Што новы Жылкодэкс нам рыхтуе?

Да ўступлення ў сілу новага Жыллёвага кодэкса засталося амаль чатыры месяцы. Спецыялісты лічаць яго вельмі прагрэсіўным, абывацелі непакояцца, бо многія нормы вызначаны пакуль што ў агульных рысах. Бо пасля прыняцця "жыллёвай канстытуцыі" чыноўнікам дадзена паўгода, каб прывесці дзеючыя інструкцыі і распрацаваць новыя ў адпаведнасці з палажэннямі ВК. “Тэлеграф папрасіў спецыялістаў мінЖКГ растлумачыць нормы новага кодэкса, што найбольш абмяркоўваюцца ў грамадстве.



Што зменіцца ў жыроўцы?

Цяпер у жыроўцы ёсць паслуга «тэхабслугоўванне», але што менавіта пад гэтым маецца на ўвазе — плацельшчыкам не вельмі вядома. Якія віды паслуг у цяперашні час уваходзяць у паняцце "тэхабслугоўванне", нам растлумачылі ў Міністэрстве жыллёва-камунальнай гаспадаркі: "Паслуга па тэхнічным абслугоўванні ўключае ў сябе наступныя асноўныя віды работ: правядзенне агульных і частковых аглядаў канструктыўных элементаў і інжынерных сістэм, бягучы рамонт даху, стыкаў сценавых панэляў, дзвярных і аконных запаўненняў (якія не знаходзяцца ў жылых памяшканнях), трубаправодаў ацяплення, водазабеспячэння, каналізацыі, водаадводных прылад, сістэм дымавыдалення і вентыляцыі, дапаможных памяшканняў, ямачны рамонт тратуараў, праездаў і адмосткаў, санітарная ўборка дапаможных памяшканняў і прылеглай да дома тэрыторыі, улік спажывання цеплавой і электрычнай энергіі, падрыхтоўка да эксплуатацыі ў асенне-зімовы і вяснова-летні перыяды, дробны рамонт печаў і дымаходаў, арганізацыя забеспячэння жыллёва-камунальнымі паслугамі і ўзаемаразлікаў за іх з пастаўшчыкамі, выдача даведак грамадзянам з месца жыхарства, забеспячэнне захавання насельніцтвам жыллёвага заканадаўства".

Новым Жыллёвым кодэксам прадугледжана канкрэтызацыя плацяжоў. Мы не проста будзем плаціць за бягучы рамонт, а па фактычных затратах. Метадалогія ўвядзення падамавога ўліку выдаткаў на бягучы рамонт жыллёвага фонду ў цяперашні час знаходзіцца ў стадыі дапрацоўкі, паведамілі ў МЖКХ.

Непрыватызаванае жыллё здадуць у арэнду?

"Наймальнік жылога памяшкання дзяржаўнага жыллёвага фонду, акрамя абавязку ўнясення платы за жыллёва-камунальныя паслугі, нясе абавязак унясення платы за карыстанне жылым памяшканнем з дня заключэння дагавора найму жылога памяшкання дзяржаўнага жыллёвага фонду", — гаворыцца ў п. 3 арт. 29 Жыллёвага кодэкса.

Калі кодэксам прадугледжана плата за карыстанне непрыватызаванымі кватэрамі, значыць, яна будзе ўведзена. Пытанне, якое больш за ўсё хвалюе жыхароў такіх кватэр, а часцей за ўсё гэта людзі малазабяспечаныя і адзінокія: які тарыф? На жаль, атрымаць канкрэтны адказ мы не змаглі. Намеснік міністра жыллёва-камунальнай гаспадаркі Анатоль Шагун паведаміў, што "ў цяперашні час праводзіцца работа па прывядзенні дзеючых нарматыўных прававых актаў у адпаведнасць з новым ВК і распрацоўцы новых". Між тым Жыллёвы кодэкс уступае ў сілу з 2 сакавіка 2013 года, часу засталося няшмат, і людзі адчуваюць хваляванне: ці па кішэні будзе ім тарыф за карыстанне жылым памяшканнем.

Гэтая норма Жылкодэкса справакавала паніку ў грамадстве. Ходзяць чуткі пра тое, што "прыватызацыі жылля больш не будзе". Аднак гэтая чутка не адпавядае рэчаіснасці. У новым Жылкодэксе парадак прыватызацыі жылля рэгламентаваны раздзелам 23. Па-ранейшаму для прыватызацыі кватэры можна выкарыстоўваць імянныя прыватызацыйныя чэкі "Жыллё", але пры ўмове, што яны своечасова перарэгістраваныя. Прыватызацыя жылых памяшканняў на платнай аснове ажыццяўляецца ў выпадку, калі ў грамадзян няма імянных прыватызацыйных чэкаў "Жыллё".

Капітальны рамонт: агульнае і прыватнае

Капрамонт дамоў актыўна абмяркоўваюць жыхары. У прыватнасці, каму што зрабілі "бясплатна". Аб'ёмы выкананых работ залежаць ад даты правядзення капрамонту. Да прыкладу, нормы аб цеплавой мадэрнізацыі жылых дамоў з'явіліся толькі ў 2007 годзе, таму не дзіўна, што ў 2005 абышліся толькі заменай трубаправодаў водазабеспячэння і іншых агульнадамавых камунікацый. Дарэчы, у перспектыве ўсе старыя дамы чакае цеплавая мадэрнізацыя.

"Капітальны рамонт жылых дамоў адбываецца на падставе праектна-каштарыснай дакументацыі, распрацаванай у адпаведнасці з патрабаваннямі будаўнічых норм і нарматыўных прававых актаў, зацверджанай і прайшоўшай ва ўстаноўленым парадку пазаведамасную дзяржаўную экспертызу. Прыняцце канкрэтных праектных рашэнняў па жылым доме і ўключэнне відаў рамонтных работ у праектна-каштарысную дакументацыю ажыццяўляецца па выніках абследавання дома зыходзячы з тэхнічнага стану канструктыўных элементаў будынка і яго інжынернага абсталявання, — растлумачыў Анатоль Шагун. — У дакументацыю на капітальны рамонт жылых дамоў уключаюцца работы па капітальным рамонце дапаможных памяшканняў, канструктыўных элементаў, інжынерных сістэм дома, якія знаходзяцца ў агульнадамавой уласнасці грамадзян.

Згодна з дзеючым заканадаўствам, наймальнікі, уласнікі жылых памяшканняў, члены арганізацыі грамадзян-забудоўшчыкаў абавязаны рабіць за свой кошт рамонт займаных імі жылых памяшканняў і падсобных памяшканняў у кватэры, а таксама замену і рамонт унутрыкватэрнага санітарна-тэхнічнага і іншага абсталявання, прыбораў уліку электрычнай, цеплавой энергіі, вады і газу, газавых і электрычных пліт, рамонт унутрыкватэрнай электраправодкі. Замена ў кватэрах названага абсталявання, а таксама трубаправодаў халоднага і гарачага водазабеспячэння ад стаякоў, электраправодкі можа адбывацца ў працэсе капітальнага рамонту ў парадку аказання платных бытавых паслуг".

Неплацельшчыкаў могуць выселіць у "іншы населены пункт"

Па дадзеных мінЖКГ, у краіне маецца значная колькасць грамадзян, якія з'яўляюцца неплацельшчыкамі жыллёва-камунальных паслуг, таму востра стаіць пытанне аб прыняцці да іх мер, якія дазваляюць вырашаць пытанне пагашэння запазычанасці за жыллёва-камунальныя паслугі. Так, згодна з артыкулам 33 ВК, уласнікі жылых памяшканняў, наймальнікі жылых памяшканняў дзяржаўнага жыллёвага фонду, сябры арганізацыі забудоўшчыкаў, дольшчыкі, якія заключылі дагаворы, што прадугледжваюць перадачу ім у валоданне і карыстанне аб'ектаў долевага будаўніцтва, якія несвоечасова і (або) не ў поўным аб'ёме ўнеслі плату за жыллёва-камунальныя паслугі, выплачваюць пеню ў памеры, устаноўленым заканадаўствам. Гэта ж датычыцца наймальнікаў жылых памяшканняў дзяржаўнага жыллёвага фонду, якія несвоечасова і (або) не ў поўным аб'ёме ўнеслі плату за карыстанне жылым памяшканнем.

Спагнанне запазычанасці па плаце за жыллёва-камунальныя паслугі і (або) плаце за карыстанне жылым памяшканнем адбываецца на падставе выканаўчых надпісаў натарыусаў, а пры наяўнасці спрэчкі — у судовым парадку.

У новым Жыллёвым кодэксе адзначана, што паўналетнія дзеяздольныя члены сям'і, былыя члены сям'і ўласніка жылога памяшкання прыватнага жыллёвага фонду, наймальніка жылога памяшкання дзяржаўнага жыллёвага фонду, грамадзяніна, які з'яўляецца чальцом арганізацыі забудоўшчыкаў, якія пражываюць у гэтым жылым памяшканні, нясуць салідарную адказнасць па запазычанасці па плаце за жыллёва-камунальныя паслугі з даты ўсялення ў жылое памяшканне, калі іншае не ўстаноўлена пісьмовым пагадненнем аб парадку карыстання жылым памяшканнем. Такія ж нормы дзейнічаюць у дачыненні да наймальніка жылога памяшкання дзяржаўнага жыллёвага фонду і якія пражываюць з ім сямейнікаў.

У выпадку прыняцця спадчыны запазычанасць па плаце за жыллёва-камунальныя паслугі і (або) плаце за карыстанне жылым памяшканнем пагашаюць спадчыннікі ў парадку, устаноўленым Грамадзянскім кодэксам Рэспублікі Беларусь (артыкул 1086).

Акрамя таго, прадугледжана наступнае: калі ўласнік жылога памяшкання мае без паважных прычын шасцімесячную запазычанасць па плаце за жыллёва-камунальныя паслугі мясцовы выканаўчы і распарадчы орган абавязаны ў пісьмовай форме папярэдзіць яго аб неабходнасці пагасіць запазычанасць.

"Калі ўласнік жылога памяшкання не пагасіў запазычанасць у поўным аб'ёме на працягу аднаго месяца з даты атрымання папярэджання, а магчымасці пагашэння доўгу за кошт іншай маёмасці, якая знаходзіцца ў яго ўласнасці, не маецца, то мясцовы выканаўчы і распарадчы орган мае права падаць у суд пазоў аб прымусе ўласніка да адчужэння жылога памяшкання, — удакладнілі парадак працэдуры спецыялісты міністэрства жыллёва-камунальнай гаспадаркі. — Калі на працягу года пасля ўступлення ў сілу рашэння суда жылое памяшканне не будзе адчужана, яно па рашэнні суда падлягае прымусоваму продажу з публічных таргоў.

Пасля прымусовага продажу жылога памяшкання, мясцовым выканаўчым і распарадчым органам былому ўласніку на працягу двух месяцаў перадаецца ва ўласнасць іншае жылое памяшканне па агульнай плошчы меншае за займанае, і (або) саступае яму па сваіх спажывецкіх якасцях, у тым ліку ў іншым населеным пункце. З выручаных ад продажу жылога памяшкання грашовых сродкаў пагашаецца запазычанасць за жыллёва-камунальныя паслугі, аплачваецца кошт набытага іншага жылога памяшкання, рэшта грошай выплачваецца грамадзяніну".

Што тычыцца наймальнікаў жылога памяшкання дзяржаўнага жыллёвага фонду і членаў іх сем'яў, прадугледжана, што ў выпадку, калі яны маюць без паважных прычын шасцімесячную запазычанасць па аплаце жыллёва-камунальных паслуг і аплаце за карыстанне жылым памяшканнем, яны могуць быць выселеныя ў судовым парадку з прадастаўленнем ім іншага жылога памяшкання горшых спажывецкіх якасцяў, уключаючы плошчу жылля. Пры гэтым захоўваецца выгляд і тэрмін дзеяння раней заключанага дагавора найму жылога памяшкання, якое можа быць прадастаўлена ў тым ліку за межамі дадзенага населенага пункта. Таксама неплацельшчыкі могуць быць па рашэнні суда падвергнутыя да прымусовага абмену займанага імі жылога памяшкання на жылое памяшканне па агульнай плошчы меншае за займанае, у якім па дагаворы найму жылога памяшкання дзяржаўнага жыллёвага фонду пражываюць грамадзяне, якія стаяць на ўліку маючых патрэбу ў паляпшэнні жыллёвых умоў, зыходзячы з даты іх прыняцця на такі ўлік.

Як паведамілі “Тэлеграфу ў Міністэрстве жыллёва-камунальнай гаспадаркі, у цяперашні час у Мінску маецца 323 уласнікі жылых памяшканняў, у якіх пратэрмінаваная запазычанасць складае звыш шасці месяцаў. Са студзеня па верасень 2012 года па рашэнні суда выселена 83 сям'і, якая мае пратэрмінаваную запазычанасць за жыллёва-камунальныя паслугі, з іх 46 выселена ў іншае памяшканне (менш займанага) і 37 без прадстаўлення жылога памяшкання.

telegraf.by