Столтэнберг: Украіна мае права атакаваць вайсковыя аб’екты ў Расіі з F-16

Калі Украіна атрымае знішчальнікі F-16 ад сваіх саюзнікаў, паводле міжнароднага права яна можа наносіць удары па ваенных аб'ектах у Расіі, але гэтае пытанне будуць вырашаць краіны-пастаўшчыкі самалётаў, піша «Голас Амерыкі». 

Украіна, калі ёй перададуць самалёты-знішчальнікі F-16, паводле міжнароднага права можа наносіць удары па ваенных аб'ектах на тэрыторыі Расіі, але гэтае пытанне будуць вырашаць краіны-пастаўшчыкі самалётаў.

Пра гэта генеральны сакратар NATO Енс Столтэнберг заявіў у Бруселі ў інтэрв’ю журналістцы «Радыё Свабода» Заране Сцепаненка.

Кіраўнік Паўночнаатлантычнага альянсу, калі адказваў на ўдакладняльнае пытанне, ці будзе пастаўка знішчальнікаў F-16 суправаджацца абмежаваннямі саюзнікаў, каб не наносіць удары па тэрыторыі Расіі, патлумачыў:

«Розныя саюзнікі маюць крыху рознае меркаванне на гэты конт. Але ў цэлым... гэта ўзброеная агрэсія Расіі супраць Украіны з грубым парушэннем міжнароднага права. А паводле міжнароднай юстыцыі Украіна мае права на самаабарону. І гэта таксама ўключае нанясенне ўдараў па законных ваенных аб'ектах — расійскіх ваенных аб'ектах за межамі Украіны. Гэта міжнароднае права».

Генеральны сакратар NATO таксама адзначыў, што краіны Альянсу прыслухаюцца да экспертаў, каб вызначыць гатоўнасць адправіць ва Украіну знішчальнікі F-16.

«Мы павінны слухаць ваенных экспертаў адносна таго, калі менавіта мы будзем гатовы або калі саюзнікі будуць гатовы пачаць пасылаць F-16. Чым раней, тым лепш. У той жа час гэта павінна быць эфектыўная зброя з добра падрыхтаванымі пілотамі, з добрымі сістэмамі абслугоўвання, якія будуць у наяўнасці ў той момант, калі мы даём гэты механізм Украіне», — сказаў кіраўнік Альянсу ў інтэрв’ю «Радыё Свабода».

Столтэнберг таксама дадаў: «Немагчыма дакладна сказаць, калі, таму што гэта дылема. Мы ўсе хочам, каб F-16 былі там (ва Украіне. — Рэд.) як мага хутчэй. Пры гэтым, вядома, эфект ад F-16 будзе тым мацнейшым і лепшым, чым больш падрыхтаваныя пілоты. І не толькі пілоты, але і абслугоўванне, персанал і ўсе сістэмы падтрымкі, якія павінны быць на месцы».

17 лютага Foreign Policy са спасылкай на еўрапейскіх чыноўнікаў паведаміла, што першыя знішчальнікі F-16 могуць з'явіцца ва ўкраінскім небе ўжо ў чэрвені 2024 года.

«Думаю, мы ўбачым іх ва Украіне ў чэрвені», — сказаў міністр абароны Літвы Арвідас Анушаўскас. Іншы еўрапейскі чыноўнік на ўмовах ананімнасці паведаміў газеце, што ўжо ў першы месяц лета ва Украіне могуць быць выкарыстаны амерыканскія знішчальнікі.

У інтэрв'ю Укрінфарм 21 лютага прэс-сакратар ВПС Украіны Юрый Ігнат заявіў, што пакуль невядома, калі Кіеў атрымае самалёты F-16. Але «працэс ідзе», Украіна ў экстранным парадку пераходзіць на знішчальнікі.

«Працэс ідзе, лётчыкі ўжо лётаюць, выконваюць палёты ў небе. Пакуль ідуць палёты з інструктарамі. Украінскія лётчыкі павінны цалкам авалодаць тэхнікай, дзейнічаць самастойна, без інструктараў. Вучэбна-трэніровачныя палёты праводзяцца», — сказаў прэс-сакратар.

Ён падкрэсліў, што не варта чакаць, што «прыляцяць самалёты і ўсё — перамога». Па словах Ігната, Украіна не атрымае найноўшыя мадыфікацыі F-16, і ім «не дадуць адразу 40, 70 або 120 самалётаў».

«Вы павінны разумець, што спачатку прыляціць невялікая група лётчыкаў, якія пачнуць працаваць у небе. Вядома, Расія адкажа адпаведным чынам. Але працэс падрыхтоўкі пілотаў і іх павелічэння ва Украіне будзе ісці паступова».