Вялікі расійскі наступ ва Украіне пачаўся — ISW

У штодзённым бюлетэні вашынгтонскага Інстытута вывучэння вайны (ISW) канстатуецца, што даўно чаканы вялікі наступ расійскіх войскаў пачаўся. Гэта адбываецца на ўчастку Сватава — Крамянная на мяжы Луганскай і Харкаўскай абласцей — менавіта там, дзе апошнімі днямі гэтая арганізацыя і прагназавала наступ.

Армія РФ наступае на ўсім участку Сватава — Крамянная, асабліва на паўночны захад ад Сватава — недалёка ад Купянска і на захад ад Крамянной.

Сам факт наступу кажа, што на гэтым участку расійская армія перахапіла ініцыятыву, згубленую ў жніўні мінулага года. Аднак тое, што наступ пачаўся, яшчэ не азначае, што ён будзе паспяховым.

Зрэшты, пакуль расійская групоўка яшчэ не дасягнула максімальна магчымага тэмпу і задзейнічала не ўсе рэзервы: так, у бой яшчэ не ўступіла 2-я мотастралковая дывізія 1-й гвардзейскай танкавай арміі Заходняй вайсковай акругі, перакінутая на Луганшчыну пасля перафарміравання на тэрыторыі Беларусі ў студзені.

Расійскія афіцыйныя асобы працягваюць прапаноўваць меры па падрыхтоўцы расійскай ваеннай прамысловасці да працяглай вайны ва Украіне. Адначасова з гэтым робяцца дадатковыя захады для ўхілення ад санкцый.

Так, прэм'ер-міністр Расіі Міхаіл Мішусцін 8 лютага заявіў, што ўрад РФ будзе субсідзіраваць інвестпраекты па мадэрнізацыі прадпрыемстваў, якія працуюць у інтарэсах расійскай арміі, і выдзеліць значныя сродкі на вытворчасць новай ваеннай тэхнікі. А таксама заявіў, што расійскі ўрад падоўжыць ільготы расійскім прадпрымальнікам, якія падтрымліваюць расійскіх вайскоўцаў, у тым ліку ў іх будуць падоўжаны тэрміны аплаты арэнды федэральнай маёмасці.

Так што, відаць, Крэмль паступова рыхтуе расійскую ваенную прамысловасць да працяглай вайны ва Украіне. Урад РФ імкнецца пазбягаць пры гэтым больш шырокай эканамічнай мабілізацыі, якая прывядзе да далейшых унутраных эканамічных парушэнняў і адпаведнай незадаволенасці.

Крэмль стварае сістэму субсідый і льгот. А ўказ пра новыя спрошчаныя дэкларацыі даходаў для чыноўнікаў і адмена звыклых працэдур федэральных закупак, хутчэй за ўсё, дазволяць расійскім кампаніям лепш ухіляцца ад рэжымаў міжнародных санкцый, накіраваных на расійскую ваенную прамысловасць.

Раней ISW паведамляў, што 82% збітых ва Украіне беспілотнікаў іранскай вытворчасці мелі чыпы, паўправаднікі і іншыя кампаненты з ЗША, што сведчыць аб тым, што Расія і Іран, верагодна, выкарыстоўваюць шчыліны для перадачы вырабленых на Захадзе кампанентаў зброі ў Расію праз давераных суб'ектаў.

Намаганні Крамля падрыхтаваць расійскую ваенную прамысловасць да працяглай вайны ва Украіне часткова абапіраюцца на здольнасць расійскай ваеннай прамысловасці мець стабільны доступ да шматлікіх бяспечных ланцужкоў паставак ключавых замежных кампанентаў, якія яна не можа вырабляць сама.

Ключавыя высновы ISW

• Расійскія войскі вярнулі ініцыятыву ва Украіне і пачалі буйны наступ у Луганскай вобласці.

• Удзел у наступальных аперацыях у гэтым сектары значных частак як мінімум трох буйных расійскіх дывізій сведчыць аб тым, што расійскі наступ пачаўся, нават калі ўкраінскія сілы пакуль што перашкаджаюць расійскім войскам атрымаць значныя поспехі.

• Паведамляецца, што камандаванне народнай міліцыі «Данецкай Народнай Рэспублікі» (ДНР) узяло на сябе кантроль над расійскім артылерыйскім дывізіёнам, верагодна, у падтрымку намаганняў па ўзмацненні аслабленых сіл ДНР напярэдадні непазбежнага расійскага наступу.

• Паведамленне аб падпарадкаванні расійскіх мабілізаваных фарміраванняў ДНР таксама можа сведчыць аб тым, што расійскае ваеннае камандаванне, магчыма, працягвае інтэграцыю спецыяльных фарміраванняў ДНР і «Луганскай Народнай Рэспублікі» (ЛНР) ва Узброеныя сілы Расіі, але, верагодна, сутыкнецца тут са значнымі цяжкасцямі.

• Расійскія афіцыйныя асобы працягваюць прапаноўваць меры па падрыхтоўцы расійскай ваеннай прамысловасці да працяглай вайны ва Украіне. Адначасова, верагодна, яны выстаўляюць дадатковыя ўмовы для ўхілення ад санкцый.

• Расійскія войскі вялі наземныя атакі вакол Бахмута і працягвалі тактычны наступ.

• Расійскія войскі працягвалі наступальныя дзеянні на паўночны захад ад Сватава і актывізавалі наступальныя дзеянні ў раёне Крамянной.

• Расійскія сілы нанеслі абмежаваныя наземныя ўдары ў раёне горада Аўдзееўка і на захадзе Данецкай вобласці.

• Расійскія і ўкраінскія сілы працягваюць дробнамаштабныя сутычкі і разведвальную дзейнасць у дэльце Дняпра і на Кінбурнскай касе.

• Група Вагнера пачала звяртацца да больш жорсткай тактыкі па вярбоўцы ў турмах, магчыма, у адказ на зніжэнне эфектыўнасці кампаніі.

Паводле understandingwar.org, ВВС