нямецкага Мінабароны адзначыў, што расійскі дыктатар мог бы проста скончыць вайну ва Украіне, калі сапраўды бачыць канец канфлікту. «Праўда ў тым — і я не стамлюся гэта паўтараць — што калі б Уладзімір Пуцін хацеў спыніць сваю захопніцкую вайну супраць Украіны, ён мог бы зрабіць гэта вельмі проста: вывеўшы свае войскі або запрасіўшы да канкрэтных перамоў без папярэдніх умоў», — падкрэсліў Пісторыус.
Пісторыус адзначыў небяспеку, што заявы Пуціна з’яўляюцца манеўрам для ўвядзення ў зман і часткай гібрыднай вайны Расіі. Ён дадаў, што на працягу апошніх гадоў кожны раз, калі гаворка ішла пра спыненне агню ці мір, Пуцін урэшце паводзіў сябе зусім інакш, чым было дамоўлена.