Упершыню са жніўня. Расійская авіяцыя нанесла ракетны ўдар па Украіне з тэрыторыі Беларусі

Раніцай 6 кастрычніка расійская авіяцыя нанесла ракетны ўдар па Украіне з тэрыторыі Беларусі.

Пра гэта заявіў намеснік начальніка галоўнага аператыўнага ўпраўлення генштаба УСУ Аляксей Громаў і спікер паветраных сіл Юрый Ігнат.

«Сёння раніцай 4 самалёты Ту-22 М3 стратэгічнай авіяцыі краіны-агрэсара з паветранай прасторы Беларусі нанеслі авіяцыйны ўдар па тэрыторыі Украіны. Папярэдняе прымяненне авіяцыі з гэтага кірунку было 28 жніўня», — паведапіў Громаў.

Як удакладніў Юрый Ігнат, гаворка ідзе пра ўдар па Хмяльніцкай вобласці, які рускія нанеслі ракетамі Х-22. Адна з двух ракет упала побач з аб'ектам інфраструктуры. Іншая ўпала на пустцы. Ахвяр і пацярпелых няма.

Учора Аляксандр Лукашэнка заявіў, што Беларусь удзельнічае ў спецыяльнай ваеннай аперацыі на Украіне, але вайскоўцаў у зону канфлікту не накіроўвае.

«Што тычыцца нашага ўдзелу ў спецыяльнай ваеннай аперацыі ва Украіне, мы ўдзельнічаем там. Мы гэтага не хаваем. Але мы нікога не забіваем. Мы нікуды не пасылаем сваіх вайскоўцаў. Мы не парушаем свае абавязацельствы. Наш удзел у тым, каб не дапусціць распаўсюджвання гэтага канфлікту на тэрыторыю Беларусі, па-першае. Па-другое, не дапусціць нанясення ўдару па Беларусі пад прыкрыццём спецыяльнай ваеннай аперацыі з боку Польшчы, Літвы і Латвіі. Як я казаў, у спіну рускім страляць ніхто не будзе з тэрыторыі Беларусі. Вось наш удзел», — заявіў Лукашэнка.

Паводле «Украінскай праўды», ВВС



Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: