1. Напад на Украіну

«Беларускія ўлады вырашылі па поўнай падзяліць са старэйшым саюзнікам яго лёс»

Грамадства

Аўтар тэлеграм-канала «Лісты да дачкі» ў звыклай для яго іранічнай манеры ў чарговы раз здзіўляецца, як усё ў беларускіх генералаў ідзе па плане. Вось толькі, на яго думку, гэты план можа быць зусім не іхнім…

photo_2022_10_17_20_16_03.jpg


Даўно не здаралася мне пачаць ліст з жарту. А як ты пажартуеш, калі беларуская АЭС паўгода рабіла выгляд, што яе няма? Але вось Мінэнерга вырашыла нагадаць, што яна ўсё ж такі ёсць. І намеснік міністра сказаў, што станцыю запусцяць да канца года, калі правядуць дадатковыя выпрабаванні. У канцы года. Ага. Апошні раз так запускалі, па-мойму, у ліпені.

Але лепш, вядома, каб АЭС і далей заставалася незаўважнай. Гэта значыць, з аднаго боку, без яе толкам і не пажартуеш. А з іншага боку, беларускія ўлады з даступных для іх опцый выбралі рэжым контртэрарыстычнай аперацыі (КТА). З усімі ўзніклымі наступствамі. А пры такім рэжыме, пагадзіся, толькі дзеючай атамнай станцыі нам і не хапала.

Таму што варта было генералам расказаць народу пра павышаны ўзровень тэрарыстычнай пагрозы, як адразу знайшліся людзі, якія збіраліся што-небудзь падарваць. Чакалі, мабыць, пакуль генералы прывядуць сябе ў стан падвышанай пільнасці. Графікі ўзгаднялі. Вось заводзіш так рэжым КТА, і праз два дні знаходзяцца людзі, якія гатовы што-небудзь падарваць. Усё роўна што. Абы па пяцьсот. Дзіўны і, вядома, цалкам выпадковы збег абставін.

І, вядома, у рэжыме КТА ніякія амністыі або прымірэнчыя жэсты ў бок хоць Захаду, хоць беларускага народа немагчымыя па азначэнні. Якія ўжо тут прымірэнчыя жэсты, калі сярод гэтага народа пад дзве сотні тэрарыстаў і некалькі сотняў экстрэмістаў, зарэгістраваных у афіцыйна ўстаноўленым парадку? Замест прымірэнчых жэстаў беларускія ўлады вырашылі па поўнай падзяліць са старэйшым саюзнікам яго лёс і рэгіянальную групоўку войскаў.

Хоць я падазраю, што гэта не беларускія ўлады так вырашылі, а саюзнік вырашыў за іх. Каб не адчуваць сябе самотна ў гэтым пустым і халодным свеце. Што, вядома, ніяк не ўплывае на перспектывы і наступствы для беларускіх улад.

Асабліва калі сумесная групоўка войскаў вырашыць паўтарыць марш на Кіеў. Хай нават і без прамога ўдзелу беларускіх вайскоўцаў. Вось Міністэрства абароны паведаміла, што першыя эшалоны з расійскімі вайскоўцамі пачалі прыбываць у Беларусь. І сказала, што ўсяго яно чакае 9.000 расійскіх салдат. Але мы з табой, вядома, разумеем, што там, дзе ёсць афіцыйныя дзевяць тысяч, неафіцыйна можа быць хоць усе трыццаць. Хто там іх палічыць?

Не ведаю, ці хочуць беларускія ўлады падзяліць з саюзнікам усе нягоды спецыяльнай аперацыі. Падазраю, што не вельмі. Але з КТА, мабілізацыяй Шродзінгера, антыпанічнымі турамі генералаў па беларускіх гарадах, расійскімі вайскоўцамі і пагрозлівымі манеўрамі ў бок украінскай мяжы вайна можа прыйсці і не пытаючыся меркавання беларускіх улад.

І тады прыйдзецца лавіць экстрэмістаў, не зарэгістраваных у афіцыйна ўстаноўленым парадку, якія не ўзгадняюць графікі сваёй дзейнасці з рэжымам правядзення КТА.