Ужо больш за 5 тысяч чалавек падпісаліся ў інтэрнэце за вызваленне палітвязняў у Беларусі падчас акцыі, якую ініцыявала ў Германіі дачка Міколы Статкевіча Кацярына.
Назва акцыі «Lasst sie frei» перакладаецца як «Адпусціце іх на свабоду». Сярод тых, хто паставіў свае подпісы прадстаўнікі ўсіх нямецкіх партый і кіраўнікі фракцый
у парламенце, акцёры і мастакі, лаўрэат Нобелеўскай прэміі па літаратуры Гюнтэр Грас.
На днях сюжэты пра падзеі ў Беларусі і пра Кацярыну Статкевіч выйшлі на нямецкім тэлебачанні і радыё. Буйнейшая тэлерадыёкампанія ARD паказала рэпартаж на канале ВR у прайм-тайм (18.00).
Сюжэт пра зняволеных і лёс Міколы Статкевіча прагучаў таксама на радыёканале «Bayern 1» і навінавым радыёканале «Bayern 5 aktuell».
«Больш за ўсё мяне непакоіць тое, што я нічога не ведаю, што зараз адбываецца з маім бацькам, — сказала Кацярына ў інтэрв’ю тэлеканалу ВR. — Існуе поўная
інфармацыйная блакада паміж бацькам і астатнім светам. І гэта няведанне робіць бяссільнымі, бездапаможнымі».
А Марылуізе Бек, каардынатарка ўсходнееўрапейскай палітыкі фракцыі «Саюз
90/Зялёныя», адзначыла ў інтэрв’ю: «Гэта папросту розуму недаступна, што ў самым цэнтры Еўропы правы народа так нахабна топчуцца. І здзяйсняюцца такія злачынствы супраць
чалавечнасці. І гэта павінна ўсіх нас датычыцца».
Кацярына Статкевіч жыве ў Германіі з 2002 года. Яна працуе на «Audi» ў баварскім горадзе Інгальштадт і піша доктарскую дысертацыю па вытворчасці і лагістыцы. Сваімі выступамі ў СМІ
і акцыяй па зборы подпісаў у інтэрнэце яна дамагаецца і вызвалення свайго бацькі.
