Улады Нямеччыны абавязаліся арыштаваць Пуціна ў выпадку яго прыезду ў краіну

Кіраўнік Міністэрства юстыцыі Нямеччыны заявіў, што Уладзімір Пуцін будзе арыштаваны ў выпадку наведвання краіны ў адпаведнасці з ордэрам, які выдаў Міжнародны крымінальны суд у Гаазе.

Карыкатура Сяргея Ёлкіна

Карыкатура Сяргея Ёлкіна

Нямеччына арыштуе Уладзіміра Пуціна на патрабаванне Міжнароднага крымінальнага суда (МУС), калі прэзідэнт Расіі апынецца на тэрыторыі ФРГ. Пра гэта заявіў газеце Bild am Sonntag міністр юстыцыі краіны Марка Бушман, піша «Медуза».

«Я чакаю, што МУС хутка звернецца ў Інтэрпол, а таксама да дзяржаў-удзельніц і папросіць іх аб выкананні [ордэра на арышт]. Тады Нямеччына будзе абавязаная арыштаваць прэзідэнта Пуціна, калі ён заедзе на тэрыторыю Нямеччыны, і перадаць яго ў МУС», — сказаў кіраўнік Мінюста ФРГ.

Як адзначае Die Zeit, дзейнічаць у адпаведнасці з пастановай МУС павінны ўсе краіны, якія падпарадкоўваюцца яго юрысдыкцыі.

17 сакавіка Міжнародны крымінальны суд у Гаазе выдаў ордэр на арышт прэзідэнта Расіі Уладзіміра Пуціна. Яго падазраюць у незаконнай дэпартацыі дзяцей з акупаваных тэрыторый Украіны ў Расію. Аналагічны ордэр на арышт быў выдадзены ў дачыненні да ўпаўнаважанай па правах дзіцяці Марыі Львовай-Бяловай.

У Крамлі ў адказ на пастанову МУС нагадалі, што Расія не прызнае юрысдыкцыю суда. МЗС РФ заявіў, што ордэр «не мае ніякага значэння» для Расіі. Сам Пуцін пастанову суда ніяк не каментаваў.

Публіцыст і гісторык Аляксандр Фрыдман у кантэксце заявы кіраўніка нямецкага Мінюста ўзгадаў, што яшчэ зусям нядаўна Пуцін быў паважаным гостем у ФРГ.

«У 2000 годзе нямецкі палітолаг Аляксандр Рар выпусціў апалогію пра Пуціна «Немец у Крамлі». Праз год гэтага «немца» з авацыямі віталі ў Бундэстагу і захапляліся яго прамовай на нямецкай мове,напісаў Аляксандр Фрыдман у сваім тэлеграм-канале. — Праз 23 гады знік з нямецкіх тэлеэкранаў «пуцінфершэер» Рар, а Нямеччына гатовая аказаць «немцу з Крамля» асаблівую паслугу: міністр юстыцыі ФРГ Марка Бушман падкрэслівае, што ў выпадку з'яўлення на тэрыторыі Нямеччыны Пуцін будзе арыштаваны і адпраўлены ў Гаагу. Так што hezlich willkommen, Wladimir Wladimirowitsch!».